پارلامەنت • 23 قاڭتار، 2020

سەنات بيۋروسىنىڭ وتىرىسى ءوتتى

20 رەتكورسەتىلدى

داريعا نازارباەۆانىڭ توراعالىق ەتۋىمەن قازاقستان رەسپۋبليكاسى پارلامەنتى سەناتىنىڭ وتىرىسى بولدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

سەنات توراعاسى كىرىسپە سوزىندە دەپۋتاتتار جىل باسىندا ايماقتارعا بارعانىن جانە جەرگىلىكتى جەرلەردەگى جۇمىستىڭ جاعدايىمەن، زاڭدار مەن مەملەكەتتىك باعدارلامالاردى جۇزەگە اسۋ بارىسىمەن، جەرگىلىكتى اتقارۋشى ورگانداردىڭ قىزمەتىمەن تانىسقانىن اتاپ ءوتتى. «بۇل ساپارلاردىڭ ناتيجەلەرى دەپۋتاتتىق ساۋالداردىڭ نەگىزى بولادى ءارى پارلامەنتتىك تىڭداۋلاردا، ۇكىمەت ساعاتتارىندا جانە باسقا دا كەزدەسۋلەردە تالقىلانادى جانە كوميتەتتەردىڭ ۇسىنىستارى مەن جۇمىس جوسپارلارىنا ەنگىزىلەدى» دەدى د.نازارباەۆا.

سەنات توراعاسى پالاتا كوميتەتتەرىنە زاڭ شىعارۋ جۇمىستارىن زاڭ جوبالارىن ازىرلەۋشىلەرمەن ۇيلەستىرۋدى تاپسىردى. ۇكىمەت 2020 جىلعا ارنالعان جوسپاردى بەكىتكەن بولاتىن، وعان اسا ماڭىزدى ماسەلەلەردى شەشۋگە جانە تۇڭعىش پرەزيدەنت – ەلباسى مەن مەملەكەت باسشىسىنىڭ تاپسىرمالارىن ىسكە اسىرۋعا ارنالعان 17 زاڭ جوباسى ەنگىزىلدى.

سەنات توراعاسى قازاقستان پرەزيدەنتى ق.توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن جۇزەگە اسىرۋ جونىندەگى جالپىۇلتتىق ءىس-شارالار جوسپارىن ىسكە اسىرۋ اياسىنداعى پالاتانىڭ نەگىزگى مىندەتتەرىنە جەكە توقتالدى.

داريعا نازارباەۆا سەناتورلارعا زاڭداردى قابىلداۋ كەزىندە ازاماتتار قۇقىقتارىن قورعاۋ كەپىلدىكتەرىن ارتتىرۋ، ارانداتۋ ءىس-ارەكەتتەرىنە قۇقىق قورعاۋ ورگاندارى نەمەسە ارناۋلى مەملەكەتتىك ورگاندار قىزمەتكەرلەرىنىڭ جاۋاپكەرشىلىگىن كۇشەيتۋ، زاڭناماداعى بارلىق قايشىلىقتاردى ازاماتتار مەن بيزنەستىڭ پايداسىنا ءتۇسىندىرۋدى قامتاماسىز ەتۋ، ولارعا مەملەكەتتىك ورگاندارمەن ءوزارا قارىم-قاتىناستا تەڭ جاعدايلار جاساۋ، بيلىكتىڭ اۋداندىق، قالالىق جانە اۋىلدىق دەڭگەيلەرىنىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرىنە ەرەكشە نازار اۋدارۋدى تاپسىردى.

پارلامەنت جوعارعى پالاتاسىنىڭ باسشىسى «قازاقستانداعى جەڭىل ونەركاسىپتىڭ جاعدايى»، «اگروونەركاسىپ كەشەنىن دامىتۋ»، «قازاقستاننىڭ ترانزيتتىك الەۋەتىن دامىتۋ» تاقىرىپتارىنا ارنالعان پارلامەنتتىك تىڭداۋلار وتكىزۋ قاجەتتىگىن اتاپ ءوتتى.

جوعارعى پالاتا توراعاسى وتىرىس بارىسىندا سەنات جانىنان قۇرىلعان كەڭەستەردىڭ جۇمىسى تۋرالى اڭگىمەلەدى. د.نازارباەۆا پارلامەنتتىك تىڭداۋلارعا دايىندىق بارىسىندا اۋىل شارۋاشىلىعى سالاسىنىڭ كوپتەگەن وكىلدەرىمەن كەزدەسۋلەر بولعانىن ايتتى. «ولار كوتەرگەن ماسەلەلەر كەڭىنەن تالقىلاۋدى تالاپ ەتەدى. سەنات جانىنان اگروونەركاسىپ كەشەنى جونىندە كەڭەس قۇرۋ قاجەتتىگى تۋىندادى» دەدى پالاتا باسشىسى. جاستار ساياساتى سالاسىنداعى زاڭنامانى جەتىلدىرۋ جونىندەگى ۇسىنىستاردى قاراۋ ماقساتىندا جەلتوقسان ايىنان باستاپ پارلامەنت سەناتىنىڭ جانىندا جاستار كەڭەسى جۇمىسىن باستادى، دەدى د.نازارباەۆا.

كۇن تارتىبىندەگى ءبىرىنشى ماسەلە بويىنشا سەنات توراعاسىنىڭ ورىنباسارى بەكتاس بەكنازاروۆ ءسوز سويلەدى. ول سەناتورلاردىڭ ەل ايماقتارىنداعى، ونىڭ ىشىندە شالعاي اۋىلدارداعى 460 كەزدەسۋىنىڭ قورىتىندىسى تۋرالى ايتتى. توراعا ورىنباسارى ازاماتتاردىڭ ايماقتاردا ايتقان ەسكەرتۋلەرىمەن جانە قولدانىستاعى زاڭنامانى جەتىلدىرۋ جونىندەگى ۇسىنىستارىمەن ارىپتەستەرىن تانىستىردى. «حالىقپەن كەزدەسۋ بارىسىندا بىرىڭعاي جيىنتىق تولەم تولەۋ، اتاۋلى الەۋمەتتىك كومەك الۋ شارتتارى، سونداي-اق اۋىلدىق ەلدى مەكەندەردىڭ بيۋدجەتىن قالىپتاستىرۋ (4-ءشى دەڭگەي) جانە «اۋىل-ەل بەسىگى» ارنايى جوباسى اياسىندا تىرەك رەتىندەگى اۋىلدىق ەلدى مەكەندەردى انىقتاۋ ماسەلەلەرى بويىنشا زاڭنامانى جەتىلدىرىلۋدەگى كەمشىلىكتەر تۋرالى سىن ەسكەرتۋلەر ايتىلدى» دەدى ول.

وتىرىس بارىسىندا «2004 جىلعى 22 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلداندى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار