ايماقتار • 18 ناۋرىز، 2019

ەكسپورتقا كەدەرگى كەلتىرەتىن جاعدايلار تالقىلاندى

726 رەتكورسەتىلدى

كاسىپكەرلەر پالاتاسىندا  كەدەن وداعىنىڭ جوبا تۇرىندەگى جانە كۇشىنە ەنگەن تەحنيكالىق رەگلامەنتتەرىن قاراۋ جونىندەگى اقتوبە وڭىرلىك شتابىنىڭ كەزەكتى جيىنى ءوتتى.

وتىرىسقا وڭىرلىك شتاب مۇشەلەرى، كاسىپكەرلەر، باتىس قازاقستان وڭىرارالىق گەولوگيا جانە جەر قويناۋىن پايدالانۋ دەپارتامەنتى، يندۋستريالدى دامۋ جانە ونەركاسىپتىك قاۋىپسىزدىك كوميتەتى، اقتوبە وبلىسى «مەمساراپتاما»رمب اقتوبە فيلالى،  «قازمەترين» رمك اف، «اقتوبەمۇنايگاز» اق، «قازاقويل» جشس وكىلدەرى جانە ت.ب قاتىستى.

شتابتىڭ بۇگىنگى باسقوسۋىندا ەكسپورتقا شىعارىلاتىن تاۋارلارعا بەلگىلەنگەن ستاندارتتاردىڭ ورىندالۋى مەن 2018 جىلدىڭ 5 قازانىندا مەملەكەت باسشىسى قول قويعان ستاندارتتاۋدىڭ ۇلتتىق جۇيەسىن جەتىلدىرۋگە باعىتتالعان «ستاندارتتاۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋگە بايلانىستى پىكىرلەر تىڭدالدى. اقتوبە وبلىسى ستاندارتتاۋ جانە مەترولوگيا دەپارتامەنتىنىڭ باسشىسى كۇلشات وماربەكوۆنانىڭ ايتۋىنشا، ەكسپورتتالاتىن تاۋارلاردىڭ كەدەن بەكەتىنەن ءوتۋ بارىسىندا كوپتەگەن كەمشىلىكتەر ورىن الادى. سايكەسىنشە، تاۋارلار شەكارادان وتكىزىلمەي، كاسىپكەرلەر شىعىنعا باتاتىن جاعدايلار ءجيى كەزدەسىپ تۇرادى. وعان سايكەستىك تۋرالى قۇجاتتاردى بەرەتىن جەكە كومپانيالاردىڭ قۇزىرەتتىلگىنىڭ تومەندىگى جانە ولار بەرگەن كەيبىر انىقتامالاردىڭ جارامسىزدىعى سەبەپ بولۋدا.

«كوپ جاعدايدا كاسىپكەردىڭ ونىمدەرى ساپالى بولعانىمەن، قۇجاتتارىنىڭ حالىقارالىق ستاندارتتاعا ساي جاسالماۋى تاۋاردى ەكسپورتتاۋعا كەدەرگى كەتىرىلۋدە. بۇل ماسەلە جالپى ەكونميكامىزدىڭ باسەكەلەستىككە قابىلەتتىلىگىنە نۇقسان كەلتىرۋى مۇمكىن. سوندىقتان، ءونىمدى ساپالى وندىرۋمەن قاتار، ونى ساپالى راسىمدەۋ دە قاجەت. بۇل ءۇشىن كاسىپكەرلەردىڭ زاڭنامالارداعى جاڭا  تالاپتاردان ۇنەمى قۇلاعدار بولىپ، قىزىعۋشىلىق تانىتۋىن سۇرايمىن»، دەيدى كۇلشات وماربەكوۆا.

مامانداردىڭ ايتۋىنشا، ەكسپورتتالاتىن تاۋاردى ساپالى ەتىپ، شىعارۋ ازدىق ەتەدى، ونى شىعارىلاتىن ەلدىڭ زاڭدارىنا سايكەس دۇرىس راسىمدەۋ قاجەت. ول ءۇشىن كاسىپكەرلەردىڭ تەحنيكالىق باقىلاۋ نورمالارىن قاتاڭ ساقتاۋى-مىندەتتى.كاسىپكەرلەر ونى نارىققا شىعۋعا قولبايلاۋ ەمەس، كەرىسىنشە، مۇمكىندىك دەپ قابىلداعانى ءجون. تەحنيكالىق تالاپتار ساپاسىز تاۋارلارعا توسقاۋىل بولىپ، باسەكەگە قابىلەتتى تاۋارلاردىڭ شىعارىلۋىنا مۇمكىندىك بەرەدى.

«تەحنيكالىق باقىلاۋ تالاپتارى حالىق قاۋىپسىزدىگىن ساقتاۋعا باعىتتالعانى بەلگىلى. ءبىزدىڭ زاڭدارىمىز زاڭ تالاپتارىن ورىندايتىندار ءۇشىن ىڭعايلى، ال ونى بۇزعىسى كەلەتىندەر ءۇشىن مەيلىنشە قاتالدىق كورسەتەدى. ءبىزدىڭ كاسىپكەرلەر ساپالى تاۋارلار شىعارۋعا ىنتالى، ولاردىڭ كوبى باسەكەلەستىككە قابىلەتتى ونىمدەر ءوندىرىپ وتىر. سونىمەن بىرگە، دۇكەن سورەلەرى مەن بازارلارداعى كەيبىر يمپورت تاۋارلاردىڭ ساپاسى سىن كوتەرمەيدى. ءسۇت، شۇجىق ونىمدەرىنىڭ باعاسىنىڭ تىم ارزاندىعىنان-اق ونىڭ ساپاسىزدىعىن بايقاۋعا بولادى. تابيعي ءسۇت پەن ەت ارزان تۇرمايدى. ەندەشە، ستاندارتقا ساي ەمەس وسىنداي تاۋارلاردىڭ ساتىلىمدا تۇرۋىن قالاي تۇسىندىرۋگە بولادى؟ بۇعان جاۋاپتى كەدەن سالاسىنىڭ ماماندارىن بۇگىنگى كەزدەسۋدەن كورە الماي تۇرمىن»، دەدى اقتوبە وبلىسى «اتامەكەن» كاسىپكەرلەر پالاتاسىنىڭ ديرەكتورى انار دارجانوۆا.

وسى ورايدا شتاب مۇشەلەرى كەلەسى وتىرىسقا قۇزىرلى ورگانداردىڭ تۇگەل قاتىسۋىن قامتاماسىز ەتۋ ءۇشىن شتابتىڭ رەسپۋبليكالىق ورتالىعى ارقىلى مەملەكەتتىڭ باسقارۋ ورگاندارىنا ءتيىستى نۇسقاۋ بەرۋ تۋرالى شەشىم قابىلدادى.

سونىمەن قاتار، جينالعاندارعا 2019 جىلدىڭ 11 ساۋىرىنەن باستاپ، قولدانىلۋى ءتيىس «ولشەم بىرلىگىن قامتاماسىز ەتۋ» تۋرالى قر زاڭىنا ەنگىزىلەتىن وزگەرىستەر تۋرالى تالقىلادى. بۇل وزگەرىستەر اتالعان زاڭنىڭ تەرمينالوگيالاردى وزەكتىلەندىرۋ جانە ەاەو كەلىسىم-شارتىنا سايكەستەندىرۋ، ولشەۋدى قامتاماسىز ەتۋ جۇيەسىنىڭ قۇرىلىمىن وزگەرتۋ، قۇجاتتاردى قولدانۋ تۋرالى ەرەجەلەردى وزگەرتۋ، مەملەكەتتىك رەتتەۋگە جاتاتىن ولشەم تىزىمدەرى ارقىلى مەملەكەتتىك رەتتەۋ ۇلگىسىن وزگەرتۋ، اككرەديتتەۋ سۋبەكتىلەرىنىڭ جانە مەملەكەتتىك ەتالوندار كاليبرلەۋىنە  كوشۋ بولىمدەرىنە قاتىستى بولماق.

سونداي-اق، قاتىسۋشىلارعا  «قازمەترين» رمك پورتالىندا وتىنىمدەردى ونلاين تارتىبىندە تىركەۋگە بولاتىن مەترولوگيالىق قىزمەت تۇرلەرى تانىستىرىلدى.

تەمىر قۇسايىن،

«ەگەمەن قازاقستان»

 اقتوبە

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

ۇقساس جاڭالىقتار