ايماقتار • 05 ءساۋىر، 2020

شىمكەنت: بانكتەردىڭ قىزمەتى ەلەكتروندى تولەم جۇيەسى ارقىلى جۇرگىزىلەدى

37 رەتكورسەتىلدى

بۇل تۋرالى اقپاراتتىق-كوممۋنيكاتسيالىق ورتالىقتا وتكەن بريفينگتە شىمكەنت قالاسى اكىمىنىڭ ورىنباسارى ماقسۇت يساحوۆ ايتتى.

سونداي-اق بريفينگتە «حالىق بانكى» اق شىمكەنت وڭىرلىك فيليالى ديرەكتورىنىڭ ورىنباسارى ايجان دوسىمبەكوۆا، «بانك حوۋم كرەديت» شىمكەنت قالاسى فيليالىنىڭ ديرەكتورى احاتاي تىلەۋكەەۆ توتەنشە جاعداي كەزىندەگى بانك قىزمەتتەرى مەن بانكوماتتاردىڭ جۇمىسى تۋرالى باياندادى.

– قازىرگى تاڭدا قالا اۋماعىنداعى بانك بولىمشەلەرىندە جانە بانكوماتتاردىڭ الدىندا تۇرعىندار زەينەتاقى، جاردەماقى، جالاقى الۋ ءۇشىن كوپتەپ شوعىرلانۋدا. ول جەرلەردە ۇزىن-سونار كەزەك ورىن الادى. بۇل كوروناۆيرۋس ىندەتى جايلاعان كەزدە اسا قاۋىپتى. سوندىقتان قالاداعى بانك باسشىلارىمەن كەلىسىم ناتيجەسىندە بارلىق تولەمدەر ونلاين نەمەسە ءموبيلدى قوسىمشامەن، ياعني ەلەكتروندى تولەم جۇيەسى ارقىلى جۇزەگە اسپاق. بازارلار مەن ساۋدا جانە قىزمەت كورسەتۋ ورىندارى تۇتىنۋشىلارعا ەلەكتروندى تولەم جۇيەسى بويىنشا قىزمەت كورسەتەدى. بانكتىك كارتاسى جوق ازاماتتار بانكتەرگە قوڭىراۋ شالۋ ارقىلى نەمەسە ونلاين تاپسىرىس بەرە الادى. بارشا تۇرعىنداردى وسىمەن جۇمىس ىستەۋگە شاقىرامىز. بۇل تۇرعىنداردىڭ قاۋىپسىزدىگى ءۇشىن قاجەت. وسى باعىتتا الداعى دۇيسەنبىدەن باستاپ ەكىنشى دەڭگەيلى بانكتەردىڭ جۇمىسى جانداناتىن بولادى، - دەدى قالا اكىمىنىڭ ورىنباسارى.

قيىن-قىستاۋ كەزەڭدە بانك بولىمشەلەرى جۇمىستارىن شيراتىپ، ساقتىق شارالارىن كۇشەيتكەن. ماسەلەن، Kaspi Bank شىمكەنت قالاسىندا ارنايى 4 كارتومات ورناتقان. وندا الدىن الا ءوتىنىم بەرىپ، سول ارقىلى بانك كارتوچكاسىن الۋعا بولادى. سونداي-اق «قازپوشتا» اق جاسى 65-تەن اسقاندار مەن مۇگەدەك ازاماتتارعا زەينەتاقىسىن ۇيىنە جەتكىزىپ بەرۋ قىزمەتىن ۇسىنادى.

ماقسۇت پەرنەباي ۇلىنىڭ ايتۋىنشا، قالادا بانك قىزمەتكەرلەرى دە كۇشەيتىلگەن تۇردە جۇمىس اتقارۋدا. قاۋىپتى ىندەتتىڭ دەندەپ تۇرعان كەزىندە بارىنشا ساق بولۋ كەرەكتىگىنە ءمان بەرۋدە. بولىمشەدە كەزەك كۇتكەن تۇتىنۋشىلار اراسىندا 1 مەتر قاشىقتىق ورىن الۋى ءتيىس. ال، كوشەلەردە ورنالاسقان بانكوماتتارعا اكىمشىلىك تاراپىنان 100 ەرىكتى جۇمىلدىرىلعان. ولار تۇرعىنداردى تالاپقا ساي كەزەككە تۇرعىزىپ، قۇرىلعىدان اقشالارىن الۋعا كومەكتەسەدى. ال ءار بانكوماتتا 1 پوليتسەي كوپشىلىككە تۇسىندىرمە جۇمىستارىن جۇرگىزىپ، ءتارتىپتى قاداعالايدى.

 
شىمكەنت
سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

ۇقساس جاڭالىقتار