ۇكىمەت • 19 ناۋرىز، 2020

قازاقستاندىق سەرجانتتار اقش-تا باق سىنادى

45 رەتكورسەتىلدى

ەلىمىزدىڭ قارۋلى كۇشتەرىنىڭ سەرجانتتارى قازاقستان مەن اقش قورعانىس ۆەدومستۆولارى اراسىنداعى 2020 جىلعا ارنالعان اسكەري بايلانىس جوسپارىنا سايكەس سەرجانتتار قۇرامىنىڭ اسكەري قىزمەتشىلەرى اراسىندا وتەتىن جىل سايىنعى «ۇزدىك جاۋىنگەر-2020» بايقاۋىنا قاتىستى.

اتالعان سايىس اريزون شتاتىنداعى «حۋاچۋك» اسكەري بازاسىندا ۇيىمداستىرىلدى. وعان 50-گە جۋىق اسكەري قىزمەتشى قاتىستى. ايتا كەتۋ كەرەك، قازاقستاندىق تاراپ بۇل سايىسقا العاش رەت شاقىرىلدى.

«اتالمىش كونكۋرسقا قاتىسۋ قازاقستان قك سەرجانتتار قۇرامىنىڭ كاسىبيلىگىن ارتتىرۋعا، ەكى ەل ۆەدومستۆولارى اراسىنداعى حالىقارالىق اسكەري ىنتىماقتاستىقتى نىعايتۋعا، سونداي-اق اسكەري جارىس تۇرلەرىن ۇيىمداستىرۋ جانە وتكىزۋ ماسەلەلەرىندە شەت ەلدىك ارميالاردىڭ تاجىريبەسىن الۋعا ىقپال ەتەدى. سونىمەن قاتار، الەم ەلدەرى بويىنشا قازاقستان قك سەرجانتتىق قۇرامىنىڭ دايىندىق دەڭگەيىن باعالاۋعا مۇمكىندىك بەرەدى»، – دەيدى قازاقستان قارۋلى كۇشتەرىنىڭ باس سەرجانتى، شەبەر-سەرجانت تەمىربەك حالىقوۆ.

كۇش، شىدامدىلىق، قارۋ-جاراقپەن جۇمىس ىستەۋدىڭ تاجىريبەلىك داعدىلارى، ۇرىس الاڭىندا باعدارلاي ءبىلۋ، جاۋىنگەرلىك جاعدايدا جەكە قۇرامدى باسقارۋ، بيىكتىكتەگى قورقىنىشتى جەڭۋ، تىعىز قارىم-قاتىناس ورناتۋ سىندى تالاپتارعا سايكەس كەلۋ تالابى سايىسقا قاتىسۋشى ءاربىر ۇمىتكەرگە قويىلدى.

قازاقستاندىق كوماندا قۇرامىندا «ۇزدىك سەرجانت» اتاعىن الۋعا بۇكىلارميالىق سايىستىڭ، سونداي-اق اسكەري حالىقارالىق ويىندار اياسىندا وتكىزىلەتىن «الەم جاۋىنگەرى» حالىقارالىق كونكۋرسىىنىڭ جۇلدەگەلەرى قاتىستى. ولاردىڭ قاتارىندا بۇكىلارميالىق سايىستىڭ بىرنەشە دۇركىن جەڭىمپازى، كوپسايىستان 1-رازريادتى يەمدەنگەن روتا سەرجانتى، اعا سەرجانت نۇربول داۋلەتوۆ پەن «الەم جاۋىنگەرى» حالىقارالىق سايىسىنىڭ بىرنەشە دۇركىن جەڭىمپازى، سەرجانت ەرتىلەك بەكبولاتوۆ بار. (2018 جىلى 1 ورىن، 2019 جىلى 3-ورىن).

بارلىق سايىس 8 كەزەڭنەن تۇردى، وندا اسكەري قىزمەتشىلەر جاۋىنگەرلىك اتىسپەن، دەنە جانە اتىس دايىندىعى بويىنشا تەستىلەۋدەن جانە كەدەرگىلەر جولاعىنان ءوتتى، جەرگىلىكتى جەردى تۇنگى باعدارلاۋ جانە توپوگرافيا داعدىلارىن كورسەتتى. سايىستا جەڭىسكە جەتۋ ءۇشىن اسكەري قىزمەتشىلەرگە كوشباسشىلىق قاسيەتتەرى بويىنشا ءوز بىلىمدەرىن كورسەتۋ ماڭىزدى بولدى.

قازاقستاندىق سەرجانتتار اتالعان سايىستا جوعارى دەنە دايارلىقتارىن كورسەتتى. سەرجانت ەرتىلەك بەكبولاتوۆ، كەدەرگى جولاعىن 2 مينۋت 15 سەكۋندتا ءوتىپ اريزون شتاتىندا رەكورد ورناتتى، بۇل الدىڭعى رەكوردتاردان ەكى ەسە جىلدامىراق. سونىمەن قاتار قازاقستان قك اسكەري قىزمەتشىلەرى تاكتيكالىق دايىندىق، جەرگىلىكتى جەرگە باعدارلاۋ، جاقىن قاشىقتىقتاعى اتىس بويىنشا جارىس بارىسىندا جاقسى تاجىريبە الدى.

سوڭعى جاڭالىقتار

ۇقساس جاڭالىقتار