ونەر • 31 ناۋرىز، 2020

اقتوبەدە ديماشتىڭ قاتىسۋىمەن «baqytty bala» فەستيۆالى مارەسىنە جەتتى

21 رەتكورسەتىلدى

اقتوبە ايماعىندا ادام بالاسىنىڭ بالالىق شاعىن باقىتتى ەتۋدىڭ بارلىق باعىتتارى بەلگىلەنگەن. مۇنداي اكەلىك قامقورلىق ولاردىڭ جان-جاقتى ءوسىپ جەتىلۋىنە ىقپالىن تيگىزۋدە. وسى وڭىردە تۇساۋى كەسىلگەن «Baqitty bala» اتتى بالالاردىڭ اشىق ۆوكالدىق فەستيۆال بايقاۋى - «بۇلاق كورسەڭ، كوزىن اشتىڭ» باستى كورىنىسى. قازىرگى كەزدە داستۇرگە اينالا باستاعان جاس جەتكىنشەكتەردىڭ ءان سايىسى ءوڭىر برەندىنە اينالىپ كەلەدى.

تاياۋدا وبلىس اكىمدىگىنىڭ جانە ديماش قۇدايبەرگەن مەن ونىڭ ديماشالي پروديۋسەرلىك ورتالىعىنىڭ قولداۋىمەن وتكىزىلگەن ەكىنشى فەستيۆال-بايقاۋ مارەگە جەتتى. وعان قاتىسۋعا الەمنىڭ توعىز ەلىنەن 500-دەن استام ءوتىنىش ءتۇستى. سونىڭ ىشىندە قازىلار القاسى ءۇش اي ۋاقىتىن سارپ ەتىپ، جيىرما بالانى ىرىكتەپ الدى. ۇزاق ۋاقىتتى تالاپ ەتكەن تاڭداۋ ولارعا وڭاي تيمەگەن سەكىلدى. بۇل جونىندە رەسەيدىڭ ەڭبەك سىڭىرگەن ءانشىسى، كومپوزيتور ۆلاديمير ەزەروۆ «قالاي دەگەندە دە بايقاۋدىڭ جوعارى تالاپتارى ورىندالۋى ءتيىس. وسى ورايدا قازىلار القاسىنىڭ مۇشەلەرى ۆوكالدىق قابىلەتتەرى مول، بىرىنەن ءبىرى وتكەن بالعىن تالانتتاردى دۇرىس تاڭداپ، ءوز مىندەتتەرىن ادال اتقارا الدى» دەگەن تىلەگىن ءبىلدىردى.

وسى ورايدا قازىلار القاسىنىڭ مۇشەلەرىنەن شەتتەرىنەن شوۋ يندۋسترياسىنىڭ جىلىك مايىن شاعىپ ىشكەن الەمگە تانىمەن جۇلدىزدار ەكەنى بالالار فەستيۆالىنىڭ كوركەمدىك دەڭگەيىن كوتەرە تۇسكەنى كامىل. سونداي-اق ۋكراينانىڭ تانىمەن ءانشىسى ايدا نيكولايچۋك پەن ايگىلى «گولوس» تەلە-جوباسىنىڭ جۇرگىزۋشىسى، گرۋزين ورىنداۋشىسى نينيتسنو بەلادزە تاۋەلسىز وكىل رەتىندە شاقىرىلعان. ساراپتامالىق توپ قۇرامىنداعى ەۆگەني ەۆزەروۆتىڭ دە اتاعى ءبىر باسىنا جەتەدى. اتالعان قۇرامعا ەلىمىزدەن ديماش قۇدايبەرگەننىڭ سوۋند-پروديۋسەرى جانە مۋزىكا كوركەمدەۋشى ەرلان بەكچۋرين، تانىمال ءانشى-كومپوزيتور ۇلىقپان جولداس جانە ديماشتىڭ ۇستازى، ونىڭ دارا تالانتىن الەمگە تانىتا بىلگەن ونەر يەسى مارات ءايتىموۆ ەنگىزىلگەن.

ولاردىڭ قاي-قايسى دا كونكۋرستىق وتىنىمدەر ساپاسىنىڭ جاقسارعانى جانە جاس ورىنداۋشىلاردىڭ ۆوكالدىق دەڭگەيى وسكەنى جونىندەگى ورتاق وي-پىكىرگە كەلىپ وتىر. ولاردىڭ اراسىندا حالىقارالىق دەڭگەيدە ونەر كورسەتىپ جۇرگەن جاس ۇلانداردىڭ دا مول ەكەنى «Baqitty bala» ءباسىن بيىكتەتە تۇسەدى. ىرىكتەۋ كەزەڭىنىڭ باستى قورىتىندىسى ديماش قۇدايبەرگەننىڭ ارتىنان ەرگەن تالانتتى ءىنى-قارىنداستارى بار ەكەنىن كورسەتىپ بەردى دەۋگە بولادى.

بايقاۋ قورىتىندىسىندا استانالىق ايگەرىم تىلەۋبەك پەن رەسەيدىڭ تۇمەن قالاسىنان كەلگەن جاس دارىن يسلام بالكوەۆ باس جۇلدەگە يە بولىپ، ارقايسىنا ءبىر ميلليون تەڭگە سىيلىق بەرىلدى. ال ءبىرىنشى ورىن رەسەيدىڭ تۋلا قالاسىنان كەلگەن ماريا پانيۋكوۆا مەن الماتىلىق نۇرلىبەك ساپاربايدىڭ ەنشىسىنە ءتيدى. ايتا كەتەرلىك ماسەلە، باس جۇلدەنى يەلەنگەن يسلام بالكوەۆ رەسەيدىڭ «پەرۆىي كانال» تەلەارناسىنان كورسەتىلەتىن «گولوس دەتي» تەلەۆيزيالىق جوباسىنان كوپشىلىككە تانىمال ەكەنى ءمالىم. ول بايقاۋدا ەكى ءان ورىندادى. ونىڭ ءبىرى - «مويا ينگۋشەتيا». يسلام بايقاۋدا جەڭىمپاز بولعانىنا قۋانىشتى ەكەنىن جاسىرمادى.

فەستيۆال جەڭىمپازدارى مەن جۇلدەگەرلەرىن ماراپاتتاۋ ءراسىمى كەزىندە ساحناعا بۇگىنگى قازاق ونەرىنىڭ جاس قىرانى ديماش قۇدايبەرگەن كوتەرىلىپ، بايقاۋدى ۇيىمداستىرۋشىلار مەن وعان قاتىسۋشىلاردىڭ بارىنە ءسات-ساپار تىلەپ، جىلى ىقىلاسىن ءبىلدىردى. ءارى كوپشىلىكتىڭ سۇراۋى مەن تىلەگى بويىنشا ءان شىرقادى. سونداي-اق وسى كۇنى ايرىقشا تالانت يەسى - شالقار قالاسىندا ەلەكتر قۋاتىنا سوعىلىپ، ەكى قولىنان ايىرىلىپ قالعان دامير فاتحۋلينمەن كەزدەسىپ، وعان ماتەريالدىق قولداۋ كورسەتتى. ءسوز سوڭىندا «Baqitty bala» اشىق بالالار ۆوكالدىق-فەستيۆال بايقاۋى جاس تولقىننىڭ ۇلكەن ساحنادا ونەر كورسەتۋىنە جول اشاتىن جانە قاناتى قاتايۋىنا كومەگىن تيگىزەتىن ونەر سايىسىنا اينالىپ كەلەدى دەمەكپىز.

 

اقتوبە

سوڭعى جاڭالىقتار

ۇقساس جاڭالىقتار