قوعام • 05 ءساۋىر، 2020

اقتوبە وبلىسى: توتەنشە جاعداي ەرىكتىلەرگە دە جاۋاپكەرشىلىك جۇكتەيدى

157 رەتكورسەتىلدى

پاندەميانىڭ ءزىل-باتپان اۋىر سالماعى ەلىمىزدەگى ەرىكتىلەر قوزعالىسىنىڭ وكىلدەرىنە جاڭا، تىڭ شەشىمدەردى قابىلداۋدى قاجەت ەتەتىنى انىق. وسى ورايدا ولار بۇعان دەيىن ازىرلەگەن جوبالارى مەن ءىس-جوسپارلارىن توتەنشە جاعداي تالاپتارىنا سايكەستەندىرۋ ۇستىندە. وسى رەتتە اقتوبە قالاسىندا ەرىكتىلەر قاتارىنان ارنايى شتاب قۇرىلىپ، ونىڭ مۇشەلەرى جاۋاپتى ىستەردىڭ بەل ورتاسىندا جۇرگەنىن ايتۋ پارىز.

ولار قازىرگىدەي كەزدە قامقورلىق پەن كومەكتى قاجەت ەتەتىن قوعامنىڭ وسال توپتارىنا كومەك كورسەتۋدە. سونىمەن بىرگە تۇرعىندار اراسىندا ىندەتىڭ الدىن الۋ مەن ودان ساقتانۋعا قاتىستى جان-جاقتى ءتۇسىندىرۋ جۇمىستارىن جۇرگىزۋدە. شتاب مۇشەلەرى تاراپىنان اقپاراتتىق پاراقشالار ازىرلەنىپ تاراتىلۋدا. ۆولونتەرلەردىڭ ءوز قولدارىمەن تىگىپ، تۇرعىندارعا تەگىن بەرىلگەن مەديتسينالىق بەتپەردەلەر دە ريزاشىلىق سەزىمىن تۋعىزدى. مۇنداي جىلى پىكىرگە مۇقتاج جاندارعا شتاب مۇشەلەرىنىڭ قولىمەن جەتكىزىلىپ بەرىلگەن ازىق-ت ۇلىك جيىنتىعى مەن گەگيەنالىق قۇرالدارعا قاتىستى ايتۋعا دا بولادى.

اقتوبە وبلىستىق جاستار رەسۋرستىق ورتالىعىنىڭ باسشىسى گۇلنار قابيەۆانىڭ ايتۋىنشا، ۆولونتەرلەردىڭ قايىرىمدىلىققا تولى ءىس-قيمىلدارى تۇتاستاي ءوڭىر بويىنا كورىنىس تابۋدا.

- وبلىس اۋداندارى اراسىندا ونىڭ باستى لەگىن 19 توپتان قۇرالعان شالقار اۋدانىنىڭ ۆولونتەرلەرى باستاپ كەلەدى. ايماقتاعى ءاربىر ەرىكتىلەر توبىنىڭ وزگەنى قايتالاي بەرمەيتىن وزىندىك ءىس-جوسپارلارى بار. بۇلار قوعامدىق ءومىردىڭ سان-ءتۇرلى باعىتتارى بويىنشا قۇرىلعان. ايتسە دە ولاردىڭ ءبارىنىڭ الدىنا قويعان ماقساتتارى ورتاق. بۇل قيىن جاعدايعا تاپ بولعان الەۋمەتتىك توپتارعا قول ءۇشىن بەرۋ، - دەيدى شالقار اۋداندىق جاستار رەسۋرستىق ورتالىعىنىڭ جەتەكشىسى جاننا ابدەنوۆا.

بۇدان بولەك وبلىس اۋماعىندا قىزىلاي قوعامى وبلىستىق فيليالىنىڭ ۆولونتەر جاستارى مەن «Antikor» ورتالىعىنىڭ وكىلدەرى قايىرىمدىلىق قاعيداتتارىن ويداعىداي ورىنداپ جۇرگەنى دە وڭ پىكىرگە ابدەن لايىقتى. قازىرگى كەزدە وبلىس اۋماعىندا بەلگىلەنگەن ايىرىقشا رەجيمدەگى شەكتەۋ شارالارىنا بايلانىستى جەتى بلوك-بەكەت جاساقتالدى. ەرىكتىلەر وسى ورىنداردا كۇندىز-ءتۇنى جۇمىس ىستەپ جۇرگەن ماماندارعا كومەك بەرۋگە دە ءبىر كىسىدەي جۇمىلعان.

بۇل باعىتتا م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىنىڭ جاس دارىگەر-رەزيدەنتتەرىنەن قۇرىلعان ۆولونتەرلەر توبى ناعىز ەرلەر مەن قاھارماندارعا ءتان ءىس-ءويمىل تانىتۋدا. ءار اۋىسىمدا 14 ادامنان تۇراتىن ەرىكتىلەردىڭ جۇمىس ءتارتىبى وتە تىعىز، ءارى ھتە كۇردەلى. ولاردىڭ باستى مىندەتتەرى بەلگىلەنگەن نۇسقاۋلىققا سايكەس رۇقسات ەتىلگەن جۇرگىزۋشىلەر مەن كاسىپكەرلەرگە ارنايى قىزمەت توپتارى مۇشەلەرىنە جانە ترانزيتتىك تۇرعىنداردى مەديتسينالىق تەكسەرۋلەردەن وتكىزىپ، قىزۋىن ولشەۋ ءارى وزگە دە كلينيكالىق وزگەرىستەردى بايقاۋ بولىپ وتىر.

ولاردىڭ جيناعان اقپاراتتارى ءوز كەزەگىندە تاۋارلارمەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ماماندارىنا جولدانادى. ماسەلەنىڭ ارعى جاعى بەكىتىلگەن حاتتاما بويىنشا شەشىمىن تابادى.

ايتالىق، دارىگەر ەرىكتىلەردىڭ ءبىرى رۋسلان اراقباەۆ اقتوبە-اتىراۋ اۆتوتراسساسى باعىتىندا قويىلعان بلوك-بەكەتتە تۇتاستاي تاۋلىك بويى ەكى ادامنان كەزەكشىلىككە تۇراتىنىن ايتىپ بەردى. جاس دارىگەر-رەزيدەنت وتباسىن قۇرعان، جاس سابيلەرى بار.

- رۋسلان، ءوز باسىڭدى بولۋى مۇمكىن قاۋىپ-قاتەرگە تىگىپ، بلوك-بەكەتكە مەديتسينالىق كەزەكشىلىك جاساۋعا بەل بۋعان ەكەنسىڭ. بۇل شەشىمگە اتا-اناڭ مەن زايىبىڭ قالاي قارادى؟ - دەدىك ءبىز جاس دارىگەر-ۆولونتەرگە.

ول بۇل ساۋالىمىزعا توسىلماي، تومەندەگىشە جاۋاپ قايتاردى.

- ارينە، ولار قازىرگى قىزمەتىمە قاتتى الاڭدايدى. ايتسە دە تۇتاستاي ەلىمىزگە قاۋىپ-قاتەر ءتوندىرىپ وتىرعان ىندەت كەزىندە وسىنداي شەشىم الۋدى ازاماتتىق پارىزىم دەپ ەسەپتەدىم. كوروناۆيرۋس ينفەكتسياسى تارالۋىن نەعۇرلىم تەزىرەك تەجەسەك، قالىپتى ومىرگە سوعۇرلىم جاقىنداي تۇسەمىز. بۇعان ەشقانداي كۇمانىم جوق. وسىنداي وتە كۇردەلى كەزەڭدە ءبىز  جاي عانا باقىلاۋشى بولىپ قالعىمىز كەلمەدى.

بۇل - ارلى ءسوز، ءتالىمدى دە تاعىلىمدى توقتام. جاس جىگىتتىڭ جۇرەگىنىڭ قالاۋى ەكەنىنە شەك كەلتىرە المايمىز.  رۋسلانىڭ وي-تۇجىرىمىنا سايساق، وزدەرىمەن بىرگە بلوك-بەكەتتەردە ۋاقىتپەن ساناسپاي كەزەكشىلىكتە جۇرگەن پوليتسيا مەن اسكەري قىزمەتشىلەر، سانيتارلىق دارىگەرلەر مەن دەزينفەكتور ماماندار، اتقارۋشى بيلىك وكىلدەرى دە ءدال وسىلاي ويلايدى. كەزەكشىلىك كەزىندە بىزدەر ءبىر-بىرىمىزبەن تەز ورتاق ءتىل تابىسىپ كەتتىك. ارامىزدا ەشقانداي تۇسىنبەستىك پەن وكپە-رەنىش تۋىنداعان ەمەس. ارقايسىمىز ءوزىمىز اتقاراتىن مىندەتتەردى تەرەڭ سەزىنىپ ءجۇرمىز دەپ ايتقىم كەلەدى. الداعى ۋاقىتتا دا ءدال سولاي بولا بەرەتىنىنە سەنىمىم مول دەپ تۇيىندەدى ول ءوز ويىن.

ەلىمىزدىڭ ءار ازاماتى ءوزىنىڭ الەۋمەتتىك جاۋاپكەرشىلىگىن جاس ۆولونتەر دارىگەر-رەزيدەنت رۋسلانشا سەزىنە السا، اتىڭ وشكىر كوروناۆيرۋس ىندەتىن سوعۇرلىم تەزىرەك جەڭىپ شىعاتىنىمىز انىق.

 

اقتوبە وبلىسى

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار