ايماقتار • 05 ءساۋىر، 2020

قاراعاندى وبلىسىندا 7 ساۋىردەن باستاپ كارانتين كۇشەيتىلەدى

329 رەتكورسەتىلدى

قاراعاندى وبلىسىندا كوروناۆيرۋس ينفەكتسياسىنىڭ تارالۋ گەوگرافياسىنىڭ ۇلعايۋىنا بايلانىستى 7 ساۋىردەن باستاپ كارانتين رەجيمىن كۇشەيتۋ بويىنشا قوسىمشا شارالار ەنگىزىلەدى، دەپ حابارلادى وبلىستىڭ باس مەملەكەتتىك سانيتارلىق دارىگەرى قانات اسقاروۆ.

ياعني 2020 جىلدىڭ 7 ءسا­­­ۋىرى كۇنى ساعات 00:00-دەن باس­­تاپ قاراعاندى وبلىسى­نىڭ كارانتيندىك ايماعى­نا كىرۋگە جانە ودان شىعۋعا تى­يىم سالىندى. كاران­تين­نىڭ ايرىقشا ءتارتىبى قارا­عان­دى، اباي، ساران، تەمىر­تاۋ جانە شاحتينسك قالا­لارىنا، سون­داي-اق بۇقار جىراۋ اۋدا­نىنىڭ دوسكەي، ۇشتوبە، بوتاقارا، عابيدەن مۇستافين اتىنداعى اۋىل، پەتروۆكا سياقتى بىرنەشە ەلدى مەكەنىنە ەنگىزىلەدى.

ناقتىراق ايتقاندا، بۇل ەلدى مەكەندەردىڭ تۇر­عىن­دارىنا ءۇي-جايلارىنان شىعۋعا تىيىم سالىنادى. تۇرعىندار، ۇيدەن جۇمىسقا، دۇكەنگە نەمەسە دارىحاناعا (تۇرعىلىقتى جەرىنەن 1 500 مەتردەن اسپايتىن راديۋستا ورنالاسقان)، شۇعىل جاعدايدا مەديتسينالىق مەكەمەلەرگە بارۋ ءۇشىن، ءۇي جانۋارلارىن سەرۋەندەتۋگە (ۇيدەن 500 مەتردەن اسپاۋى ءتيىس ءارى كارانتيندىك ءۇيدىڭ تۇرعىنى بولماۋى ) جانە قاجەت بولعان جاعدايدا مال دارىگەرلىك كلينيكاعا بارۋ ءۇشىن عانا شىعا الادى. سونداي-اق بانكتىك وپەراتسيالار جاساۋ نەمەسە جانارماي ساتىپ الۋ ءۇشىن شىعۋعا رۇقسات بەرىلەدى.

– كارانتيننىڭ ەرەكشە ءتارتىبى ەنگىزىلگەن اۋماقتا قا­لالار مەن اۋدانداردىڭ تى­نىس-تىرشىلىگىن قامتاماسىز ەتەتىن مەكەمەلەردىڭ عانا جۇ­مىسى جالعاسادى. باسقا ۇيىمداردىڭ بارلىعى قىز­مەتىن ۋاقىتشا توقتاتادى. سون­داي-اق كاسىپورىندار ءوز قىزمەتكەرلەرىن جۇمىسقا مىندەتتى سانيتارلىق وڭدەۋ شارتى ورىندالعان قىزمەتتىك كولىكپەن عانا جەتكىزە الادى. جۇمىس ۋاقىتى اياقتالعان سوڭ ولاردى قايتا ۇيلەرىنە جەتكىزۋلەرى ءتيىس، – دەدى قانات اسقاروۆ.

كارانتيننىڭ ەرەكشە ءتارتىبى ەنگىزىلگەن ەلدى­ مە­كەن­دەر اۋماعىنداعى جولاۋ­شى تاسىمالى قالانىڭ ىشىن­دە جانە سىرتقى جولدارىن­دا تولىق توقتاتىلادى. تەك سانيتارلىق نورمالار قاتاڭ ساقتالعان رەسمي تاكسي قىز­مەتىن پايدالانۋعا عانا رۇق­سات بەرىلەدى. ونىڭ وزىندە، كو­لىك­تە تەك ءبىر عانا جولاۋشى بولۋى ءتيىس.

تاعى ءبىر ايتا كەتەتىن جايت، جەرلەۋ راسىمدەرىنە دە ەرەك­شە تالاپتار قويى­لادى. ماسەلەن، جانازاعا مار­قۇم­نىڭ جاقىن تۋىستارى عانا قا­تىس­تىرىلادى. ءارى ولاردىڭ سانى شەكتەلگەن: 10 ادامنان اسپاۋى ءتيىس جانە ولار جەرلەۋ كەزىندە ءبىر-بىرىنەن 2 مەتر قاشىقتا تۇرۋى كەرەك. 

 

قاراعاندى وبلىسى

 

 

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار