ايماقتار • 04 ءساۋىر، 2020

قاراعاندى وبلىسى ونلاين-وقىتۋعا دايىن

21 رەتكورسەتىلدى

قاراعاندى وبلىسى اكىمىنىڭ ورىنباسارى ابزال نۇكەنوۆ پەن ءبىلىم بەرۋ باسقارماسىنىڭ باسشىسى ەسەنعازى يمانعاليەۆ تىكەلەي ەفيرگە شىعىپ، وبلىستىڭ قاشىقتان وقىتۋ تاسىلىنە كوشۋگە دايىن ەكەنىن مالىمدەدى.

وقۋشىلاردىڭ باسىم بولىگى ءىV توقساندى ونلاين رەجيمىندە باستايدى. بۇل باعىتتا ولار گادجەتتەرمەن جانە ينتەرنەتكە قولجەتىمدىلىكپەن قامتاماسىز ەتىلىپتى.

ال الىس اۋىلدارداعى شاعىن مەكتەپتەر بۇرىنعىشا جۇمىس ىستەي بەرەتىن كورىنەدى. بۇل ساناتقا ەنەتىن 123 ءبىلىم وشاعىندا 7 624 بالا وقيدى ەكەن. ءتورتىنشى توقسان باستالىسىمەن، اتالعان مەكتەپتەر ەكى اۋىسىمدا جۇمىس ىستەيتىن بولادى. سىنىپتاردىڭ تولىمدىلىعىنا قاراماستان، كابينەتتىك جۇيە الىنىپ تاستالادى. بۇدان بولەك، بۇل مەكتەپتەردەگى سانيتارلىق رەجيم كۇشەيتىلەدى.

– ءساۋىردىڭ 6-نان باستاپ وقۋشىلار اراسىندا قاشىقتان وقىتۋ باستالادى. بۇل قازاقستان ءۇشىن، ءبىز ءۇشىن تىڭ تاجىريبە. سوندىقتان، ءبىز وسى جاڭالىققا، اسىرەسە، اتا-انالار تاراپىنان تۇسىنىستىكپەن قاراۋدى سۇرايمىز. ءدال قازىرگى ۋاقىتتا اتا-انالاردىڭ باستى مىندەتى – بالالارمەن، مەكتەپپەن جانە مۇعالىمدەرمەن بىرگە اقپارات پەن ءبىلىمنىڭ پايدالى جانە ءونىمدى كوزدەرىن ىزدەۋ جانە قولدانۋ دەپ ويلايمىن. بۇل باعىتتا ءبىز بىرلەسىپ جۇمىس ىستەۋىمىز كەرەك. قۇرمەتتى اتا-انالار، ءبىز بىرگەمىز! وسى قيىندىقتاردى بىرگە وتكەرەمىز. ەڭ باستىسى – وزدەرىڭىز بەن جاقىندارىڭىزدىڭ دەنساۋلىعىنا جاۋاپكەرشىلىكپەن  قاراپ،  كارانتيننىڭ بارلىق تالاپتارىن ساقتاڭىزدار، – دەدى ابزال نۇكەنوۆ.

وبلىستىق ءبىلىم بەرۋ باسقارماسىنىڭ باسشىسى ەسەنعازى يمانعاليەۆ وڭىردەگى ونلاين-وقىتۋ جۇيەسىنىڭ قالاي ىسكە اسىرىلاتىنى تۋرالى ايتىپ بەردى.

– وبلىستاعى 187 198 وقۋشى، ياعني جالپى ساننىڭ 94%-ى ينتەراكتيۆتى پلاتفورمالاردا وقيتىن بولادى. بۇل ساناتتاعى بالالار كومپيۋتەرلەرمەن، گادجەتتەرمەن جانە ينتەرنەت جەلىسىنە قوسىلۋ مۇمكىندىگىمەن تولىق قامتاماسىز ەتىلگەن. وقۋشىلاردىڭ 2% نەمەسە 4 619 بالا ءۇشىن قاشىقتان وقىتۋ «ەل ارنا» جانە «بالاپان» رەسپۋبليكالىق ارنالارىندا تەلەۆيزيالىق ساباقتار ارقىلى ۇيىمداستىرىلادى. بۇل ساباقتار تەك تەلەارنالاردا عانا ەمەس، ينتەرنەتتە دە، راديودا دا قولجەتىمدى بولادى، – دەدى ول.

سونداي-اق ەسەنعازى يمانعاليەۆ تەلەساباقتار ارقىلى ءبىلىم العان وقۋشىلارعا ماتەريالدار مەن تاپسىرمالار پوشتامەن جىبەرىلەتىنىن اتاپ ءوتتى.

قاراعاندى وبلىسىندا مەكتەبى جوق 125 اۋىل بار ەكەن. وندا تۇراتىن 2 105 وقۋشىنىڭ 1 477-ءى قاشىقتان ءبىلىم الاتىن بولدى. بۇگىنگى كۇندە ولار گادجەتتەرمەن جانە ينتەرنەتكە قولجەتىمدىلىكپەن قامتاماسىز ەتىلگەن. سونىمەن قاتار، 105 بالا وقۋدى تەلەديداردىڭ كومەگىمەن جالعاستىرادى، ال ولارعا تاپسىرمالار پوشتا ارقىلى جىبەرىلەدى. تاعى 453 وقۋشى جاقىن ماڭداعى اۋىلدارداعى مەكتەپتەرلە وقيتىن بولادى. 70 بالا تۋىستارىنا ۋاقىتشا كوشىرىلىپ، ولاردىڭ 15-ءى قاشىقتان جانە 55-ءى ءداستۇرلى تۇردە ءبىلىم الادى.

قاشىقتان وقىتۋ كەزەڭىندە ايماقتىڭ ينتەرنەت-پروۆايدەرلەرىمەن ارادا پايدالانۋشىلاردى نولدىك تەڭگەرىمدە بولسا دا جەلىدەن اجىراتپاۋ تۋرالى  كەلىسىم بار. سونىمەن قاتار، BilimMediaGroup جانە DarynOnline ءبىلىم بەرۋ پلاتفورمالارىنا كىرۋ تەگىن بولادى.

سپيكەرلەردىڭ ايتقانىنا سەنسەك، قازىرگى ۋاقىتتا وبلىس بويىنشا 12 مىڭ وقۋشى مەن 2 مىڭ ۇستاز گادجەتتەرمەن قامتاماسىز ەتىلگەن ەكەن. سونداي-اق،  ولارعا 14 مىڭعا جۋىق مەكتەپ كومپيۋتەرى ۋاقىتشا پايدالانۋعا بەرىلەدى. بۇعان قوسىمشا 1049 پلانشەت پەن 150 كومپيۋتەر ساتىپ الىنعان.

كوپبالالى جانە از قامتىلعان وتباسىلار دا ۇمىت قالمادى. بۇل ساناتقا ەنەتىن 1915 وقۋشى  دەمەۋشىلەردىڭ قاراجاتى جانە بيۋدجەت ەسەبىنەن ينتەرنەت-بايلانىسپەن قامتاماسىز ەتىلدى.

ەسكە سالار بولساق، وبلىستا 1 ءساۋىر كۇنى 16 مىڭ ونلاين-ساباق ءوتىپ، وعان 166 مىڭ وقۋشى قاتىسقان بولاتىن. ياعني، ءوڭىر پەداگوگتارىندا از دا بولسا بۇل باعىتتا تاجىريبە بار.

جالپى، قاشىقتان وقىتۋ كەزەڭىندە مۇعالىمدەرگە سكريندەر جاساپ، وتكىزىلگەن ساباقتار تۋرالى ەسەپتەردى تاپسىرۋدىڭ قاجەتى جوق جانە وقۋشىلارعا باعا قويىلمايدى.

بريفينگكە قاتىسقان سپيكەرلەر مەكتەپ تۇلەكتەرىنە ارنالعان ەمتيحان ءپىشىمى مەن تەستىلەۋ كەزەڭى بۇرىنعىداي قالاتىنىن جەتكىزدى. «ازىرگە بۇل ماسەلەگە قاتىستى وزگەرىستەر بولاتىنى تۋرالى اڭگىمە ايتىعان جوق»، دەپ اتاپ ءوتتى ولار.

 

قاراعاندى وبلىسى

 

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار