ەكونوميكا • 09 ءساۋىر، 2020

جىل باسىنان بەرى زەينەتاقى ەكى رەت ءوستى

421 رەتكورسەتىلدى

1 ساۋىردەن باستاپ ەڭبەك جانە حالىقتى الەۋمەتتىك قورعاۋ مينيسترلىگى مەملەكەت باسشىسىنىڭ بيىلعى 31 ناۋرىزداعى تاپسىرماسىنا سايكەس زەينەتاقىلار مەن مەملەكەتتىك جاردەماقىلاردى جىلدىق تۇرعىدا 10%-عا يندەكساتسيالاۋدى جۇرگىزدى. وسىلايشا 2020 جىلدىڭ 1 ساۋىرىنەن باستاپ زەينەتاقىنىڭ ەڭ تومەنگى مولشەرى 40 441 تەڭگەنى قۇرادى. 

ياعني وسى جىلى زەينەتاقى ەكى رەت كوتەرىلدى. قالاي؟ بۇل تۋرالى مينيسترلىك بىلايشا ءتۇسىندىردى:

♦ 2020 جىلدىڭ 1 قاڭتارىنان ينفلياتسيانىڭ بولجامدى دەڭگەيى ەسكەرىلە وتىرىپ، بازالىق زەينەتاقىعا 5%، ال جاسىنا جانە ەڭبەك سىڭىرگەن جىلدارىنا بايلانىستى زەينەتاقى تولەمدەرىنە 7% (ينفلياتسيا دەڭگەيىنەن 2%-عا ارتىق) كەزەكتى رەت جىل سايىنعى يندەكساتسيا جاسالدى. 

♦ 2020 جىلدىڭ 1 ساۋىرىنەن جاسىنا جانە ەڭبەك سىڭىرگەن جىلدارىنا بايلانىستى زەينەتاقى تولەمدەرى 2020 جىلعا دەيىن تاعايىندالعانىمەن قوسا وسى جىلعى 1 قاڭتار مەن 31 ناۋرىزدا بەكىتىلگەن بولىگى 5%-عا جوعارىلادى.

√ ءبىرىنشى مىسال: ءبىر ەر كىسىگە 18.11.2019 جىلدان بەرى 43 000 تەڭگە ىنتىماقتى زەينەتاقى تاعايىندالدى دەلىك. ونىڭ زەينەتاقىسى جىل سايىنعى قايتا ەسەپتەۋ اياسىندا 2020 جىلدىڭ 1 قاڭتارىنان 46 010 تەڭگەنى قۇراسا، 1 ساۋىردەن باستاپ اتالعان ىنتىماقتى زەينەتاقى تاعى 5% ءوسىپ، 48 311 تەڭگە بولادى (46 010+5%=48 311).

√ ەكىنشى مىسال: ءبىر ايەل ادامعا 12.03.2020 جىلدان 52 000 تەڭگە تاعايىندالدى دەپ الايىق. 1 ساۋىردەن باستاپ 5% ءوسىمدى ەسكەرسەك، بۇل ىنتىماقتى زەينەتاقى 54 600 تەڭگەگە جەتتى (52 000+5%=54 600).

مەملەكەتتىك بازالىق زەينەتاقى تولەمىنە كەلەر بولساق، ول «قازاقستان رەسپۋبليكاسىنداعى زەينەتاقىمەن قامسىزداندىرۋ تۋرالى» زاڭىنىڭ 4-بابىنا ساي، 2020 جىلدىڭ 1 ساۋىرىنەن ەڭ تومەنگى كۇنكورىس دەڭگەيىنىڭ جاڭا سوماسى بويىنشا پايىزدىق مولشەردە ايقىندالادى. 

√ مىسالى، ءبىر ەر ادامعا 20.12.2019 جىلدان بەرى 26 729 تەڭگە نەمەسە كۇنكورىس دەڭگەيىنەن 90% بازالىق زەينەتاقى تاعايىندالدى. 2020 جىلدىڭ 1 قاڭتارىنان ونىڭ مولشەرى، كۇنكورىس دەڭگەيىنىڭ جىل سايىنعى ءوسىمىن نازارعا الساق، 28 065 تەڭگەنى كورسەتىپ، 2020 جىلدىڭ 1 ساۋىرىنەن 29 402 تەڭگەنى قۇرادى (ياعني بيىلعى 1 ساۋىردەن ەڭ تومەنگى كۇنكورىس دەڭگەيى 32 668 تەڭگە بولىپ بەكىتىلدى، ونىڭ 90%-ى=29 402).

وسى ورايدا، «2020 – 2022 جىلدارداعى رەسپۋبليكالىق بيۋدجەت تۋرالى» زاڭىنا ەنگىزىلگەن وزگەرتۋلەرگە سايكەس، 1 ساۋىردەن باستاپ ەڭ تومەنگى زەينەتاقى مولشەرى 40 411 تەڭگە بولدى.

ءتيىستى قادامدار 2،2 ميلليوننان استام زەينەتكەردءى قامتيدى. 

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار