ايماقتار • 08 ءساۋىر، 2020

جەزقازعان: جۇرتتىڭ بالاسىنان قاي جەرى كەم؟

372 رەتكورسەتىلدى

اينالايىن ينتەرنەتتەن كانادالىق ءبىر وقۋشىنىڭ كارانتين كەزىندە قات بولىپ تۇرعان بەتپەردەگە اسا قاجەتتى قۇرال ويلاپ تاپقانىن كورىپ، «وي، اللا-اي، ادام بالاسىنىڭ شىعارمايتىنى جوق-اۋ، ءا!»، دەپ تاڭداي قاققانىمىز راس ەدى. بىلاي قاراساڭىز قاراپايىم عانا زات، بىراق قازىرگى جاعدايدا كوتەرىپ تۇرعان جۇگى كەرەمەت، ەندى! سۋرەتتى قاراساڭىز كوزىڭىز جەتەدى: بۇل قۇرالدىڭ ارقاسىندا كۇنى-ءتۇنى ماسكامەن جۇرەتىن دارىگەرلەر قاۋىمىنىڭ قۇلاعى قاجالۋدان قۇتىلاتىن بولدى، ەندى.

وسى سۋرەتتى كورگەندە «ەلدىڭ بالاسىن قاراشى، وسىنداي دۇنيە بىزدىكىلەردىڭ ويىنا نەگە كەلمەيدى ەكەن؟»، دەپ ماڭگى قازاقى سۇراقتى وزىمىزگە ىشتەي قويعانىمىز دا راس... سويتسەك، بىزدە دە بار ەكەن، اينالىپ كەتەيىن اقىلدى بالالار!

مىسالى، جەزقازعاندىق ارىستان سەمباەۆ دەگەن وقۋشى «روبوت قول» ويلاپ تاۋىپتى. ول ءوزىنىڭ الگى اقىلدى قۇرىلعىسىن جەرگىلىكتى دۇكەنگە بارىپ، ءىس جۇزىندە سىناقتان  وتكىزگەن. «قۇلتەمىر قول» يەسى ءامىر بەرگەن بەتتە سورەلەردەن زاتتاردى الىپ، سەبەتتەردى ءاپ-ساتتە تولتىرىپ تاستاپتى. سۋپەرماركەتتىڭ ساتۋشىلارى مۇنداي قىزىقتى اۋىزدارىنىڭ سۋى قۇرىپ تاماشالاعان. ال ارىستان بولسا، ءوزىنىڭ «روبوقولىن» ءارى قاراي جەتىلدىرۋدى ويلاستىرىپ ءجۇر ەكەن. جاس ونەرتاپقىش، سونىمەن قاتار، ارنايى قورعانىشى بار ماسكا-رەسپيراتور دا ويلاپ شىعارىپتى.

ا

جەزقازعانداعى بالالار مەن جاسوسپىرىمدەر سارايىنداعى شىعارماشىلىق دامۋ ورتالىعىندا ونەر ۇشتاپ جۇرگەن ارىستاننىڭ ۇستازى اندرەي ماتۆەەۆ دارىندى جاستىڭ ويلاپ تاپقاندارى ءدال قازىرگى جاعدايدىڭ تامىرىن تاپ باساتىن بۇيىمدار ەكەنىن ايتادى. ال ارىستاننىڭ ارمانى – الداعى ۋاقىتتا دۇكەنگە ءوزى بارىپ، ساۋدا-ساتتىق جاسايتىن روبوت ويلاپ تابۋ ەكەن!

جالپى، اتالعان ورتالىقتىڭ جاس تەحنيكتەرى كارانتين كەزىندە گيگيەنالىق جانە ءپورتاتيۆتى ۇستاعىشتار، روبوت-دەزينفەكتور ءپروتوتيپىن ويلاپ تابۋ سياقتى  باسقا دا پايدالى ىستەرمەن اينالىسىپ ءجۇر. مىسالى، ميلەنا چەنزە دەگەن دارىندى قىز ۇيدە ەلەكتر قۇرالدارى مەن قۇرىلعىلاردى قاشىقتان قوسۋ جانە اجىراتۋ ءۇشىن سمارتفون نەمەسە پلانشەت ارقىلى باسقارىلاتىن اقىلدى روزەتكا قۇراستىرىپ شىعارعان.

ۇيىرمە جەتەكشىسى اندرەي ماتۆەەۆ ءۇش 3D-پرينتەردە كۇنىنە ەسىك تۇتقاسىنا ارنالعان 30 گيگيەنالىق ۇستاعىش، 60 جەكە ءپورتاتيۆتى ۇستاعىش، ماسكا-رەسپيراتوردان جانە قورعانىس قالقاندارىنان قۇرالعان 30 جيىنتىق باسىپ شىعارۋعا بولاتىنىن ايتادى.

ا

 – قاشىقتان وقىتۋ ساباقتارىندا كونسترۋكتورلىق يدەيالار مەن جوبالاردى ازىرلەيمىز. ماسەلەلەردى زەرتتەيمىز دە، ميدىڭ كومەگىمەن ولاردى شەشۋدىڭ جولدارىن ۇسىنامىز. الدىمەن ZOOM كونفەرەنتسيا رەجيمىندەگى ساباق بارىسىندا 3D ۇلگىنى جاسايمىز. ديزاين اياقتالعان سوڭ، STL-فورماتتاعى فايلدى جاسايمىز. ونى سلايسەردە وڭدەپ جانە جەتىلدىرگەننەن كەيىن فايلدى G-كودقا اۋدارامىز جانە 3D-پرينتەردە باسىپ شىعارۋعا جىبەرەمىز، – دەيدى جاس تەحنيكتەر جەتەكشىسى.

قاراپ تۇرساق، ءبىزدىڭ بالالار جۇرتتىكىنەن ارتىق بولماسا، كەم ەمەس ەكەن. تەك، وسى دارىنداردى قولتىعىنان دەمەپ جىبەرەتىن قولداۋ بولسا دەيسىڭ!

 

 

قاراعاندى وبلىسى

 

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار