رۋحانيات • 13 مامىر، 2019

قاراعاندىدا «كارتينالار. GIF» قويىلىمى كورەرمەندى ءتانتى ەتتى

675 رەت كورسەتىلدى

كەنشىلەر استاناسىندا وبلىستىق بەينەلەۋ ونەرى مۇراجايى مەن «قۇپيا بازا» شىعارماشىلىق بىرلەستىگى تىزە قوسىپ، «كارتينالار. GIF» اتتى توسىنسىيعا تولى قويىلىمدى كورەرمەن نازارىنا ۇسىندى.

مۇراجايدا وتكەن سپەكتاكل بارىسىندا ونەرسۇيەر قاۋىم ايگىلى «قارا شارشى» كارتيناسىنىڭ اۆتورى كازيمير مالەۆيچتىڭ ءرولىن ويناعان اقىننىڭ ءومىر تۋرالى تولعانىسىنا، «يتاليالىق ءتالتۇس» كارتيناسىنداعى كەيىپكەردىڭ گيتارادا شەبەر ويناعانىنا جانە تاعى باسقا دا اتاقتى ونەر تۋىندىلارىنا قاتىستى ءساتتى شىققان ءتۇرلى وبرازدار شەشىمىنە ءتانتى بولدى.

اسىرەسە، ءامىرالى قوجاعۇلوۆ بەينەسىن سومداعان كازيمير مالەۆيچتىڭ «قارا شارشىسى» كورەرمەن قاۋىمنىڭ ەرەكشە ءىلتيپاتىنا بولەندى.  اۆتور قارا ماتامەن جابىلعان شارشى نىسان استىندا وتىرىپ، ءوزىنىڭ ولەڭدەرىن وقىدى. «ادامدار قانشالىقتى قاتىگەز؟»، «نە ءۇشىن ءومىر ءسۇرىپ ءجۇرمىز؟»، «ارتىمىزدا نە قالدىرماقپىز؟»، دەگەن سالماقتى سۇراقتارى بار كۇردەلى تاقىرىپتار توڭىرەگىندە وي تولعادى. ارا-اراسىندا قارا جاشىك ىشىنەن كورەرمەنگە قاراي ىشىندەگى مازمۇنى ارقيلى حاتتار لاقتىرىلىپ وتىردى. ول جازبالاردى وقىعان قاۋىم اۆتورمەن اڭگىمە-دۇكەن قۇرىپ، وي-پىكىر ءبولىستى.

سونىمەن قاتار، سپەكتاكلدە يرينا دەرگۋنوۆا سۋرەتشى كارل بريۋللوۆتىڭ «يتاليالىق ءتالتۇس» كارتيناسىن قالاي سالعانىن ەگجەي-تەگجەيلى بايانداپ بەرسە، ۆاديم كيم ايگىلى ۆان گوگتىڭ «اۆتوپورترەت» كارتيناسىن تاڭداپ، قىلقالام شەبەرىنىڭ وبرازىن شىنايى سومداپ شىقتى. ال ۆاسيليسا ۆەلمان بولسا، «كوڭىلدەستەر» تۋىندىسىنداعى مارك شاگالانىڭ زايىبى بەللا روزەنفەلدتىڭ بەينەسىن كورەرمەن نازارىنا ۇسىندى.

بەينەلەۋ ونەرى مۇراجايى ديرەكتورىنىڭ ورىنباسارى الەكساندر گەحتتىڭ ايتۋىنشا، سپەكتاكلگە قاجەتتى كوستيۋمدەر مەن جابدىقتاردى، كارتينالار مەن ولارعا ارنالعان ولەڭ جانە ءسوز ماتىندەرىن اۆتورلاردىڭ وزدەرى تاڭداپ، ازىرلەگەن  ەكەن.

ءۇش جىلدان استام ۋاقىتتان بەرى جۇمىس ىستەپ كەلە جاتقان «قۇپيا بازا» – قاراعاندىلىق اقىندار مەن پروزايكتاردىڭ جانە مۋزىكانتتاردىڭ شىعارماشىلىق بىرلەستىگى.

– «قۇپيا بازانىڭ» قۇرامى ءجيى وزگەرىپ تۇرادى. بىرەۋ كەتەدى، جاڭادان ادامدار كەلەدى. قازىر بىرلەستىكتە 12 اۆتور بار. ەسكى گۆارديادان مەن جانە ميحايل پاپۋشا ەكەۋىمىز عانا قالدىق، – دەيدى شىعارماشىلىق كەشتەردى ۇيىمداستىرۋشى، جوبا اۆتورلارىنىڭ ءبىرى ۆاسيليسا ۆەلمان.

قازىرگى تاڭدا شىعارماشىلىق بىرلەستىك ەلىمىزدەگى بىرقاتار قالاداعى  ارىپتەستەرىمەن شىعارماشىلىق تىعىز قارىم-قاتىناس ورناتقان.

«كارتينالار. GIF» سپەكتاكلى «ارت-تەراپيا» جوباسى اياسىندا ۇيىمداستىرىلدى.



سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار