ايماقتار • 31 ناۋرىز، 2020

زايسانعا اققۋلار كەلىپ قونىپ جاتىر

شىرايلى شىعىستىڭ اينا كولى – ايدىندى زايساننىڭ ماڭىنا اققۋلار كەلىپ قونىپ جاتىر، دەپ حابارلايدى جەرگىلىكتى تۇرعىندار.

جەرگىلىكتى تۇرعىنداردىڭ ايتۋىنشا، زايسان اۋدانىنا قاراستى ءبىرجان اۋىلىنىڭ ىرگەسىندەگى شەگەن فەرماسىنىڭ جانىنداعى كولشىكتەرگە كەشەلى بەرى ەكى جۇپ اققۋ قونعان. قونىپ قانا قويماي، ەمىن-ەركىن ەركەلەي ءجۇزىپ ءجۇر. ال بۇل ەلدى مەكەن زايسان كولىنە قۇياتىن ەرتىس وزەنىنەن دە، كولدەن دە بىرنەشە شاقىرىم عانا قاشىقتا ورنالاسقان، كولشىكتەر مەن وزەندەردىڭ ءبارى ەرتىستى تولتىرا كەلىپ، زايسان كولىنە قۇيادى. كولدىڭ ءوزى ءبىرجان اۋىلدىق وكرۋگىنە قاراستى اقارال اۋىلىنان 15 شاقىرىم جەردە عانا.

ەسكە سالساق، وسىدان ءبىراز كۇن بۇرىن كولدىڭ ەكىنشى جاعىنداعى تارباعاتاي اۋدانىنا قاراستى قاندىسۋ وزەنىنە دە اققۋ قونعانىن اقجارلىق اعايىندار سۇيىنشىلەپ جەتكىزگەن بولاتىن. ەندى مىنە، زايساننىڭ جاعالاۋلارىن قۇس ەركەسى اققۋلار ماحاببات دۋمانىنا بولەپ جاتىر.

كوكتەم شىققانىمەن، قىستىڭ ىزعارى ءالى قايتا قويماعان ايماققا ماحاببات سيمۆولدارىنىڭ ەرتە كەلۋىن كوروناۆيرۋس قىسقان قازىرگىدەي قيىن ۋاقىتتا زايساندىق جۇرت جاقسىلىقتىڭ نىشانىنا بالاپ وتىر. ءتىپتى، بۇل سيرەك قۇبىلىسقا ارناپ قازىر نۇر-سۇلتان قالاسىندا تۇراتىن بىرجاندىق اقىن باقىتبەك قىزىر ۇلى ارنايى جىر دا جازعان ەكەن.

ءتورت اققۋ!

ءتورت اققۋ ۇشىپ اۋىلىمنىڭ شەتىنەن.
توپتالىپ كۇزدە، جىلى جاققا كەتىپ ەڭ...
كوكتەمدە كەلىپ قالدىڭ با جەردى ساعىنىپ؟
تابىلىپسىڭدار شەگەندە كولشىك بەتىنەن؟!

نەگە كەلدىڭدەر قار ءالى دۇرىس كەتپەگەن؟
ەرتىسىم اعىپ، زايسان كولگە جەتپەگەن.
ساۋىر - سايقان مۇز بولىپ تۇر عوي قوزعالماي.
ىزعار جەل سوعىپ، وتپەسىن سالقىن وكپەدەن.

التى اي ۋاقىت، قالاي ءوتتى ەكەن ول جاقتا؟..
امالسىزدىقتان، جۇردىڭىزدەر-اۋ كۇن قاقتا.
جىلى جاقتاردىڭ، قالدارى قالاي جاقسى ما؟
جىبەرىپ ويدى، ار جاعىن ءوزىڭ جۇمباقتا...؟!

ءتىلىڭدى بىلمەيم، اتتەڭ اي سوزگە تارتار ەم؟
تاڭ اتىرىپ، كول جاعالاپ جاتار ەم!
ومىرگە كەرەك، كوپ نارسە مەن دە جازىپ اپ.
كۇنمەن باتىپ، تاڭمەن بىرگە اتار ەم!

قۇس ەكەش قۇستىڭ، سۇلۋىسىڭ ارلانعان!
ءجۇزىڭدى كورىپ، ادامزات ءسىرا تاڭدانعان.
ماحابباتقا دا بەرىكتىك جاعى سىزدەردە...
تابيعاتقا دا ادەمى بولىپ تاڭدالعان!

قۋانىپ جاتىر، ەل جۇرتىم سىزدەر كەلگەنگە!
ساعىنىش وتى باستالادى اۋ جەردەندە...
ءار ادامنىڭ بۇل ومىردە ارمانى.
قارتايىپ بارىپ، تۋعان جەردە ولگەنگە!

وتىرىڭدار، شارشاپ كەلدىڭدەر، ۇشپاڭدار!
جان-جاققا قارا، كەلىپ قالماسىن دۇشپاندار؟
و ادامدار، سەرت بەرشى اققۋدى اتپاۋعا؟
ءسوز بەرسەڭدەر تاستاماي ونى ۇستاڭدار!