ساياسات • 05 ءساۋىر، 2019

الماتى وبلىسىندا بالا ءولىمى 7،1 % ازايدى

636 رەت كورسەتىلدى

قازىرگى كۇنى الماتى وبلىسىنىڭ تۇرعىندارىنا بارلىعى 806 مەديتسينا مەكەمەسى قىزمەت كورسەتىپ وتىر. ولاردىڭ ىشىندە 643 مەملەكەتتىك دەنساۋلىق ساقتاۋ نىسانى مەن 163 جەكەمەنشىك ورتالىق پەن ەمحانا بار.

بۇل تۋرالى «Nur Otan» پارتياسى وبلىستىق فيليالىندا وتكەن «دەنساۋلىق» باعىتى بويىنشا پارتيالىق تىڭداۋدا وبلىستىڭ باس دارىگەرى باۋىرجان ىسقاق ايتتى. ونىڭ مالىمدەۋىنشە، قازىرگى تاڭدا ايماقتاعى مەديتسينا قىزمەتكەرلەرىنىڭ ۇلەسىن 4765 دارىگەر مەن 14961 مەدبيكە قۇرايدى. ال تۇرعىنداردىڭ دارىگەرمەن قامتىلۋى تۇرعىسىنان العاندا، الماتى وبلىسىندا 10 000 ادامعا شاققاندا 26،9 ادامعا ءبىر دارىگەردەن كەلەدى ەكەن. سونداي-اق، وبلىس بويىنشا 1834854 ادامعا «ەلەكتروندى دەنساۋلىق پاسپورتى»  بەرىلگەن. بۇل ايماقتاعى تۇرعىنداردىڭ 90،6 پروتسەنتىن قۇراعان. قازىر جەتىسۋ ءوڭىرىن 2 025 200 ادام مەكەندەيدى.

- وبلىس دارگەرلەرىنىڭ ەڭبەگىن لايىقتى اتاۋىمىز كەرەك. اق جەلەڭدى ابزال جاندار جۇمىسىنىڭ ناتيجەسىندە وتكەن جىلى ايماقتاعى جالپى ءولىم سانى 2،8 پروتسەنتكە ازايدى. ال نارەستەلەردىڭ شەتىنەۋى 7،1 پروتسەنتكە كەمىدى. بۇل بۇرناعى كەزەڭمەن سالىستىرعاندا ايتارلىقتاي جاقسى كورسەتكىش. اسىرەسە، سوزىلمالى، جۇقپالى اۋرۋلاردىڭ الدىن الۋدا ناتيجە بار. ماسەلەن، قان اينالىم جۇيەسى اۋرۋى سالدارىنان بولاتىن ءولىم 8 پروتسەنتكە تومەندەسە، تۋبەركۋلەزدەن اجال قۇشقاندار دەرەگى 12،5 پروتسەنتكە ءتۇستى. دارىگەرلەردىڭ كاسىبي كومەگىنىڭ ارقاسىندا قاتەرلى ىسىككە شالدىققاندار اراسىنداعى ءولىم-ءجىتىم دە ازايىپ، كوز جۇمعاندار قاتارى 2،8 پروتسەنتكە تومەندەدى، - دەدى الماتى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.

سوڭعى جاڭالىقتار

ۇقساس جاڭالىقتار