14 ءساۋىر، 2019

ريددەر اكىمى حالىقپەن بايلانىس جاساۋ ءۇشىن 14 توپتا وتىرادى

802 رەت كورسەتىلدى

ريددەر قالاسىنىڭ اكىمى جومارت مۇراتوۆ حالىقپەن تىعىز قارىم-قاتىناس ورناتۋ ءۇشىن whatsapp (ۆاتساپ) الەۋمەتتىك جەلىسىندە 14 توپقا تىركەلگەن ەكەن.

پرەزيدەنت قاسىم-جومارت توقاەۆ مەملەكەتتىك قىزمەت­شى­لەرگە حالىقپەن جاقىن بولۋ ءۇشىن الەۋمەتتىك جەلىلەردى كەڭىنەن قولدانۋ قاجەتتىگىن تاپسىرعان ەدى. مەملەكەت باسشىسىنىڭ تاپسىرماسىنان سوڭ وبلىس اكىمدەرى بىرىنەن سوڭ ءبىرى الەۋمەتتىك جەلىلەردە ءوز پاراقشالارىن اشا باستادى. وبلىس اكىمى دانيال احمەتوۆ تە 8 ءساۋىر كۇنى فەيسبۋكتە ءوز پاراقشاسىن ىسكە قوستى.

«ايشىلىق الىس جەرلەردەن كوزدى اشىپ، جۇمعانشا جىلدام حابار العىزعان زاماندا» الەۋمەتتىك جەلىنىڭ شەنەۋنىكتەر ءۇشىن عانا ەمەس، الەۋمەت ءۇشىن دە ماڭىزدىلىعى ايتپاسا دا تۇسىنىكتى. بۇگىندە ءوڭىرىمىزدىڭ قالا-اۋداندارىندا دا جەرگىلىكتى اتقارۋشى ورىندار الەۋمەتتىك جەلىنى كەڭىنەن قولدانۋدا. ماسەلەن، ريددەر قالاسىنىڭ اكىمى جومارت مۇراتوۆ حالىقپەن تىعىز قارىم-قاتىناس ورناتۋ ءۇشىن whatsapp (ۆاتساپ) الەۋمەتتىك جەلىسىندە 14 توپقا تىركەلگەن ەكەن. «بۇل توپتار قالاداعى بارلىق سالا وكىلدەرىن قامتيدى دەۋگە بولادى. جاستار دا، قوعامدىق بىرلەستىكتەر دە، باق وكىلدەرى دە وسى توپتارعا تىركەلگەن. ولاردىڭ ىشىندەگى ەڭ بەلسەندىلەرى - كاسىپكەرلەر. 2013 جىلى اشىلعان توپتا 223 قاتىسۋشى بار. 14 توپتىڭ قاتىسۋشىلارى بۇل جەردە قالا اكىمىنە وزدەرىن تولعاندىرعان ساۋالدارىن تىكەلەي قويا الادى. اقىل-كەڭەس سۇرايدى. شاھار باسشىسى ولاردىڭ ءوتىنىش-تىلەكتەرىنە ءوزى جاۋاپ بەرىپ وتىرادى، بولىمدەرگە تاپسىرما بەرەدى. سونىمەن قاتار قالا اكىمىنىڭ Instagram، Twitter، Telegram الەۋمەتتىك جەلىلەرىندە دە ءوز پاراقشاسى بار»، - دەيدى ريددەر قالاسى اكىمىنىڭ اپپارات باسشىسى اسحات ساعيدولدين.


شىعىس قازاقستان وبلىسى،

ريددەر قالاسى

سوڭعى جاڭالىقتار

ۇقساس جاڭالىقتار