قازاقستان • 31 ناۋرىز، 2020

تۇركىستان وبلىسىنىڭ 30 اۋىلىندا ينتەرنەت مۇلدەم جوق

170 رەتكورسەتىلدى

كەلەسى اپتادان باستاپ ەلىمىزدىڭ ءبىلىم وشاقتارىندا قاشىقتان وقىتۋ جۇيەسى بويىنشا ساباق باستالادى. ارينە، قاشىقتان ءبىلىم بەرۋگە قاتىستى كوپتەگەن سىن پىكىرلەر ايتىلۋدا. بۇل تۇسىنىكتى دە. ويتكەنى، بۇل ماسەلە اياق استىنان قولعا الىنعاندىقتان مەكتەپتەردىڭ بۇعان دايىندىعى جوق ەدى.

سوندىقتان ونلاين وقىتۋ جۇيەسى مۇعالىمدەر قاۋىمىن ءاپ-ساتتە ابىگەرگە ءتۇسىرىپ، جۇيكەلەرىن جۇندەي تۇتە باستاعانى انىق. الەۋمەتتىك جەلىلەردە مەكتەپتەردىڭ، اسىرەسە، اۋدان-اۋىلدارداعى ءبىلىم وشاقتارىنىڭ قاشىقتىقتان ءبىلىم بەرۋگە ەشقانداي دايىندىعى جوق ەكەنىن، ينتەرنەت ماسەلەسى تىپتەن، قيىن بولىپ جاتقانىن شىرقىراپ ايتىپ جاتقان مۇعالىمدەر كوپ. ءتىپتى، ينتەرنەتكە قوسىلا الماي ءبىر-بىرىنە داۋىس كوتەرىپ، قىرىلىسىپ جاتقان مۇعالىمدەردىڭ اششى ايقايلارى ۆاتساپ جەلىسى ارقىلى دا تاراپ كەتتى. ودان رەداكتسياعا دا حابارلاسىپ، وسىناۋ باستامانىڭ اۋرەسى كوپ بولىپ تۇرعانىن ايتىپ جاتقاندار جەتەرلىك. بار ماسەلە – ينتەرنەت پەن كومپيۋتەردە بولىپ تۇر. ينتەرنەتى جوق اۋىل، كومپيۋتەرى جوق وتباسى دەگەندەي... ارينە، ءبىلىم جانە عىلىم مينيسترلىگى ۇستازدار مەن اتا-انالاردىڭ بۇل الاڭداۋشىلىعىن كورمەي-بىلمەي وتىرعان جوق.

سودان بولار ءبىلىم جانە عىلىم ءمينيسترى اسحات ايماعامبەتوۆ ء«بىز سىني پىكىرلەردى ەستىپ تە، كورىپ تە وتىرمىز. دەگەنمەن، قاشىقتان ءبىلىم بەرۋگە كوشۋ – كوروناۆيرۋستىق ينفەكتسيانىڭ تارالۋىن ازايتۋعا باعىتتالعان شارالار اياسىندا جۇزەگە اسىپ جاتقانىن بارلىعى تۇسىنگەنى ءجون. وكىنىشكە وراي، باسقا تاڭداۋ جوق. وقۋ پروتسەسى توقتاتىلماۋى ءتيىس» دەپ جۇرتتى سابىرعا شاقىردى.

دەگەنمەن دە ناعىز ايقاي-شۋ كەلەسى اپتادا باستالاتىن سياقتى. ويتكەنى، قازىر قانشا جەردەن ونلاين وقىتۋعا دايىنبىز دەسەك تە، بار اقيقات، بۇل سالانىڭ بار شىنايى تىرشىلىگى سول 6-ءساۋىر كۇنى بەلگىلى بولاتىنى انىق.

مىسالى، تۇركىستان وبلىسى اكىمدىگىنىڭ سايتىندا ءوڭىردىڭ الەۋمەتتىك-ەكونوميكالىق دامۋى جايلى كەلتىرگەن مالىمەتتەردە مىنانداي جولدار بار ەكەن: «جالپى ورتا ءبىلىم بەرۋ مەكتەپتەرىنىڭ سانى – 902 بىرلىكتى، ونداعى وقۋشىلار سانى – 467،6 مىڭ ادامدى قۇرادى. ونىڭ ىشىندە، 902 مەكتەپ – بايلانىس جانە ينتەرنەت جۇيەلەرىنە جالعانعان، 897 مەكتەپتە 2675 ينتەراكتيۆتى تاقتالار ورناتىلعان. مەكتەپتەر 42،8 مىڭ بىرلىك كومپيۋتەرلىك تەحنيكامەن جابدىقتالعان. 1 كومپيۋتەرگە – 10،5 وقۋشىدان».

وڭىردەگى 902 مەكتەپتىڭ بارلىعىن قاعاز بەتىندە ينتەرنەتپەن قامتىپ تاستاعان تۇركىستان وبلىسى اكىمدىگىنىڭ بۇل مالىمەتى قانشالىقتى راس ەكەندىگىن انىقتاۋ ارينە، قيىنداۋ. بىراق، وسى ايماقتاعى تسيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ مالىمەتتەرىنە قاراعاندا ءدال قازىر تۇركىستان وبلىسىنىڭ 30 ەلدىمەكەنىندە ينتەرنەت بايلانىسى مۇلدەم جوق. تاعى 55 اۋىلدا ينتەرنەت وتە ناشار، جىلدامدىعى 2 G عانا. مۇنداي جىلدامدىقپەن ونلاين وقىتۋعا قوسىلۋ تىپتەن، مۇمكىن ەمەس. وقۋ جىلىنىڭ سوڭعى توقسانى باستالۋعا ساناۋلى-اق كۇندەر قالدى. ەندى وسى ۋاقىت ىشىندە تۇركىستان وبلىسىنىڭ اكىمدىگى بۇل اۋىلداردى ينتەرنەتپەن قامتىپ ۇلگەرە مە؟

تاعى ءبىر ايتارى، قاشىقتان وقىتۋعا وبلىستىق ادامي الەۋمەتتى دامىتۋ باسقارماسى (بۇرىنعى ءبىلىم باسقارماسى) جاۋاپتى بولسا، ينتەرنەت تارتۋ ماسەلەسىنە وبلىستىق تسيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسى جاۋاپتى. بىراق ەرتەڭگى كۇنى ونلاين وقىتۋ كەزىندە كەزدەسەتىن كەمشىلىكتەردەن نەگىزىنەن ءبىلىم باسقارماسى وڭباي تاياق جەيىن دەپ تۇرعان سياقتى. ياعني، بۇل ىستە مۇعالىم مەن اتا-انانىڭ شاشى اعاراتىنى انىق. ءبىلىم ساپاسى دا تومەندەيدى. ارينە، قازىرگىدەي قىسىلتاياڭ ساتتە مۇنداي جايتتەرگە تۇسىنىستىكپەن قاراعان دا دۇرىس شىعار. دەگەنمەن دە وبلىس باسشىلارى قاشىقتان وقىتۋ ماسەلەسىنە شىنداپ نازار اۋدارماسا، ەرتەڭگى كۇنى ءىستىڭ بارلىعى كوزبوياۋشىلىق بولاتىنى انىق.

ءيا، ونلاين وقىتۋعا «بالاپان» جانە «ەل ارنا» تەلەارنالارى دا قوسىلىپ، كوگىلدىر ەكراننان بەينەساباقتار كورسەتىلمەك. بىراق، بۇدان كەرى بايلانىس جوق قوي. ۇيدەگى وقۋشى شىنىندا ول ساباقتى كوردى مە، جوق پا، مۇعالىم ونى قالاي انىقتايدى؟ سوندىقتان بۇل ىستە اتا-انانىڭ دا جاۋاپكەرشىلىگى زور. ازىرگە بۇل جۇيە بىرتە-بىرتە ءبىر قالىپقا تۇسەر دەگەن ءۇمىت قانا كوڭىلگە مەدەۋ بولىپ تۇر. بىراق، ءبىر جۇيەگە تۇسكەنشە دە ۇنەمى نايزانىڭ ۇشىندا جۇرەتىن ۇستازدار قاۋىمى قينالىپ، تالاي ايقاي-شۋدىڭ بولاتىنى انىق. ايتەۋىر، اللا تاعالام سابىر بەرسىن.  

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار