قوعام • 07 ءساۋىر، 2020

بەتپەردە كيگەن كوكتەم - 6

181 رەتكورسەتىلدى

كۇشەيتىلگەن كارانتين. سيرەك بىتكەن تال-داراق، سەتىنەۋىك بۇلتتار، سىرعاقتاي جاۋعان سەبەلەك سۋىق جاڭبىر، سۇرعىلت كۇن، ساباۋ قامشىداي سىلتەلگەن سارتىلداق جەل... سەبەپسىزدەن-سەبەپسىز جىلاعىڭ كەلەدى.

ءوزىڭنىڭ، ءوزىڭنىڭ عانا ەمەس، بۇكىل ادامزاتتىڭ سونشا قورعانسىز، شاراسىز ەكەنىن سەزىنۋ، مومىن كىسىنىڭ ءبىر سوقپاسى سەكىلدى ءجۇز جىل سايىن اينالىپ سوعىپ وتىرعان ىندەت، تۇتاس عالامنىڭ تۇپكى ءمانىن بىلۋگە ۇمتىلعاندا توزاڭنىڭ جايىن ۇعا الماعان سانا، سونىڭ ءبارىن ويلاساڭ، ءبىر قايعى قايقى قىلىشتاي جۇرەگىڭە باتادى. اسپانعا قاراپ تۇرعان العاشقى ادام ءتارىزدى.

العاشقى ادامدار سەكىلدى، ولدۋۆايعا دەيىنگى، ءبىز ءوز ۇڭگىرلەرىمىزدەن تۇزگە ۇركە قارايمىز. تابيعاتتىڭ توسىن قۇبىلىستارى، جىرتقىش اڭدار، ۋلى جەمىستەر... بەيمالىم، ۇرەيلى، بوتەن دۇنيە. ىرىققا كونبەس، ىمىراعا كەلمەس ۋاقىتتىڭ ءار كەزەڭىن ىقتاپ ءجۇرىپ، سودان بەرى دە مىڭجىلدىقتاردىڭ قاراڭعى ورماندارىن، سۋىق وزەندەرىن كەشىپ وتتىك. بىراق بويىمىزدا سول ۇرەي، ويىمىزدا – تاعى دا سول بايمالىمدىك قالىپ كەتتى. بولجاپ بولماس بۇل الەمنىڭ قاي سىرىنا قانىعىپ، قاي جۇمباعىن شەشە الدىق ەكەن؟!

فرەنسيس بەكون، جاڭا ورگانوندا، ادام زەردەسى مىنا دۇنيەدەگى زاتتاردىڭ بولمىس-تابيعاتىنا ءوزىنىڭ تابيعاتىن ارالاستىرىپ، ولاردىڭ انىق بەينەسىن ب ۇلىڭعىر ەتىپ، بۇزىپ كورسەتەتىن قيسىق ايناعا ۇقسايتىنىن ايتادى. راسىندا، ءبىزدىڭ ارقايسىمىزدىڭ دۇنيەتانىمىمىز، قورشاعان الەمدى قابىلداۋىمىز سان قيلى، الۋان اۋاندى. ءبىر عانا ورتاق نارسە، وزگەرمەس، قۇبىلماس، جوعالماس ۇرەي.

تابيعاتتاعى زاتتاردىڭ ءوز زاڭدىلىعىنا باقساق، ۆيرۋس تا ءتىرى اعزا. ونىڭ دا ءومىر سۇرگىسى كەلەدى. ونىڭ دا كۇن استىنداعى ءوز ورنىن تاپقىسى كەلەدى. ول دا بيولوگيالىق ءتۇر. بىراق، ول ءومىر ءسۇرۋ ءۇشىن وزگەنى مانسۇقتايدى. ءبىز شە؟ ءبىز دە وزگەنى مانسۇقتاماي ءومىر سۇرە الامىز با؟ كەيدە جەر-انا ءبىزدى دە ۆيرۋس سەكىلدى قابىلداماي ما ەكەن؟

بەتپەردە كيگەن كوكتەم. تاعى دا سول  بەكون ء«اربىر ادامنىڭ تابيعاتتىڭ جارىعىن السىرەتەتىن ءوز ۇڭگىرى بار» دەيدى. ەرەكشە ۇڭگىر. العاشقى ادامنىڭ ۇرەي ۇڭگىرى سەكىلدى. شابلوندار مەن ستەرەوتيپتەردىڭ، مويىنداماۋلار مەن قارسىلىقتاردىڭ، ءتان الماۋشىلىق پەن مەنمەندىكتىڭ، ىڭعايلىلىق پەن جايلىلىقتىڭ ۇڭگىرى. سول ۇڭگىرلەردەن تاعى دا تابيعاتقا ۇركە كوز تاستاپ تۇرمىز.

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار