ايماقتار • 06 ءساۋىر، 2020

شىمكەنتتە COVID-19 ۆيرۋسىن جۇقتىرعاندارعا گوسپيتال سالىنۋدا

133 رەتكورسەتىلدى

الەمدى ۇرەي قۇشاعىنا العان كوروناۆيرۋس پاندەمياسى ەلىمىزدى دە ءبىراز ابىگەرگە سالدى. مەملەكەتتىك دەڭگەيدەگى ساقتىق شارالارى ارقىلى اتى جامان ىندەتتىڭ كومەيىنە جۇتىلىپ كەتپەدىك. دەگەنمەن، دەرتتىڭ دۇربەلەڭىندە وتاندىق مەديتسينا سالاسىنىڭ كەيبىر كەمشىن تۇستارى مەن توتەنشە جاعداي قىزمەتىنىڭ بەيعامدىعى كوزگە كورىنىپ-اق قالدى.

ءبىرىنشى كەزەكتە توتەنشە جاعداي كەزىندە ناۋقاستاردى قابىلدايتىن گوس­پيتال جەتىسپەۋشىلىگى ءىرى ورتالىقتاردا بايقالىپ جاتتى.

دەگەنمەن، ەل پرەزيدەنتىنىڭ شۇعىل تاپسىرماسىمەن الماتى، شىمكەنت قالالارىندا گوسپيتال قۇرىلىسى باس­تالىپ كەتتى. توتەنشە جاعداي كەزىندە ناۋقاستاردى قابىلدايتىن گوسپيتال تەز قۇراستىرىلاتىن ماتەريالداردان تۇرعىزىلماق. وعان تۇگەلدەي وتاندىق قۇرىلىس ونىمدەرى پايدالانىلماق. ءتىپتى 400-گە جۋىق جۇمىسشى جەرگىلىكتى جەردەن تارتىلعان. ەلدەگى اۋىر جاعداي كەزىندە قولعا الىنعان قۇرىلىس جۇ­مىسىمەن تانىسقان قالا اكىمى مۇرات ايتەنوۆ سالا باسشىلارىنا كارانتين كەزىندە جۇمىسشىلاردى ارنايى اۆتوبۋسپەن تاسىمالداۋ، قاۋىپسىزدىك شارالارىن ساقتاۋ كەرەكتىگىن ايتتى.

سونداي-اق كارانتين كەزىندە اۋىر جۇك كولىكتەرىنىڭ تاۋلىك بويى قۇرىلىس زاتتارىن توقتاۋسىز جەتكىزۋ ماسەلەسىندە كەدەرگى بولماۋىن جۇكتەدى.

شاھاردا سالىنىپ جاتقان ارنايى اۋرۋحانا ستاتسيونار، جانساقتاۋ سىندى بىرنەشە بولىكتەن تۇرادى. جانە وندا مەديتسينا قىزمەتكەرلەرى جاتىپ جۇمىس ىستەيتىن جاي سالىنىپ، وعان قاجەت ماماندار ىرىكتەلىپ الىنباق.

بۇل رەتتە ۋاقىتشا اۋرۋحانانىڭ جابدىقتالۋى مەن سانيتارلىق-ەپي­دەميالىق جاعدايى بەل­گىلەن­گەن نورماتيۆتەرگە تولىق ساي بولادى. مۇنداعى بۇكىل ۇيىمداستىرۋ جۇمىس­تارىن شىم­كەنت قالالىق جۇقپالى اۋرۋلار اۋرۋحاناسى ۇيلەستىرمەك.

«شىمكەنتتە قۇرىلىسى باستالعان 200 ورىندىق مودۋلدىك ينفەكتسيالىق گوسپيتال ءبىرىنشى كەزەكتە ميلليون تۇرعىنى بار قالامىزدىڭ قاۋىپسىزدىگىن قامتاماسىز ەتۋ ءۇشىن قاجەت. وسىنداي جەدەل شەشىم قابىلداۋ ارقىلى بۇل قۇرىلىس COVID-19 پاندەمياسىنىڭ ءورشۋىن توقتاتۋ ماقساتىندا ىسكە اسىرىلىپ جاتىر. مودۋلدىك گوسپيتال سانيتارلىق-ەپيدەمييالىق تالاپتارعا ساي، قالا قۇرىلىسى نورماتيۆتەرى مەن ارحيتەكتۋرالىق زاڭناما تولىقتاي ساقتالعان. بۇل تۇرعىندارعا قاۋىپتى ەمەس. گوسپيتال ينفەكتسيالىق اۋرۋلاردىڭ الدىن الۋدى جاقسارتاتىن بولادى»، دەيدى قالالىق جۇقپالى اۋرۋلار اۋرۋ­حاناسىنىڭ باس دارىگەرى امانگەلدى ەرگەشبەك ۇلى.

انىعىندا وسىعان دەيىن شاھاردىڭ قاق ورتاسىندا ورنالاسقان تۋبديسپانسەر مەن ينفەكتسيالىق اۋرۋحانا قالا تۇرعىندارىنىڭ ءبىراز مازاسىن الىپ كەلگەن بولاتىن. اۋا ارقىلى تەز تارالاتىن اۋرۋلاردىڭ جۇعۋىنا الاڭداعان شىمكەنتتىكتەر جەرگىلىكتى بيلىككە تالاي مارتە شاعىمدانعان ەدى.

سوڭعى جىلدارى وسى تۇيتكىلدى شەشۋ ءۇشىن قالا اكىمدىگى شىمكەنتتىڭ ىرگەسىنەن دەنساۋلىق ساقتاۋ سالاسىنا ارنالعان عيمارات تۇرعىزىپ، ورتالىقتا ورىن تەپكەن اۋرۋحانالاردى قالا ىرگەسىنە كوشىرەتىن بولىپ كەلىسكەن-تۇعىن. مىنە، سول سوزبالاڭعا سالىنىپ كەلە جاتقان ماسەلەنىڭ نۇكتەسى قويىلاتىن كۇن دە الىس ەمەس. ءبىرىنشى كەزەكتە، كوروناۆيرۋس پاندەمياسى دا تىزگىندەلەدى. ماسەلەن، نۇر-سۇلتان قالاسىنىڭ ورتالىعىنداعى الەمگە ايگىلى «Hilton» قوناقۇيى ىندەتپەن كۇرەسۋشى دارىگەرلەر مەن ۆيرۋس جۇقتىرعانداردى ەمدەۋ ءۇشىن بەرىلىپ وتىر. كۇنى ەرتەڭ توتەنشە جاعداي اياقتالعاننان كەيىن قوناقۇي ءوز قىزمەتىن جالعاستىرا بەرەدى دەگەن ءسوز. دەمەك، شىمكەنتتەگى ينفەكتسيالىق گوسپيتال كارانتين جاعدايىنان سوڭ دا قالادا باسى اۋىرىپ، بالتىرى سىزداعاندارعا قىزمەت ەتە بەرەرى انىق.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • بۇگىن، 20:12

ەكى قىلمىستىق توپ ۇستالدى

ايماقتار • بۇگىن، 17:45

بالالار ۇيىندەگى ىزگىلىك شاراسى

ايماقتار • بۇگىن، 15:47

ەلتاڭبا تاريحى تالقىلاندى

رۋحانيات • بۇگىن، 14:54

ۇقساس جاڭالىقتار