ايماقتار • 22 ناۋرىز، 2020

كوكتال اۋىلىندا كوشەلى ءىس تە، كەلەلى ماسەلە دە بار

44 رەتكورسەتىلدى

كوكتال اۋىلى تالاس اۋدانىنىڭ ورتالىعى قاراتاۋ قالاسىنان 18 شاقىرىم قاشىقتىقتا ورنالاسقان. مۇندا 884 ءۇي بار. تۇرعىندارى نەگىزىنەن مال شارۋاشىلىعىمەن اينالىسادى.

«بۇرىن اۋىل كولەمى 88 گەكتار عانا بولاتىن. نەگىزى كوكتال قاراتاۋدان ءبولىنىپ شىققالى جەرى بولماعان. وسى بار جەرگە وتكەن جىلى 3300 گەكتار جەر قوسىپ الدىق. بۇل جەرلەر قىزىلاۋىت اۋىلىنا قارايتىن. بۇگىندە تيەسىلى جەرىمىزدى مال جايىلىمىنا پايدالانىپ وتىرمىز. حالىق تا مال شارۋاشىلىعىن وركەندەتىپ، تىرلىگىن تىكتەپ وتىر»، دەيدى اۋىل اكىمى رومان قىرىقباەۆ.

جالپى، كوكتال اۋىلىندا ەل يگىلىگى ءۇشىن اتقارىلىپ جاتقان شارۋالار كوپ. تالاس اۋدانىنىڭ اكىمى باقىت قازانباسوۆتىڭ ايتۋىنشا، اۋىلدا ەلباسىنىڭ «تۋعان جەرگە تۋىڭدى تىك!» باعدارلاماسى بويىنشا بىرقاتار جۇمىستار اتقارىلعان. جەرگىلىكتى حالىقتىڭ يگىلىگىنە اۋىلدىڭ تۇلەگى، كاسىپكەر الپامىس باقىت ۇلى ءوز ەسەبىنەن 5 ميلليون تەڭگەگە جاڭا مەشىت سالىپ بەرگەن. بۇرىن بىرەۋدىڭ جەكە ءۇيىن مەشىت رەتىندە پايدالانىپ كەلگەن كوپشىلىك بۇل ساۋاپتى ىسكە ريزاشىلىعىن بىلدىرۋدە. سونىمەن قاتار، ول «تۋعان جەرگە تۋىڭدى تىك!» باعدارلاماسى شەڭبەرىندە 35 ميلليون تەڭگەگە اۋىلدان سپورت كەشەنىن دە تۇرعىزىپتى. بۇگىندە اۋىل جاستارى سپورتقا بەت بۇرىپ، سالاماتتى ءومىر سالتىن ۇستانادى ەكەن. اۋىل تۇرعىنى، ارداگەر ۇستاز ۋايس قويشىمان اۋىلدا سوڭعى جىلدارى بىردە-ءبىر قىلمىس تىركەلمەگەنىن، اۋىل ازاماتتارىنىڭ ۇيىمشىلدىعىنىڭ ءارى ءتارتىبىنىڭ جاقسى ەكەنىن ايتادى. سول سياقتى اۋىل تۇلەگى، كاسىپكەر مايرا جاروۆا دا «تۋعان جەرگە تۋىڭدى تىك!» باعدارلاماسى اياسىندا 1 ميلليون تەڭگەگە دەمەۋشىلىك جاساپ، اۋىلدىڭ كىرەبەرىسىنە اركا ورناتىپتى.

ال، كەزىندە بالدىر باسىپ، قاراۋسىز قالعان «كوكتال-پيونەر كولى» كولىنە 17 مىڭ بالىق جىبەرىلىپتى. اتالعان كولدىڭ 2 ميلليون كۋب سىيىمدىلىعى بار ەكەن. بۇل جۇمىس العاشقى ناتيجەسىن دە بەرىپ ۇلگەرىپتى. ەندى جەرگىلىكتى شارۋالار قۇس شارۋاشىلىعىمەن اينالىسۋدا. دەگەنمەن، اۋىلدا شەشىمىن كۇتكەن بىرقاتار ماسەلەلەر دە بار. اۋىل اكىمى رومان قىرىقباەۆتىڭ ايتۋىنشا، اۋدان ورتالىعى قاراتاۋ قالاسى مەن كوكتال اۋىلىنىڭ اراسىنداعى 18 شاقىرىم جولدىڭ ناشارلىعى تۇرعىنداردىڭ نەگىزگى ماسەلەسى ەكەن. «ەكى ورتاداعى جولدىڭ ساپاسى ناشار. بۇل جول 2019 جىلعا دەيىن «قازفوسفات» مەكەمەسىنىڭ جولى بولعان. كەزىندە جولدى ءوز مەنشىگىنە الىپ قويعان. بىراق بىلتىر اۋدانعا قايتا وتكەن»، دەيدى اۋىل اكىمى. الايدا جولدىڭ جوبالىق-سمەتالىق قۇجاتى دايىن ەكەن. جوبا قۇنى 325 ميلليون تەڭگەنى قۇرايدى.

كوكتال

تۇرعىندار ءۇشىن وزەكتى تاعى ءبىر ماسەلە – كوگىلدىر وتىن. تالاس اۋدانىندا 13 اۋىلدىق وكرۋگ بار بولسا، بۇگىندە ونىڭ 5-ەۋىنە گاز كىرمەگەن. ولار قاراتاۋدىڭ تاۋلى ايماعىندا ورنالاسقان كوكتال، قاسقابۇلاق، ەسەيحان، بەرىكقارا اۋىلدارى. اۋداننىڭ كوپتەگەن اۋىلدارىنا گاز كىرگەنىمەن، كوكتالعا ءالى جەتپەپتى. جەرگىلىكتى تۇرعىندار وسى ءبىر كوگىلدىر وتىن ماسەلەسى شەشىلسە دەگەن نيەتتە. جول مەن گاز تىرشىلىكتىڭ نەگىزگى كوزى بولعاندىقتان، اۋىل حالقى ءۇشىن بۇل ماسەلەلەر وزەكتىلىگىن جويمايدى. دەسە دە، تۇرعىندار تالاي جىلدان بەرى قوردالانىپ كەلە جاتقان كەلەلى ماسەلەلەر الداعى ۋاقىتتاردا شەشىلىپ قالار دەگەن ۇمىتتە.

 

جامبىل وبلىسى

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار