ايماقتار • 09 شىلدە، 2019

پاۆلوداردا قالالىق اۆتوبۋس پاركى 76%-عا جاڭاردى

125 رەتكورسەتىلدى

وتكەن اپتادان بەرى وبلىس ورتالىعىندا جاڭارتىلعان ەلەكتروبۋستار، جاڭا اۆتوبۋستار، ترامۆايلار جۇرە باستادى.

 - ەلەكتروبۋستار قالا تۇرعىندارىنىڭ قوزعالىسىن جايلى ەتىپ قانا قويماي، قوعامدىق كولىكتى دامىتۋدىڭ جاڭا درايۆەرىنە اينالادى. ەلەكتروبۋستار قاتتى دىبىسسىز جۇرەدى ءارى اۋاعا تارالاتىن زياندى قالدىقتار شىعارمايدى،-دەيدى وبلىس اكىمى بولات باقاۋوۆ.

ەلەكتروبۋستاردىڭ ءبىرىن جۇرگىزىپ كوردى. ول رۋلگە ءوزى وتىرىپ، قالا ىشىمەن ءجۇردى. بىراق،  ءىشى-سىرتى ابدەن توزعان، جولاۋشىلارعا اسا قاۋىپتى شاعىن اۆتوبۋستاردى دا جۇرگىزىپ كورسە، ءوز كوزىمەن «جايلى  جاعدايدى» كورەر ەدى.

قالاداعى  «№1 اۆتوبۋس پاركى» جشس-ءنىڭ مالىمەتىنشە، 20 «انكاي» ماركالى  ديزەل وتىنىمەن جۇرەتىن اۆتوبۋستار جەتكىزىلدى. سونىمەن بىرگە، سىيىمدىلىعى ۇلكەن ەلەكتروبۋستار كەلدى. ناتيجەسىندە، قالالىق اۆتوبۋس پاركى 76 پايىزعا جاڭاردى.

جاڭا قوعامدىق كولىكتەر №5، 10، 21، 22 باعىتتارىنداعى قالالىق مارشرۋتتاردا، سونداي-اق، وبلىس ورتالىعىنىڭ اۋىلدىق اۋماقتارىنىڭ اراسىنداعى مارشرۋتتارعا قىزمەت كورسەتەدى. ەلەكتروبۋستار 2013-2020 جىلدارعا ارنالعان ەلىمىزدىڭ  «جاسىل ەكونوميكاعا» كوشۋ كونتسەپتسياسىن جۇزەگە اسىرۋ شەڭبەرىندە ساتىپ الىنىپتى.

- اۆتوبۋستار مەن ەلەكتروبۋستاردا جولاۋشىلاردىڭ جايلىلىعى ءۇشىن، اسىرەسە، مۇمكىندىگى شەكتەۋلى جاندار ءۇشىن بارلىق جاعداي جاسالعان، – دەدى «بايتەرەك» حولدينگىنىڭ باسشىسى ايدار ءارىپحانوۆ. – ەلىمىزدە بىرنەشە كاسىپورىن ەلەكتروبۋستاردى جاساپ شىعارۋمەن اينالىسادى.

سونىمەن قاتار، پاۆلودارعا 4 جاڭا ترامۆاي جەتكىزىلدى. ترامۆاي باسقارماسىنىڭ كولىكتەرىن جاڭعىرتۋ شەڭبەرىندە قىركۇيەك ايىندا بەلورۋستىق «بەلكوممۋنماش» زاۋىتىندا قۇراستىرىلعان تاعى دا 5 ۆاگون اكەلىنۋى كەرەك.

پاۆلودار

سۋرەتتى تۇسىرگەن: ۆالەري بۋگاەۆ



سوڭعى جاڭالىقتار

ۇقساس جاڭالىقتار