ايماقتار • 11 ءساۋىر، 2019

جاساندى كولدەگى بالىقتىڭ جاپپاي قىرىلۋ سەبەبى انىقتالدى

816 رەت كورسەتىلدى

الماتى وبلىسىنىڭ ىلە اۋدانى اۋماعىنداعى جاساندى كولدىڭ بىرىندە 2 توننعا جۋىق بالىق قىرىلىپ قالعان. بۇل تۋرالى ورمان شارۋاشىلىعى جانە جانۋارلاردى قورعاۋ ينفەكتسياسىنىڭ الماتى وبلىستىق فيليالى ماماندارى دابىل قاقتى. وقيعا 9 ساۋىردە «ءبىرىنشى ماي» اۋىلىنداعى بالىق شارۋاشىلىعىندا بولعان.

قازىر جاساندى كولدەگى بالىقتاردىڭ جاپپاي قىرىلۋ سەبەبى انىقتالدى. اپاتتى جاعداي اۋىل اۋماعىنان وتەتىن الماتى قالاسىنىڭ كارىز جۇيەسىنەن شىققان اقاۋدان كەيىن باستالعان. جاساندى كول ماڭىنداعى جايىلعان لاس سۋدى الدىمەن تۇرعىندار بايقاپ، ءتيىستى ورىندارعا حابارلاعان. قۇبىردى بۇزىپ-جارعان قالدىق جەرگە ءسىڭىپ، بالىق شارۋاشىلىعىنىڭ سۋ قويماسىنا بارىپ قوسىلعان بولۋى كەرەك.

- ءبىز تۇرعان اۋىلدىڭ استىنان قالادان شىعاتىن بارلىق قالدىق سۋ اعىپ وتەدى ەكەن. وتكەن جىلدان بەرى «ءبىرىنشى ماي» اۋىلى مەن قويانقۇس اۋىلدارىنىڭ تۇسىنداعى كارىز جۇيەسىن اۋىستىرۋ جۇمىسى جۇرۋدە. اۋماقتى تۇگەل قازىپ، ۇلكەن قۇبىرلاردىڭ ءبىرىن الىپ، ءبىرىن كومىپ جاتىر. وسى كومىلگەن قۇبىرلاردان قالدىق سۋ اعىپ كەتكەن بولۋى كەرەك. ول جاساندى كولگە قۇيىلىپ، وندا ءوسىپ جاتقان بالىقتاردى ۋلاعان. اكىمدىكتەگىلەر اينالاعا زيانى جوق دەيدى، بىراق جاقىن ماڭنان جاعىمسىز ءيىس شىعادى. اسىرەسە، قىرىلعان بالىقتىڭ ساۋداعا شىعىپ كەتۋىنەن قاۋىپتەنەمىز، - دەيدى «ءبىرىنشى ماي» اۋىلىنىڭ تۇرعىندارى.

اۋدان اۋماعىنداعى بالىق شارۋاشىلىعىندا بولعان اپاتتى وقيعانى ىلە اۋدانىنىڭ اكىمدىگى راستادى. قازىرگى كەزدە جاساندى كولدەگى بالىقتاردىڭ قىرىلۋ سەبەبى ناقتىلاندى. وقيعا ورنىنا بارعان ارنايى كوميسسيا كول سۋىنىڭ قۇرامىندا مولشەردەن تىس امياك قوسپاسى مەن ادام ءزارىنىڭ ۋلى تۇنباسىن انىقتاپ، ول كارىز جۇيەسىنەن شىققان اقاۋ ارقىلى كولگە قۇيىلعان دەگەن شەشىم شىعارعان.

- جاساندى كولدى «بەنت» اكتسيونەرلىك قوعامى جالعا الىپ، بالىق شارۋاشىلىعىمەن اينالىسۋدا. اۋداننىڭ ءتيىستى سالا ماماندارى وقيعا ورىنىنا دەرەۋ بارىپ، جاعدايمەن تانىستى. تۇرعىنداردىڭ ومىرىنە قاۋىپ تونگەن جوق.ۋلانىپ قىرىلعان بالىقتار جويىلدى. كەلتىرىلگەن شىعىن بويىنشا الماتى قالاسىنىڭ ءتيىستى قىزمەتىنە شاعىم جولداناتىن بولادى، - دەدى بىزگە جاعدايدى تۇسىندىرگەن ىلە اۋدانى اكىمىنىڭ ءباسپاسوز حاتشىسى باقتيار تالعات ۇلى.

ال جاساندى كولدە قىرىلىعان بالىق تۇرلەرىنىڭ ساۋداعا شىعىپ كەتۋى جايلى اقپارات راستالمادى. قازىر ەكولوگ مامانداردىڭ تەكسەرۋىنەن وتكەن بالىق ولەكسەسى تولىقتاي جينالىپ الىندى.

- 2 تونناعا جۋىق بالىق ولەكسەسىن ءسۇزىپ، جويۋعا جىبەردىك. بالىق شارۋاشىلىعىنىڭ ۇزاق مەرزىمدەگى ەڭبەگى زايا بولدى. بۇل جەردە نەگىزىنەن تۇقىم شاشاتىن بالىقتار وسەتىن ەدى، تۇگەل قىرىلدى. ەندى الماتى قالاسىنىڭ كوممۋننالدىق قىزمەتىنىڭ ۇستىنەن سوتقا شاعىمدانامىز، - دەدى «بەنت» سەرىكتەستىگىنىڭ وكىلى ا. كۋزيەۆا.

ءمالىم بولعان دەرەك بويىنشا، قالا ماڭىنداعى جاساندى كولدەردە ءىرى كولەمدە بالىق تۇرلەرى وسىرىلەدى. ونىڭ ىشىندە «بەنت» سەرىكتەستىگى 278 گەكتار اۋماقتا بالىق شارۋاشلىعىمەن اينالىسادى. باعىمداعى بالىقتاردى الماتى قالاسى بويىنشا تاماق ونەركاسىبى سالاسى تۇتىنادى. سازان، كارپ، الابۇعا سياقتى بالىق تۇرلەرىنە جۇرتشىلىقتان سۇرانىس كوپ تۇسەدى ەكەن.

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار