ايماقتار • 08 ءساۋىر، 2020

جامبىل وبلىسىنىڭ اۋماعىنا كارانتين رەجيمى ەنگىزىلەدى

280 رەتكورسەتىلدى

بۇگىنگى تاڭدا جامبىل وبلىسىندا كوروناۆيرۋستىڭ 45 جاعدايى تىركەلىپ وتىر. ونىڭ ىشىندە 11 ادام شەكارالىق وتكىزۋ پۋنكتتەرىن كەسىپ ءوتۋ كەزىندە، 6 جولاۋشى ءۇندىستاننىڭ دەلي قالاسىنان كەلگەن اۋە رەيسىنەن انىقتالعان. تاراز قالاسىندا 5 وقيعا، قورداي اۋدانىندا 18، مەركى اۋدانىندا 2، شۋ، مويىنقۇم جانە جامبىل اۋداندارىندا ءبىر-ءبىر جاعدايدان تىركەلگەن. قاۋىپتى ىندەتتىڭ الدىن الۋ ماقساتىندا 9 ساۋىردەن باستاپ جامبىل وبلىسىنىڭ اۋماعىندا كارانتين رەجيمى ەنگىزىلەدى. بۇل تۋرالى بۇگىن جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ مالىمدەدى.

قازىرگى كەزدە پەريمەترى جانە وبلىس اۋماعى بويىنشا 27 بلوك-بەكەت ورناتىلعان. ونىڭ ىشىندە تاراز قالاسىندا 7 بلوك-بەكەت قويىلعان. بلوك-بەكەتتەردە پوليتسيا، مەديتسينا جانە اسكەري قىزمەتشىلەر قىزمەت اتقارۋدا.

وسى ورايدا بەكبولات ورىنبەكوۆ ءوڭىر جۇرتشىلىعىنا اعىمداعى جىلعى 9 ءساۋىر ساعات 00:00-دەن باستاپ جامبىل وبلىسىنىڭ اۋماعىندا جانە وبلىستىڭ بارلىق ەلدى مەكەندەرىنەن كەز-كەلگەن اۆتوكولىك قۇرالدارىنىڭ جانە ازاماتتاردىڭ كەلۋىنە جانە شىعۋىنا تىيىم سالىناتىنىن جەتكىزدى. مەديتسينالىق جانە سانيتارلىق-ەپيدەميولوگيالىق قىزمەت ماماندارى، اۆاريالىق-قۇتقارۋ جانە كوممۋنالدىق قىزمەتكەرلەر جۇمىسىن جالعاستىرا بەرەدى. بۇل قۇقىق قورعاۋ ورگاندارىنىڭ، فارماتسەۆتيكالىق كومپانيالاردىڭ جانە تاعى دا جاۋاپتى بىرقاتار مەكەمەلەرگە دە قاتىستى.

سونىمەن قاتار، كوكتەمگى ەگىس جانە باسقا دا اۋىل شارۋاشىلىعى جۇمىستارىن جۇرگىزۋ ءۇشىن قاجەتتى تۇلعالار مەن اۆتوكولىك قۇرالدارى دا جۇمىس ىستەيدى.

ال، جەرلەۋ ءراسىمى كەزىندە ءمايىتتى تاسيتىن تەحنيكا 3 بىرلىك كولىكتەن اسپاۋى كەرەك. بۇعان قاتىستى سالت-جورالعىلاردى اتقارۋ قىزمەتكەرلەرى مەن مارقۇمنىڭ جاقىندارىن قوسقاندا 10 ادامنان كوپ ەمەس بولۋى ءتيىس. ولارعا ءتيىستى انىقتاما قۇجاتتارى بولعان جاعدايدا رۇقسات ەتىلەدى.

سول سياقتى تۇرعىنداردىڭ تۇرعىلىقتى جەرىنە ورالۋى، اۆتوكولىك قۇرالدارىنا بايلانىستى دا ءتارتىپ بار. قوعامدىق كولىكتەردىڭ قوزعالىسى كەلىسىلگەن كەستەگە سايكەس  شەكتەلەدى. ولارعا جەكە قورعانىش زاتتارىمەن قامتاماسىز ەتىلگەن جاعدايدا عانا  رۇقسات بەرىلەدى.

تاكسي قىزمەتى ارنايى تىركەلگەن ۇيىمدارمەن، ءتيىستى ماتەريالدىق تەحنيكالىق سانيتارلىق گيگيەنالىق جاعدايمەن قامتاماسىز ەتىلگەن اۆتوكولىك قۇرالدارىندا عانا كورسەتىلەدى.

جانارماي قۇيۋ ستانتسيالارى، قارجى ينستيتۋتتارى، بانكتەر، بانكتىك ايىرباستاۋ پۋنكتتەرىنىڭ شتاتتىق رەجيمدە جۇمىس ىستەۋىنە رۇقسات ەتىلەدى.

ازىق-ت ۇلىك تاۋارلارىن، دارىلىك پرەپاراتتاردى جانە مەديتسينالىق بۇيىمداردى ساتىپ الۋ، مەديتسينالىق كومەككە جۇگىنۋ، ءۇي جانۋارلارىن تىركەۋ دەرەكتەرى بويىنشا تۇرعىلىقتى مەكەنجايى ماڭىندا سەرۋەندەۋ، (ونىڭ ءوزى 30 مينۋتتان اسپاۋ كەرەك)، مەملەكەتتىك جانە الەۋمەتتىك كومەك الۋ ماقساتىندا مەملەكەتتىك جانە وزگە دە مەكەمەلەرگە بارۋ، كۇتپەگەن توتەنشە جاعداي جانە ادامنىڭ ءومىرى مەن دەنساۋلىعىنا قاۋىپ توندىرەتىن باسقا دا جاعدايلار بولعان جاعدايدى قوسپاعاندا جامبىل وبلىسىنىڭ اۋماعىندا ادامداردىڭ جانە جەكە كولىكتىڭ ەركىن ءجۇرىپ-تۇرۋىنا تىيىم سالىنادى.

 

جامبىل وبلىسى

 

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار