ساياسات • 10 ءساۋىر، 2019

راشيد كۇزەمباەۆ «Kazakh Tourism» ۇك» اق باسقارما توراعاسى قىزمەتىنەن ءوز ەركىمەن بوساتىلدى

«Kazakh Tourism» ۇك» اق ديرەكتورلار كەڭەسىنىڭ كەزەكتەن تىس وتىرىسىندا كۇزەمباەۆ راشيد تالاپ ۇلىنىڭ جۇمىستان ءوز ەركىمەن بوساتىلۋى تۋرالى ءوتىنىشى قارالدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.

سۆەتلانا عالىمجانقىزى

ءوتىنىشى قابىلدانعاننان كەيىن، ۇلتتىق كومپانيا ديرەكتورلار كەڭەسىنىڭ مۇشەلەرى راشيد كۇزەمباەۆقا اتقارعان قىزمەتى ءۇشىن العىس ءبىلدىرىپ، الدا جەتىستىكتەرگە جەتە بەرۋگە تىلەك ءبىلدىردى.

ءوز كەزەگىندە كۇزەمباەۆ راشيد تالاپ ۇلى ديرەكتورلار كەڭەسىنىڭ توراعاسى مەن مۇشەلەرىنە سەنىم ءبىلدىرىپ، قولداۋ كورسەتكەندەرى ءۇشىن العىسىن ايتتى، سونداي-اق ۇلتتىق كومپانيانىڭ باسقارما مۇشەلەرىنە، قىزمەتكەرلەرى مەن كوپتەگەن ارىپتەسىنە بىرلەسكەن جۇمىستارى ءۇشىن العىسىن ءبىلدىردى.

كۇزەمباەۆ راشيد تالاپ ۇلى 2017 جىلدىڭ قازان ايىندا «Kazakh Tourism» ۇك» اق باسقارما توراعاسى بولىپ تاعايىندالدى. ءبىر جارىم جىلدان از ۋاقىت ىشىندە ونىڭ جەتەكشىلىگىمەن ۇلتتىق كومپانيانىڭ قالىپتاسۋى، اتاپ ايتقاندا، ەلىمىزدىڭ ۇلتتىق تۋريستىك ءونىمى مەن قازاقستاندىق تۋريستىك برەندتىڭ تۇجىرىمدامالارى جانە ولاردى ناسيحاتتاۋدىڭ ماركەتينگتىك جوسپارى ازىرلەندى. Kazakh Tourism سالالىق مەملەكەتتىك باعدارلاما مەن زاڭ جوباسىن ازىرلەۋگە تىكەلەي قاتىستى، Kazakhstan.travel تۋريزم سالاسىنداعى جاڭارتىلعان ۇلتتىق تۋريستىك پورتال ىسكە قوسىلدى، العاشقى ۇلتتىق سالالىق پرەميا، سونداي-اق ەلىمىزدىڭ تۋريستىك مەكەندەرىن قامتىعان ەڭ ءىرى ەكسپەديتسيا جانە تاعى باسقا شارالاردى ۇيىمداستىردى.

اسىرەسە، Euronews NBC ارناسىندا كورسەتىلگەن «ءبىز قايدا بارامىز؟» اتتى بەينەروليگى جانە تانىمال ءانشى ديماش قۇدايبەرگەن العاش بولىپ كىرگەن قر تۋريزم ەلشىلەرى باعدارلاماسىن ەسكە السا بولادى.

بۇدان باسقا، ۇلتتىق كومپانيا بۇكىلالەمدىك تۋريستىك ۇيىم، ازيا-تىنىق مۇحيتى ساياحات قاۋىمداستىعى، روستۋريزم، وزبەكتۋريزم، Swiss Tourism جانە باسقا ەلدەردىڭ دە ۇلتتىق تۋريستىك كەڭسەلەرىمەن ىنتىماقتاستىق ورناتتى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز