پرەزيدەنت • 10 قازان، 2019

پرەزيدەنت اقتاۋدا ءابىش كەكىلباي ۇلىنا قويىلعان ەسكەرتكىشتى اشتى

197 رەتكورسەتىلدى

ماڭعىستاۋعا جۇمىس ساپارىمەن كەلگەن قازاقستان پرەزيدەنتى قاسىم-جومارت توقاەۆ حالىق جازۋشىسى، ادەبيەت الىبى ءابىش كەكىلباي ۇلىنا قويىلعان ەسكەرتكىشتى اشتى دەپ حابارلايدى قازاقپارات ءتىلشىسى.

سالتاناتتى راسىمدە سويلەگەن سوزىندە مەملەكەت باسشىسى ماڭعىستاۋ ءوڭىرىنىڭ قادىر-قاسيەتىن ەرەكشە ايتىپ ءوتتى.

«ماڭعىستاۋ – جەتى جۇرت كەلىپ، جەتى جۇرت كەتكەن جەر اتانعانى بارشاعا ءمالىم. ەرتەدە وسى وڭىردەن ەۋروپا مەن تاياۋ شىعىسقا ۇلى جىبەك جولى جالعاسقانىن بىلەمىز. بۇل ولكە كاسپي تەڭىزى ارقىلى ەلىمىزدى 4 مەملەكەتپەن بايلانىستىرىپ تۇر. توعىز جولدىڭ تورابىنداعى وبلىس قاي جاعىنان الساق تا ماڭىزى زور ايماق. مادەني جادىگەرلەرى مول، وسى ءوڭىردى اسپان استىنداعى مۇراجاي دەۋگە بولادى. بۇل - ءپىر بەكەت، شاقپاق اتا، شوپان اتا بابالارىمىز ءومىر سۇرگەن جەر. ماڭعىستاۋ - 362 اۋليەنىڭ مەكەنى»، - دەدى قاسىم-جومارت توقاەۆ.

ونىڭ ايتۋىنشا، بۇگىن رۋحىن ۇلىقتاپ وتىرعان ءابىش كەكىلباي - ادامزاتتىق بولمىستىڭ جوعارى دەڭگەيىنە كوتەرىلگەن ءبىرتۋار تۇلعا، قازاق حالقىنىڭ ۇلى پەرزەنتى.

«حالىقتىڭ ماقتانىشىنا اينالعان ازاماتتاردىڭ ەسىمىن جادىمىزدان شىعارماۋ – بارشامىزدىڭ پارىزىمىز. ەلباسىنىڭ «شىركىن-اي، وسىنداي قازاق كوبىرەك بولسا ەكەن»، دەپ ءابىش اعاعا ريزاشىلىعىن ءبىلدىرۋى تەگىن ەمەس. زيالى قاۋىم وعان ايرىقشا قۇرمەت كورسەتىپ، قازاقتىڭ ماڭدايى دەپ اتادى. ءابىش كەكىلباەۆ - «قازاقستاننىڭ ەڭبەك ەرى» اتاعىن العان تۇڭعىش قالامگەر»، - دەدى مەملەكەت باسشىسى.

اقتاۋ قالاسىنداعى 19ا شاعىن اۋداندا بوي كوتەرگەن ەسكەرتكىشتىڭ اۆتورى - ءمۇسىنشى، سۋرەتشى كوشەر بايعازيەۆ. ەسكەرتكىش قولادان تۇرعىزىلعان. بيىكتىگى – 3،5 مەتر. سالماعى - 3،5 توننا. ءمۇسىن تۇعىرىنىڭ بيىكتى – 2،4 مەتر. قۇرىلىس جۇمىستارى 2019 جىلى مامىردا باستالعان. قۇنى 48 ملن تەڭگە بولاتىن جوبانىڭ دەمەۋشىسى - NCOC كومپانياسى.

ايتا كەتەيىك، بيىل ادەبيەتىمىزدىڭ الىپ بايتەرەگى ءابىش كەكىلباي ۇلىنىڭ تۋعانىنا 80 جىل تولدى. وسىعان وراي، ابىزدىڭ تۋىپ-وسكەن جەرى ماڭعىستاۋدا مەرەيتوي حالىقارالىق دەڭگەيدە تويلانباق. رەسپۋبليكانىڭ تۇكپىر-تۇكپىرىنەن قالامگەردىڭ زامانداستارى، اقىن-جازۋشىلار، قوعام قايراتكەرلەرى - بارلىعى 100-گە جۋىق ادام ارنايى قاتىسادى دەپ كۇتىلۋدە. سونىمەن قاتار بۇگىن اباي اتىنداعى مادەني-دەمالىس كەشەنىندە ءابىش كەكىلباي ۇلىنىڭ 80 جىلدىعىنا ارنالعان شارالاردىڭ رەسمي اشىلۋ سالتاناتى بولادى. وعان مادەنيەت جانە سپورت ءمينيسترى اقتوتى رايىمقۇلوۆا قاتىسادى دەپ جوسپارلانعان.

ەسكە سالا كەتەيىك، بۇگىن مەملەكەت باسشىسى قاسىم-جومارت توقاەۆ جۇمىس ساپارىمەن اقتاۋعا كەلدى.

سوڭعى جاڭالىقتار

اۋىز سۋ ساپاسى قالىپقا كەلتىرىلدى

قازاقستان • بۇگىن، 18:04

انا ءتىلى – ارىڭ بۇل...

رۋحانيات • بۇگىن، 13:10

كۇرەس: العاشقى كۇنى ءۇش قولا

كۇرەس • بۇگىن، 09:00

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار