قازاقستان • 31 ناۋرىز، 2020

ەلىمىزدە ميكروقارجى ۇيىمدارى، لومباردتار جانە ونلاين-كرەديتورلار جاپپاي تەكسەرىلەدى

43 رەتكورسەتىلدى

قارجى نارىعىن رەتتەۋ جانە دامىتۋ اگەنتتىگى ميكروقارجى ۇيىمدارىنىڭ، لومباردتاردىڭ جانە ونلاين-كرەديتورلاردىڭ زاڭناما تالاپتارىنا سايكەس كەلۋى، قارجى پيراميداسىنىڭ بەلگىلەرىن جانە زاڭسىز بانك قىزمەتىن انىقتاۋ تۇرعىسىنان لومباردتاردى تەكسەرۋدى باستايدى.

تەكسەرۋلەر ناۋرىز – ماۋسىم ارالىعىندا ميكروقارجى ۇيىمدارىنىڭ بارىنشا كوپ سانى شوعىرلانعان نۇر-سۇلتان، الماتى، شىمكەنت قالالارىندا وتەدى. بۇل تەكسەرىسكە 1100 لومبارد قامتىلادى (بۇل رەسپۋبليكا بويىنشا جالپى سانىنان 50%-دان استام)، ونىڭ ىشىندە ساۋىردە – 424، مامىردا – 323، ماۋسىمدا – 353. سونىمەن بىرگە شامامەن 50 ونلاين-كرەديتتەۋ سۋبەكتىسى جانە 200-گە جۋىق ميكروقارجى ۇيىمدارىنىڭ سۋبەكتىسى تەكسەرىلەتىن بولادى.

ءبىرىنشى كەزەكتە تەكسەرۋشى توپتار قازاقستان رەسپۋبليكاسى پرەزيدەنتىنىڭ توتەنشە جاعدايدى ەنگىزۋ ناتيجەسىندە زارداپ شەككەن حالىقتىڭ، شاعىن جانە ورتا بيزنەستىڭ قارىزدارى بويىنشا نەگىزگى بورىش پەن سىياقى سومالارىن تولەۋدى توقتاتا تۇرۋ تۋرالى تاپسىرماسىن ورىنداۋ تۇرعىسىنان تەكسەرۋ جۇرگىزەدى.

تەكسەرۋگە كىرىستى جىلىستاتۋ جانە تەرروريزمدى قارجىلاندىرۋعا، قارجى پيراميداسىن ۇيىمداستىرۋعا قارسى ءىس-قيمىل، بورىش جۇكتەمەسىنىڭ كوەففيتسيەنتىنە، سىياقىنىڭ جىلدىق ءتيىمدى مولشەرلەمەسىنىڭ مولشەرىنە جانە ميكروقارىزدار بويىنشا شەكتى سىياقىنىڭ مانىنە، سىياقىنى، ايىپپۇلدار مەن ءوسىمپۇلداردى دۇرىس ەسەپتەۋگە،  ميكروكرەديت بويىنشا بەرەشەكتى وتەۋ كەزەكتىلىگىنىڭ تارتىبىنە قويىلاتىن تالاپتار بولىگىندە زاڭنامانى ساقتاۋ تۋرالى دەرەكتەر دە تەكسەرىلەدى.

زاڭناما تالاپتارىنىڭ ساقتالماۋى، قارجى پيراميداسىنىڭ جانە زاڭسىز بانك قىزمەتىنىڭ بەلگىلەرى انىقتالعان جاعدايدا ۇيىمدارعا قىزمەتىن توقتاتۋدى قوسا العاندا، زاڭسىز قىزمەتى ءۇشىن جاۋاپكەرشىلىككە تارتۋ شارالارى قولدانىلادى.

سوڭعى جاڭالىقتار

ۇقساس جاڭالىقتار