ايماقتار • 09 ءساۋىر، 2020

جامبىل وبلىسىنىڭ 29 جاستاعى تۇرعىنى كوروناۆيرۋستان جازىلىپ شىقتى

54 رەتكورسەتىلدى

وسى ۋاقىتقا دەيىن جامبىل وبلىسىندا كوروناۆيرۋس ىندەتىن جۇقتىرۋدىڭ 45 دەرەگى تىركەلگەن بولاتىن. ناۋقاستاردىڭ ءبارى دە بۇگىندە بەلگىلەنگەن تارتىپكە ساي ەم الۋدا. بۇگىن وڭىردە شۋ اۋدانىنىڭ 29 جاسار تۇرعىنىنىڭ كوروناۆيرۋس ىندەتىنەن جازىلىپ شىققانى انىقتالدى.

قىرعىز رەسپۋبليكاسىنان ورالعاننان كەيىن 24 ناۋرىز كۇنى ودان الىنعان قان تالداۋلارىنىڭ قورىتىندىسى وڭ ناتيجە كورسەتكەن بولاتىن. ەكى اپتا ىشىندە ول ينفەكتسيالىق ستاتسيوناردا جاتىپ، قاجەتتى ەم-دوم شارالارىن قابىلدادى.

ناتيجەسىندە تۇرعىننان ەكى رەت قان تالداۋى الىنىپ، ينفەكتسيانىڭ جوقتىعى راستالدى. ول ەندى الداعى ەكى اپتا بويى دارىگەرلەردىڭ باقىلاۋىمەن ءۇي كارانتينىندە بولادى.

سونداي-اق، بۇعان دەيىن اۋرۋى انىقتالعان جۇك تاسىمالداۋ قىزمەتىمەن اينالىساتىن 1958، 1975، 1984 جىلدارى تۋعان قىرعىزستاندىق ءۇش ازامات ءوز ەلدەرىنە جىبەرىلدى. ولاردان مەملەكەتتىك شەكارادان ءوتۋ كەزىندەگى تەكسەرىس بارىسىندا كوروناۆيرۋس انىقتالعان. ارنايى اۆتوكولىكتەرمەن ولار شەكارا ماڭىنداعى وتكىزۋ پۋنكتىنە جەتكىزىلىپ، ولاردى ارى قاراي قىرعىز رەسپۋبليكاسىنىڭ مەديتسينالىق قىزمەتىنىڭ ماماندارى الىپ كەتتى. بۇگىنگى تاڭدا جامبىل وبلىسىندا جۇقپالى اۋرۋلار ستاتسيونارىندا بارلىعى 41 ناۋقاس جاتىر. وبلىستىق اكىمدىكتىڭ مالىمەتىنشە، ولاردىڭ جاعدايى قاناعاتتانارلىق.

ايتا كەتەيىك، وبلىس بويىنشا دارىلىك زاتتار، مەديتسينالىق جابدىقتار، دەزينفەكتسيالىق  جانە جەكە قورعانۋ قۇرالدارى،  پتر مەن تەست-جۇيەلەرىن ساتىپ الۋعا جالپى 860 ميلليون تەڭگە بولىنگەن. ونىڭ 536 ميلليون تەڭگەسى ەل ۇكىمەتىنىڭ رەزەرۆتىك قورىنان، 43 ميلليون تەڭگەسى دەنساۋلىق ساقتاۋ مينيسترلىگىنىڭ ەپيدەميولوگيالىق قورىنان، ال 281 ميلليون تەڭگەسى جەرگىلىكتى بيۋدجەتتەن قاراستىرىلعان. قازىرگى ۋاقىتتا وبلىستىق مەديتسينالىق مەكەمەلەردە ساتىپ الۋ جانە جەتكىزۋ شارالارى جۇرگىزىلۋدە.

 

جامبىل وبلىسى

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار