ماۋلەن اشىمباەۆ كوپ بالالى انالاردى قابىلدادى

قابىلداۋعا ەلىمىزدىڭ كەيبىر وڭىرىندەگى ازاماتتار بەينەكونفەرەنتسيا بايلانىسى ارقىلى قاتىستى. سولاردىڭ ءبىرى تۇركىستان وبلىسى كەنتاۋ قالاسىنىڭ تۇرعىنى، كوپ بالالى جانە جالعىزباستى انا ناعيما ومىرزاقوۆا. ول پارتيادان كۇن كورىس دەڭگەيىنە بايلانىستى مەملەكەت تاراپىنان كورسەتىلەتىن اتاۋلى الەۋمەتتىك كومەك الۋعا جاردەم سۇراي كەلگەن.

ال الماتى وبلىسىنىڭ تۇرعىنى، 8 بالانىڭ اناسى گاۋھار شالعىنباەۆا ءوزىنىڭ جەر تەلىمى بار ەكەنىن ايتىپ، ەندى ءۇي سالۋ ءۇشىن قولداۋ كورسەتىلسە دەگەن ءوتىنىشىن جەتكىزدى. جالعىزباستى انانىڭ بار تىلەگى بالالارىن باسپانامەن قامتۋ.

پاۆلودارلىق ەلەنا كۋكۋرۋزا دا 4 بالاسىن ءبىر ءوزى تاربيەلەپ وتىر. بۇگىندە بالالارى ءۇشىن الاتىن جاردەماقىعا پاتەر جالداپ وتىرعان ول پارتيادان باسپانا ماسەلەسى بويىنشا قانداي دا ءبىر كومەك بولسا دەگەن ءوتىنىشىن جەتكىزدى. سونداي-اق نۇر-سۇلتان قالاسىنىڭ تۇرعىنى، «التىن القا» يەگەرى، جولداسىنان ەرتە ايىرىلعان قۇرالاي اقاەۆا دا پارتيادان ماتەريالدىق كومەك سۇراپ، ءوتىنىشىن ءبىلدىردى.

ماۋلەن اشىمباەۆ ولاردىڭ بارلىعىنا «حالىققا كومەك» جوباسى اياسىندا زاڭ شەڭبەرىندە ءتيىستى كومەك كورسەتىلەتىنىن ايتىپ، پارتيانىڭ بىرقاتار ايماقتىق فيليالدارىنا ناقتى تاپسىرمالار بەردى. ءوز كەزەگىندە فيليال توراعالارىنىڭ ءبىرىنشى ورىنباسارلارى اتالعان ماسەلەلەردى وڭ شەشۋدىڭ ءتيىمدى تەتىكتەرىن قاراستىرىپ قويعانىن جەتكىزدى. سوندىقتان كوپ بالالى انالاردىڭ ماسەلەلەرى كوپ ۇزاماي وڭ شەشىمىن تابادى دەۋگە تولىق نەگىز بار.

«Nur Otan» پارتياسى توراعاسى ءبىرىنشى ورىنباسارىنىڭ قابىلداۋىنا كەلگەن دارحان ءبىلالوۆ جۇمىس تابا الماي جۇرگەنىن ايتتى. قۋانىشقا وراي بۇل ماسەلە دەرەۋ شەشىمىن تاۋىپ، جاس مامان تۇراقتى جۇمىسپەن قامتىلدى. ەندى ول پارتيانىڭ قوعامدىق قابىلداۋ بولمەسىندە جۇمىس ىستەيتىن بولدى.

– پارتيا ەلباسىنىڭ تاپسىرماسىمەن قولعا الىنعان «حالىققا كومەك» جوباسى ارقىلى ازاماتتارعا ناقتى كومەك كورسەتەدى. قيىندىققا تاپ بولعان ازاماتتار دەر كەزىندە ءبىزدىڭ قولداۋىمىزدى سەزىنۋى ءتيىس. سول ءۇشىن «بىرىڭعاي الەۋمەتتىك تەرەزە» جۇيەسىن ىسكە قوستىق. قازىردىڭ وزىندە جوبا ءوز جەمىسىن بەرە باستادى. الداعى ۋاقىتتا بۇل باستاما پارتيانىڭ حالىققا قولداۋ كورسەتۋ باعىتىنداعى جۇمىستارىن جاڭا دەڭگەيگە شىعارادى دەپ سەنەمىز، – دەدى ماۋلەن اشىمباەۆ.

ايتا كەتەيىك، «حالىققا كومەك» جالپىۇلتتىق جوباسى ەلباسى پارتيانىڭ كەزەكتى XVIII سەزىندە انىقتاپ بەرگەن الەۋمەتتىك باسىمدىقتاردىڭ ءبىرى. ونىڭ نەگىزگى ماقساتى – حالىقتى الاڭداتقان وزەكتى ماسەلەلەردى شەشۋگە پارتيا تاراپىنان ناقتى ۇلەس قوسۋ. ول ءۇشىن پارتيانىڭ بارلىق فيليالىندا جۇمىس ىستەيتىن قوعامدىق قابىلداۋ بولمەلەرىندە بىرىڭعاي الەۋمەتتىك تەرەزەلەر اشىلدى. سول ارقىلى حالىقتى الاڭداتقان بارلىق وزەكتى الەۋمەتتىك ماسەلەلەردى دەرەۋ انىقتاپ، جان-جاقتى تالداپ، ولاردى وڭ شەشۋ ءۇشىن مەملەكەتتىك ورگاندارمەن، ۇكىمەتتىك ەمەس ۇيىمدارمەن جانە بيزنەس قاۋىمداستىقپەن بىرلەسىپ جۇمىس ىستەلمەك.

قوعامدىق قابىلداۋ بولمەلەرىنىڭ مەكەنجايلارى پارتيانىڭ رەسمي سايتىندا تولىق كورسەتىلگەن. ودان بولەك، ازاماتتار ۇيالى تەلەفون، الەۋمەتتىك جەلىلەر، ۆاتساپ مەسسەندجەرى، ەلەكتروندى پوشتالار، ەلەكتروندى ۇكىمەت ارقىلى دا ءوز وتىنىشتەرىن جولداۋعا مۇمكىندىك قاراستىرىلعان. وسىلايشا پارتيا ءار ءوتىنىشتى مۇقيات قاراپ، ونىڭ وڭ شەشىلۋىنە ىقپال ەتپەك.

وسىعان بايلانىستى بۇگىنگى قابىلداۋدا الەۋمەتتىك جەلىلەر مەن مەسسەندجەرلەر ارقىلى كەلگەن وتىنىشتەر دە قارالىپ، ولاردىڭ شەشۋ جولدارى پىسىقتالدى. اتاپ ايتقاندا، جاس كاسىپكەرلەر قاراعاندىلىق الەكسەي لي مەن الماتىلىق اڭسار وڭالباەۆ وتىنىشتەرىن الەۋمەتتىك جەلى مەن ەلەكتروندى پوشتا ارقىلى جولداپ، ءوز ىستەرىنە پارتيا تاراپىنان قولداۋ كورسەتىلۋىن سۇراعان. سوعان بايلانىستى الداعى ۋاقىتتا وسى باعىتتا ءتيىستى جۇمىستار قولعا الىناتىن بولدى.

سونداي-اق قابىلداۋعا «كەدەرگىسىز كەلەشەك»، «مەكتەپ اسحانالارى» سياقتى پارتيالىق جوبالارعا قاتىستى ۇتىمدى ۇسىنىستارىن بىلدىرگەن بەلسەندى ازاماتتار دا كەلدى. الماتى قالاسىنىڭ تۇرعىنى، حالىقارالىق بيزنەس اكادەمياسى كوللەدجىنىڭ وقىتۋشىسى ناتاليا كراسنوۆا مۇمكىندىگى شەكتەۋلى ازاماتتارعا قولداۋ كورسەتۋ باعىتىندا ستۋدەنتتەر تەاترىن اشقانىن ايتتى.

– جوبانىڭ باستى ماقساتى – مۇمكىندىگى شەكتەۋلى جانداردىڭ جاڭا قىرلارىن اشىپ، ومىرگە دەگەن قۇلشىنىستارىن ارتتىرۋ. تەاتر ترۋپپاسىنىڭ قۇرامىندا كوللەدج ستۋدەنتتەرى مەن «رۋح» مۇمكىندىگى شەكتەۋلى جاندار ورتالىعىنىڭ جاستارى بار. قازىردىڭ وزىندە نۇر-سۇلتان، الماتى قالالارىنداعى ساحنالارعا شىعىپ، 24 سپەكتاكل قويدىق. الداعى ۋاقىتتا وسى يگى ىسكە پارتيا قولداۋ كورسەتسە دەيمىز، – دەيدى ن.كراسنوۆا.

ماۋلەن اشىمباەۆ بۇل باستامانىڭ قامكوڭىل جاندار ءۇشىن بەرەرى مول ەكەنىن ايتىپ، پارتيانىڭ «كەدەرگىسىز كەلەشەك» جوباسى اياسىندا وسى باعىتتا اتقارىپ جاتقان جۇمىستارىنا توقتالىپ ءوتتى. ودان بولەك، پارتيا توراعاسىنىڭ ءبىرىنشى ورىنباسارى تەاتر جۇمىسىن كەڭىنەن ناسيحاتتاۋ ءۇشىن «Nur Otan» تاراپىنان اقپاراتتىق قولداۋ كورسەتىلەتىنىن جەتكىزدى.

«مەكتەپ اسحانالارى» پارتيالىق جوباسى بويىنشا ءوز ۇسىنىستارىن ايتا كەلگەن تاماقتانۋ ماسەلەلەرى ينستيتۋتىنىڭ ديرەكتورى، مەديتسينا عىلىمدارىنىڭ دوكتورى، پروفەسسور ەربولات دالەنوۆ، دۇرىس تاماقتانۋ بىرلەستىگىنىڭ توراعاسى قابىكەن زاكاريانوۆ جانە مەكتەپتەرگە دۇرىس تاماقتانۋ جۇيەسىن ەنگىزۋ قاۋىمداستىعىنىڭ توراعاسى مارات باەلوۆ ءبىلىم وشاقتارىنداعى تاماقتانۋ جۇيەسىنە كوڭىلدەرى تولمايتىندارىن جەتكىزدى. بۇل ماسەلەنى عىلىمي تۇرعىدا قايتا قاراپ، ورتاق جۇيە ەنگىزۋ كەرەكتىگىن ايتقان ولار جاس بۋىننىڭ دەنى ساۋ، باسەكەگە قابىلەتتى بولىپ قالىپتاسۋى ءۇشىن وسى ءىستىڭ ماڭىزى زور ەكەنىنە باسا ءمان بەردى.

بۇل جونىندە «Nur Otan» پارتياسى توراعاسىنىڭ ءبىرىنشى ورىنباسارى پارتيانىڭ وسى باعىتتا قولعا العان جۇمىستارىنا نازار اۋدارىپ، بيىلدىڭ وزىندە مەملەكەتتىك ورگانداردىڭ جانە ۇكىمەتتىك ەمەس ۇيىمداردىڭ قاتىسۋىمەن ەلىمىز بويىنشا 3500 مەكتەپ اسحاناسىنىڭ جۇمىسى تەكسەرىلەتىنىن ايتتى.

قوعامدىق قابىلداۋ كەزىندە ءوز اۋىلىن اۋىز سۋمەن قامتۋ ماسەلەسىن كوتەرگەن سولتۇستىك قازاقستان وبلىسى اققايىڭ اۋدانى قيالى اۋىلىنىڭ تۇرعىنى تاتيانا يۆانوۆانىڭ دا ءوتىنىشى تىڭدالدى. پارتيانىڭ وبلىستىق فيليالى توراعاسىنىڭ ءبىرىنشى ورىنباسارى قازىرگى تاڭدا بۇل ماسەلە بويىنشا وڭىردە «قۇتتى مەكەن» پارتيالىق جوباسى اياسىندا ناقتى جۇمىستار قولعا الىنعانىن ايتىپ، بارلىق ءىس-ارەكەت پارتيانىڭ باقىلاۋىندا بولاتىنىن جەتكىزدى.

ءىس-شارا سوڭىندا ماۋلەن اشىمباەۆ قابىلداۋ ناتيجەسى بويىنشا انىقتالعان ماسەلەلەردى وڭ شەشۋ ءۇشىن پارتيانىڭ ورتالىق اپپاراتى مەن بارلىق ايماقتىق جانە اۋماقتىق فيليالدارىنا تاپسىرمالار بەرىپ، ءار ءوتىنىشتىڭ قاراۋسىز قالماۋى كەرەكتىگىن ەرەكشە اتاپ ءوتتى.