ايماقتار • 09 ءساۋىر، 2020

جامبىل وڭىرىندەگى دارىگەر جازباسىنا بايلانىستى تەكسەرىس باستالدى

207 رەتكورسەتىلدى

جۋىردا عانا جامبىل وبلىسى، مەركى اۋداندىق اۋرۋحاناسىنىڭ ينفەكتسيونيست دارىگەرى تولقىناي ورداباەۆانىڭ الەۋمەتتىك جەلىگە جاريالاعان جازباسى كوپشىلىكتىڭ قىزۋ تالقىسىنا ءتۇستى. ول ءوز جازباسىندا بىرقاتار ماسەلەلەردى كوتەرگەن.

اۋەلى ءوزىن تانىستىرعان دارىگەر بۇگىندە مەركى اۋداندىق ورتالىق اۋرۋحاناسىندا ۋاقىتشا باس دارىگەر دانيار نۇسىپباەۆ ەكەنىن، ونىڭ 9 اي بويى باس ەكونوميست بولعانىن، مەديتسينالىق ءبىلىمى جوق بولعانىنا قاراماستان باس دارىگەردىڭ جۇمىسىن اتقاراتىنىن جازىپتى. سونداي-اق ول باس دارىگەردىڭ ۋاقىتشا مىندەتىن اتقارۋشى ەشقانداي مەديتسينالىق ماسەلەلەردى شەشپەيتىنىن، ونىڭ ورنىنا بارلىق سۇراقتاردى باس دارىگەردىڭ ورىنباسارى جاڭىل شويبەكوۆانىڭ شەشەتىنىن، ءتىپتى سول شويبەكوۆانىڭ ءوزى جامبىل وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆتىڭ ايەلىنىڭ اپكەسى ەكەنىن ايتقان. تولقىناي ورداباەۆانىڭ جازۋىنشا، مارات جۇمانقۇلوۆقا شاعىمدارمەن جۇگىنگەن جاعدايدا ول جاڭىل شويبەكوۆانى قولدايدى ەكەن ءارى ءوزىنىڭ egov ارقىلى بەرگەن ءوتىنىشىن وبلىستىڭ باس دارىگەرى قاراماعان. ەندى دارىگەر وسىنداي شاعىمدار مەن سوزدەردەن كەيىن باسشىلىقتىڭ ءوزىن اياقتان شالىپ، جۇمىستان شىعارۋى مۇمكىن ەكەنىن ويلاپ قورقاتىنىن دا جەتكىزىپتى.

تولقىناي ورداباەۆا ءبىراز جىلدان بەرى مەركى اۋداندىق اۋرۋحاناسىندا ينفەكتسيونيست دارىگەر بولىپ قىزمەت اتقارادى ەكەن. وكىنىشتىسى سول، كوروناۆيرۋس ينفەكتسياسىن جۇقتىرعان ناۋقاستاردى ەمدەۋمەن اينالىسقان دارىگەردىڭ وزىنە دە قاۋىپتى دەرت جۇققان. ول بۇگىندە تاراز قالاسىندا ەم الىپ جاتقان بولىپ شىقتى. ماسەلەنىڭ انىق-قانىعىن ءبىلۋ ماقساتىندا ءبىز مەركى اۋداندىق ورتالىق اۋرۋحاناسى باس دارىگەرىنىڭ مىندەتىن ۋاقىتشا اتقارۋشى دانيار نۇسىپباەۆقا حابارلاستىق. ول تولقىناي ورداباەۆانىڭ ءبىراز ۋاقىتتان بەرى اۋداندىق اۋرۋحانادا جۇمىس ىستەيتىنىن، الايدا بۇگىندە ىندەت جۇقتىرۋىنا بايلانىستى ەم الىپ جاتقانىن راستادى. نەگىزى ءدۇيىم جۇرتتىڭ نازارىن اۋدارعان جازبانى جازۋعا سەبەپ بولعان مىنا جاعداي ەكەن. بويىندا اۋرۋدىڭ العاشقى بەلگىلەرى بىلىنە باستاعاندا تولقىناي ورداباەۆا جۇمىستان جىبەرۋىن سۇراپ باس دارىگەردىڭ ورىنباسارى جاڭىل شويبەكوۆاعا بارادى. الايدا ول جۇمىستان جىبەرۋ ءۇشىن زاڭدى تۇردە اۋىرعانى تۋرالى قۇجاتىنىڭ (بولنيچنىي) بولۋى كەرەكتىگىن ايتادى. بىراق، دارىگەر ول قۇجاتتى الۋعا كونبەيدى. تەكەتىرەس نەگىزى وسىدان باستالعان سياقتى. ەكىنشى ماسەلە، قورعانىس كوستيۋمدەرىنە قاتىستى. دانيار نۇسىپباەۆتىڭ ايتۋىنشا، مۇنداي كوستيۋمدەردىڭ ەكى ءتۇرى بار ەكەن. ءبىرىنشىسى ءبىر رەتتىك، ال ەكىنشىسى كوپ رەتتىك قولدانۋعا ارنالعان كيىمدەر. ەكىنشىسىن ءبىر رەت پايدالانعان سوڭ دەزينفەكتسيالاپ قايتا پايدالانا بەرۋگە بولادى ەكەن. «بۇل جەردە جاڭىل شويبەكوۆا كوپ رەتتىك كوستيۋمدەردى كيۋدى ايتقان بولاتىن. بالكىم، تولقىناي ورداباەۆا ونى تۇسىنبەگەن بولار. جالپى، شويبەكوۆا ەڭبەك ءوتىلى 30 جىلدان اسقان دارىگەر. ءوز جۇمىسىن بىلەتىن مامان»، دەيدى دانيار نۇسىپباەۆ. ءبىز ودان ورداباەۆانىڭ ءوزىن جۇمىستان كەتىپ قالۋ قاۋپىن جازعانى تۋرالى سۇراعانىمىزدا، ول «اۋەلى جازىلىپ كەلسىن. ول كىسىمەن سويلەسەمىز. جۇمىستان بوساتىلمايدى»، دەپ جاۋاپ بەردى. بىراق، تولقىناي ورداباەۆانىڭ ايتۋىنشا، جاعداي بۇلاي ەمەس ەكەن. دارىگەرگە ارنايى حابارلاسقانىمىزدا ول ءتىپتى جاڭىل شويبەكوۆا وعان اۋىرعانى تۋرالى قۇجاتتىڭ (بولنيچنىي) بولۋى كەرەكتىگى تۋرالى ايتپاعانىن ايتتى. «مەن دەنە قىزۋىم كوتەرىلىپ، اۋىرىپ تۇرعانىمدا ول كىسىدەن سۇراندىم. مەنى جىبەرمەي قويدى. جاعدايىمدى ايتىپ ەدىم، «قايتا جۇمىستا جۇرگەنىڭە قۋان» دەدى. گيپپوكرات انتىن بەرگەنىم ءۇشىن عانا جۇمىستا قايتادان قالىپ، كارانتيندە جاتقان ادامداردى ەمدەۋمەن اينالىستىم»، دەيدى ول. سونىمەن قاتار، تولقىناي ورداباەۆا مەركى اۋرۋحاناسىندا مەديتسينالىق ماسكانىڭ دا، ارنايى كوستيۋمدەردىڭ دە جەتكىلىكسىزدىگىن، ءبىر كيگەن كيىمدى باسشىلار ەكىنشى رەت قايتا كيگىزەتىنىن دە ايتتى. سونداي-اق، ول قازىر ءوزىنىڭ جۇمىس بولمەسىنەن 400 مەديتسينالىق ماسكانىڭ تابىلعانى جايلى اقپارات العانىن، بىراق ونىڭ ۇيىمداستىرىلعان نارسە ەكەنىن جەتكىزدى.

جالپى، تولقىناي ورداباەۆا الەۋمەتتىك جەلىگە ەكى رەت جازبا قالدىرعان. ەكىنشى جازباسىندا ول مەركى اۋداندىق ورتالىق اۋرۋحاناسىنىڭ جۇقپالى اۋرۋلار دارىگەرى ەكەنىن، قازىر تاراز قالاسىنداعى جۇقپالى اۋرۋلار اۋرۋحاناسىندا كوروناۆيرۋستىق ينفەكتسيا بويىنشا ەم الىپ جاتقانىن جازعان. «كارانتيندەگى ناۋقاستارمەن جۇمىس ىستەۋ كەزىندە ىندەت جۇقتىردىم. مەركى اۋداندىق ورتالىق اۋرۋحاناسىنىڭ اكىمشىلىگى قىسىم كورسەتىپ، مەديتسينالىق پەرسونالدىڭ وزدەرىنە ماسكا تىگىپ كيۋگە ماجبۇرلەدى. جۇمىستا مەديتسينالىق ماسكا مەن قورعانۋ قۇرالدارى بەرىلمەيدى»، دەپ باستالىپ، بۇدان ءارى ءتۇرلى جاعدايلاردى جازعانى دا قوعام تالقىسىنا ءتۇستى. ول جامبىل وبلىسىندا قاجەتتى قۇرالدار جوق بولعاندىقتان ناۋقاستارمەن قارىم-قاتىناستا بولعاندارعا 14 كۇنگە قايتا تەستىلەۋ (رەتەستيروۆانيە) جاسالماعانىن، سوندىقتان قارىم-قاتىناستا بولعانداردى كوروناۆيرۋستىق ينفەكتسياعا  باقىلاۋ ءاناليزىن جاساماستان قايتارۋعا تۋرا كەلگەنىن جازىپتى. قازىرگى تاڭدا ناۋقاس ۆيرۋسقا قارسى «الۋۆيا» پرەپاراتىن قابىلداپ جاتىر ەكەن. الايدا تولقىناي ورداباەۆا «بۇل پرەپاراتتىڭ كەرى اسەرى كوپ. مەنى كوروناۆيرۋس ينفەكتسياسىن جۇقتىرعان ناۋقاستىڭ قاسىنا جاتقىزدى. نەگە بولەك جاتقىزبايدى؟ ول دا قالالىق سانەپيدقاداعالاۋ مەكەمەسىنىڭ (سەس) ەپيدەميولوگ دارىگەرى. جامبىل وبلىسىندا كوروناۆيرۋسقا پتسر قان الىنبايدى. پتسر تەست جوق. قارىم-قاتىناستا بولعاندارعا قايتا تەستىلەۋ (رەتەستيروۆانيە) جاسالمايدى. جامبىل وبلىسىنىڭ دەنساۋلىق ساقتاۋ باسقارماسى مەديتسينالىق قىزمەتكەرلەردىڭ ۆيرۋس جۇقتىرۋ فاكتىسىن جاسىرىپ وتىر»، دەگەن وسى جازباسىندا. سونىمەن قاتار، مەركىلىك دارىگەر تاعى دا بىرقاتار ماسەلەلەردى ايتا كەلىپ، جامبىل وبلىسى دەنساۋلىق ساقتاۋ باسقارماسىنا مەديتسينالىق ماسكا، ۆيرۋسقا قارسى دارىلەر مەن دارىگەرلەرگە پرەمياعا دەپ بولىنگەن قارجىنىڭ قايدا ەكەنىن سۇراپ جازادى.

اتالعان ماسەلەلەرگە وراي جامبىل وبلىستىق دەنساۋلىق ساقتاۋ باسقارماسى ەشقانداي مالىمەت بەرگەن جوق. تەك تەكسەرۋدىڭ باستالعانىن عانا ايتتى. ال، دانيار نۇسىپباەۆ تولقىناي ورداباەۆا ايتقانداي ەكونوميست بولىپ 9 اي ەمەس، 5 جارىم اي عانا جۇمىس ىستەگەنىن ايتتى. الايدا، 6 ايدان بەرى اۋداندىق اۋرۋحانانىڭ باس دارىگەرىنىڭ مىندەتىن اتقارىپ كەلەدى ەكەن. بىراق، جارتى جىلدان بەرى مۇندا باسشى تاعايىنداماي وتىرعان دەنساۋلىق ساقتاۋ باسقارماسىنىڭ قانداي ساياساتى بار ەكەنىن ءتۇسىنۋ قيىن. ەسەسىنە جامبىل وبلىسىنىڭ اكىمدىگى وبلىستىق دەنساۋلىق ساقتاۋ باسقارماسى جانە وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىمەن بىرلەسە وتىرىپ، مەركى اۋداندىق ورتالىق اۋرۋحاناسىنىڭ دارىگەرى تولقىناي ورداباەۆانىڭ الەۋمەتتىك جەلىلەردە جاريالانعان شاعىمى بويىنشا قىزمەتتىك تەكسەرۋ باستالعانىن حابارلادى. اكىمدىكتىڭ رەسمي جازباسىندا «دارىگەر-ينفەكتسيونيست ت.ورداباەۆا 1،75 شتاتتىق بىرلىككە (ساعات 9-دان 18.00-گە دەيىن) سايكەس لاۋازىمدىق جالاقىمەن جۇمىس ىستەگەن. ونىڭ ىشىندە 0،25 شتاتتىق بىرلىك ونىڭ ءوز كەلىسىمى بويىنشا دەنساۋلىعىنا بايلانىستى ەڭبەككە جارامسىزدىعىنا قاتىستى ارىپتەسىنىڭ ۋاقىتشا مىندەتىن اتقارعان. اعىمداعى جىلدىڭ 3 ساۋىرىندە ت.ورداباەۆا دەنە قىزۋىنىڭ جوعارىلاۋىنا بايلانىستى شاعىمدانعان. ودان زەرتحانالىق تالداۋلار الىنىپ، قورىتىندىسىنا سايكەس كوروناۆيرۋستىق ينفەكتسيانى جۇقتىرعاندىعى راستالعان.

ەپيدەميولوگيالىق تەكسەرۋلەر جۇرگىزىلىپ،  ونىمەن جاقىن بايلانىستا بولعان 5 ادام انىقتالىپ، كارانتينگە ورنالاستىرىلدى»، دەلىنگەن. ناۋقاس ينفەكتسيالىق ستاتسيوناردىڭ ەكى ورىندىق بوكسىندا وسىنداي دياگنوزى بار باسقا پاتسيەنتپەن بىرگە جاتقىزىلعان. بىراق اكىمدىك بۇل سانيتارلىق-ەپيدەميولوگيالىق تالاپتارعا قايشى كەلمەيتىنىن، ناۋقاستىڭ ەلىمىزدىڭ دەنساۋلىق ساقتاۋ مينيسترلىگى بەكىتكەن ەمدەۋ حاتتاماسىنا سايكەس «الۋۆيا» پرەپاراتىن قابىلداعانىن مالىمدەدى. وبلىستىق اكىمدىك بۇگىنگى كۇنى اۋداندىق اۋرۋحانانىڭ مەديتسينا قىزمەتكەرلەرى تولىق كولەمدە جەكە قورعانىس قۇرالدارىمەن قامتاماسىز ەتىلگەنىن ايتا كەلىپ، ءساۋىر ايىندا كوروناۆيرۋستى ينفەكتسيانىڭ تارالۋىنا جول بەرمەۋ بويىنشا ءىس-شارالارعا تارتىلعان وسى اۋداندىق اۋرۋحانانىڭ 20 مەديتسينا قىزمەتكەرىنە، سونىڭ ىشىندە دارىگەر تولقىناي ورداباەۆاعا دا سىياقى تولەۋ جوسپارلانۋدا ەكەنىن  جەتكىزدى. الايدا ونىڭ اۋرۋ فاكتىسى جاسىرىلماعانىن، كەرىسىنشە اقپاراتتىڭ دەنساۋلىق ساقتاۋ مينيسترلىگىنىڭ تاۋارلار مەن قىزمەتتەردىڭ قاۋىپسىزدىگىن باقىلاۋ كوميتەتىنە بەرىلگەنىن مالىمدەدى.

الەۋمەتتىك جەلىنى شۋلاتقان اۋليەاتالىق دارىگەر تولقىناي ورداباەۆانىڭ جازباسىنا قاتىستى قوعامدا پىكىر كوپ ارينە. كوپشىلىگى دارىگەردىڭ اۋىرعانىن جاسىرعان دەپ دەنساۋلىق ساقتاۋ باسقارماسىن، اۋداندىق اۋرۋحانانىڭ اكىمشىلىگىن كىنالاۋدا. الايدا، ءبىز استارىنا ءۇڭىلىپ، زەرتتەپ كورگەن ماسەلەنىڭ انىق-قانىعى وسى بولدى.

 

جامبىل وبلىسى

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار