قازاقستان • 18 ناۋرىز، 2019

قولجەتىمدى نەسيە بەرۋدىڭ باستاپقى جوباسى قازاقستاندىق ءسۇت ونەركاسىبىنە باعىتتالادى

774 رەتكورسەتىلدى

بۇگىن «دامۋ» قورى باسىم جوبالارعا قولجەتىمدى نەسيە بەرۋ باعدارلاماسى بويىنشا جامبىل وبلىسىنداعى مەركە ىرىمشىك زاۋىتىنا العاشقى سۋبسيديا بەردى. سىياقى مولشەرلەمەسى 14،95% قۇرادى، ونىڭ 6،95%-ن مەملەكەت سۋبسيديالايدى. قارىز سوماسى – 16 ملن تەڭگە، مەرزىمى – 7 جىل، دەپ حابارلايدى «دامۋ» كاسىپكەرلىكتى دامىتۋ قورى» اق ءباسپاسوز قىزمەتى.

بولىنگەن قاراجاتقا كاسىپكەر ءونىم تۇرلەرى مەن جانە شىعارىلاتىن ءونىم سانىن ايتارلىقتاي كوبەيتۋ ءۇشىن ءوزىنىڭ وندىرىستىك جەلىسىن مودەرنيزاتسيالاۋعا جۇمساۋدى جوسپارلاپ وتىر. كاسىپورىن باسشىسى داستان ايتولەنوۆتىڭ ايتۋىنشا، «دامۋ» قورىنىڭ قولداۋىمەن «بانك تسەنتركرەديت» اق-تان الىنعان قارىز سىر زاۋىتىنىڭ قۋاتىن 10-12%-عا ارتتىرۋعا مۇمكىندىك بەرەدى، بۇل قايتا وڭدەلگەن ءونىم ءوندىرىسىن 10-15%-عا ۇلعايتادى. سونىڭ ناتيجەسىندە قوسىمشا جۇمىس ورىندارىن اشۋ جوسپارلانىپ وتىر. ناتيجەسىندە بيۋدجەتكە جىل سايىن 40 000 000 تەڭگەدەن استام سالىق تۇسىمدەرى تۇسەتىن بولادى. جوبا 2019 جىلدىڭ ءساۋىر ايىندا اياقتالادى دەپ مەجەلەنگەن. وسى مەرزىمگە دەيىن جابدىقتاردى مونتاجداۋدى اياقتاپ، ىسكە قوسۋ كوزدەلگەن.       

«قولجەتىمدى نەسيە بەرۋ مەحانيزمىنىڭ ءبىر  باعىتى – ەكونوميكانىڭ باسىم سالالارىندا قىزمەت ەتەتىن كاسىپكەرلەردى ىنتالاندىرۋ، بۇل ەكىنشى دەڭگەيدەگى بانكتەر بەرەتىن نەسيەلەر بويىنشا سىياقى مولشەرلەمەسىن سۋبسيديالاۋدى كوزدەيدى. مەحانيزمدى ىسكە اسىرۋدىڭ ناتيجەسىندە وتاندىق تاۋارلار ءوندىرىسىنىڭ كولەمى ۇلعايادى جانە يمپورتتى الماستىراتىن جاڭا ءوندىرىس ورىندارى اشىلادى دەپ ويلايمىز»، – دەيدى «دامۋ» قورىنىڭ باسقارما توراعاسىنىڭ ورىنباسارى گاۋحار بورىباەۆا.

«بانك تسەنتركرەديت» اق جاڭا باستاماعا بەلسەندى قاتىسىپ، قولجەتىمدى نەسيە مەحانيزمىن جۇزەگە اسىرۋدا نەسيە بەرگەن العاشقى بانكتەردىڭ ءبىرى بولدى. «وتاندىق بيزنەستى قولداۋ – تسەنتركرەديت بانكى قىزمەتىنىڭ نەگىزگى جانە باسىم باعىتتارىنىڭ ءبىرى. تسكب، الەۋمەتتىك جاۋاپكەرشىلىك كوتەرەتىن قارجى ينستيتۋتى رەتىندە ەكونوميكانىڭ ناقتى سەكتورىن دامىتۋدىڭ ماڭىزدىلىعى مەن قاجەتتىلىگىن تۇسىنەدى. بۇگىن بەرىلگەن قارىز جامبىل وبلىسىنداعى وتاندىق ازىق-ت ۇلىك ونىمدەرى ءوندىرىسىن دامىتۋعا ىقپال ەتۋى ءتيىس، – دەيدى باسقارما توراعاسى عالىم حۋساينوۆ.

ەستەرىڭىزگە سالا كەتەيىك، باسىم جوبالاردى نەسيەلەۋ مەحانيزمى جىلدىق 15%-عا دەيىنگى سىياقى مولشەرلەمەسىمەن نەسيە بەرۋدى كوزدەيدى، سىياقى مولشەرلەمەسىنىڭ  جىلدىق 7%-ىنا دەيىن «دامۋ» قورى سۋبسيديالايدى. كاسىپكەرلەردى قارجىلاندىرۋ «بيزنەستىڭ جول كارتاسى – 2020» بيزنەستى قولداۋ مەن دامىتۋدىڭ مەملەكەتتىك باعدارلاماسىنىڭ قولدانىستاعى تالاپتارىنا سايكەس، وڭدەۋشى ونەركاسىپ جانە اگروونەركاسىپ سەكتورى سالاسىنداعى جوبالار ارقىلى جۇزەگە اسىرىلادى.

ايناش ەسالي،

«Egemen Qazaqstan»

الماتى

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

ۇقساس جاڭالىقتار