قازاقستان • 08 ءساۋىر، 2020

وبلىستار كوكتەمگى ەگىن ناۋقانىنا دايىن

30 رەتكورسەتىلدى

بيىلعى ەگىن جۇمىستارى ءۇشىن ديزەل وتىنىنا ۇسىنىلاتىن باعا تونناسىنا 194 مىڭ تەڭگەنى قۇرادى. جەتكىزۋ مەن ساقتاۋدى ەسەپكە العاندا شارۋالار ءۇشىن بولجامدى باعا ليترىنە شامامەن 165 تەڭگەنى قۇراۋى ءتيىس. جالپى كوكتەمگى دالا جۇمىستارىن جۇرگىزۋگە 387 مىڭ توننا ديزەل وتىنى ءبولىندى.

بۇگىنگى ەگىن القاپتارىنداعى جۇمىستىڭ بارىسى جايىندا پرەزيدەنت جانىنداعى ورتالىق كوممۋنيكاتسيالار قىزمەتى الاڭىندا وتكەن بريفينگتە اۋىل شارۋاشىلىعى مينيسترلىگىنىڭ ءبىرىنشى ۆيتسە-ءمينيسترى ايداربەك ساپاروۆ ايتىپ بەردى. بەلگىلى بولعانداي، بيىل اۋىل شارۋاشىلىعى داقىلدارىنىڭ جالپى ەگىس كولەمى 22،5 ملن گا قۇرايدى. ءداندى جانە ءداندى-بۇرشاقتى داقىلداردىڭ الاڭى 15،2 ملن گا، سونىڭ ىشىندە بيدايدىڭ الاڭى – 11،4 ملن گا قۇرايدى.

̶ مەملەكەت باسشىسىنىڭ تاپسىرمالارىن ورىنداۋ ماقساتىندا  ەگىس القاپتارىن ءارتاراپتاندىرۋ جانە جوعارى رەنتابەلدى داقىلدار وسىرۋگە كوشۋ بويىنشا جۇمىستار جالعاسۋدا. وسىلايشا، مايلى داقىلداردىڭ جوسپارلانعان الاڭى 3 ملن توننا گا قۇرايدى. بۇل كورسەتكىش وتكەن جىلمەن سالىستىرعاندا 122 مىڭ توننا گا كوپ. كوكونىس-باقشا داقىلدارى مەن كارتوپتىڭ الاڭى 19 مىڭ توننا، ازىقتىق داقىلدارىڭ الاڭدارى 309 مىڭ گا قۇرايدى دەپ جوسپارلانۋدا، ̶  دەدى ا.ساپاروۆ.

سونىمەن قاتار، ەلدەگى تۇقىم دايىنداۋ جۇيەلى تۇردە جۇرگىزىلۋدە. قازىرگى تاڭدا 2 جارىم ملن توننا تۇقىم ەگىلگەن. وسى ورايدا وبلىستاردىڭ جەرگىلىكتى بيۋدجەتتەرىندە تۇقىم شارۋاشىلىعىن دامىتۋدى سۋبسيديالاۋعا 11،3 ملرد تەڭگە قاراستىرىلعان. قوسىمشا رەسپۋبليكالىق بيۋدجەت قاراجاتىنان شامامەن 29،4 مىڭ توننا تۇقىم جانە 838،7 مىڭ دانا ەليتالىق كوشەتتەر ساتىپ الۋعا 2،5 ملرد تەڭگە ءبولىندى. بۇعان قوسا، 480 مىڭ تونناعا جۋىق مينەرالدى تىڭايتقىشتار ساتىپ الۋعا 23،3 ملرد تەڭگە قاراستىرىلعان.

كوكتەمگى دالا جۇمىستارىنا اۋىل شارۋاشىلىعى تەحنيكالارىنىڭ دايىندىعى 98%-دى قۇرايدى. بۇل اقپاراتتى وبلىس اكىمدىكتەرى تاراتقان.

̶ اگروونەركاسىپتىك كەشەن سۋبەكتىلەرىن قولداۋ بويىنشا ءىس-شارالاردى جۇرگىزۋ ءۇشىن «اگرارلىق نەسيە كورپوراتسياسى» اق-نا رەسپۋبليكالىق بيۋدجەتتەن 70 ملرد تەڭگە كولەمىندە بيۋدجەتتىك كرەديت ءبولدى. بۇل ادەتتەگىدەن 10 ملرد تەڭگەگە ارتىق. سوڭعى قارىز الۋشىلار ءۇشىن سىياقى مولشەرلەمەسى جىلدىق 5%-دان اسپايدى، ̶  دەدى اۋىل شارۋاشىلىعى مينيسترلىگىنىڭ ءبىرىنشى ۆيتسە-ءمينيسترى.

قازىرگى ۋاقىتتا ەگىس ناۋقانى وڭتۇستىك وڭىرلەردە باستالىپ كەتتى. وسىلايشا جامبىل وبلىسىندا 249،5 مىڭ گا نەمەسە جازدىق ەگىس الاڭىنىڭ 67%-ى، تۇركىستان وبلىسىندا – 167،5 مىڭ گا (25،5%)، الماتى وبلىسىندا – 97،1 مىڭ گا (15،6%)، قىزىلوردا وبلىسىندا - 23،9 مىڭ گا (17،6%) القاپتا ەگۋ جۇزەگە اسىرىلدى.

سونىمەن قاتار، پرەزيدەنتتىڭ تاپسىرماسىمەن «قاراپايىم زاتتار ەكونوميكاسى» باعدارلاماسى اياسىندا كوكتەمگى ەگىس جۇمىستارىن جۇرگىزۋگە قوسىمشا 100 ملرد تەڭگە ءبولىندى. سۋبسيديالاۋدى ەسەپكە الا وتىرىپ، سوڭعى سىياقى مولشەرلەمەسى قارىز الۋشىلار ءۇشىن جىلدىق 6% قۇرايدى.

بۇل شارۋالاردى تۇقىم، تىڭايتقىشتار، وسىمدىك قورعاۋ قۇرالدارىمەن، قوسالقى بولشەكتەرمەن قامتاماسىز ەتۋگە مۇمكىندىك بەرەدى.      

ءبىرىنشى ۆيتسە-ءمينيستردىڭ ايتۋىنشا، كارانتينگە جابىلعان وڭىرلەردە بارلىق سانيتارلىق-ەپيدەميولوگيالىق نورمالاردى ساقتالعان. شارۋاشىلىقتار مەن سەرۆيستىك كومپانيالار قىزمەتكەرلەردى جەكە قورعانىس قۇرالدارىمەن جانە انتيسەپتيكالىق قۇرالدارمەن قامتاماسىز ەتىلگەن.

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

ۇقساس جاڭالىقتار