16 ناۋرىز، 2019

الەۋمەتتىك الەمنىڭ ءورىسى كەڭ

774 رەتكورسەتىلدى

مەملەكەت باسشىسى ن.ءا.نازارباەۆ تاۋەلسىزدىكتىڭ العاشقى جىلدارىنان ەلىمىزدە بيزنەس پەن كاسىپكەرلىكتىڭ وركەندەۋىنە قولداۋ كورسەتىپ كەلەدى. سونىڭ ناتيجەسىندە بۇگىندە تابىسى مول وتاندىق كومپانيالار قاتارى كوبەيە تۇسۋدە. سونداي-اق بۇگىندە ولاردىڭ ەڭبەكتى قورعاۋ مەن ونىڭ قاۋىپسىزدىگىن ساقتاي وتىرىپ الەۋمەتتىك قولداۋ باعىتىن ۇستاناتىن دا كەزى كەلدى. قازىرگى كۇنى ەلىمىزدەگى وندىرىستىك كاسىپورىندارعا جالاقى مولشەرىن ۇدايى ءوسىرىپ وتىرۋ، بۇل ىستە قارىز بولىپ قالۋعا جول بەرمەۋ، ەڭبەك داۋلارىن بولدىرماۋ جانە جۇمىسشىلار سانىن قىسقارتۋعا جول بەرمەۋ ۇدەرىستەرى ءتان بولۋعا ءتيىس. تەك سوندا عانا جاڭا الەۋمەتتىك الەمنىڭ ءورىسى ودان ءارى كەڭەي تۇسپەك.

پرەمەر-ءمينيستردىڭ ورىنباسارى گۇلشارا ابدىحالىقوۆا اقتوبە وبلىسىنداعى ءىرى جانە ورتا دەڭگەيدەگى كاسىپورىن باسشىلارىمەن كەزدەسۋى كەزىندە ءسوز تيەگىن وسى ارنادان ساباقتادى. بۇدان ءارى ۇكىمەت باسشىسىنىڭ ورىنباسارى بيزنەستىڭ الەۋمەتتىك جاۋاپكەرشىلىگى جونىندەگى ماسەلەگە توقتالىپ تابىستى كومپانيالار مەن كاسىپورىندار تاراپىنان قاجەتتى كومەك ەڭ مۇقتاج، تۇرمىسى تومەن تابىسى از وتباسىلارعا جولدانۋى كەرەكتىگىن جەتكىزدى.

كەزدەسۋدە حالىقتى الەۋمەتتىك قورعاۋ ءمينيسترى بەردىبەك ساپارباەۆ وڭىرلەردە كاسىپورىندارمەن جاسالاتىن ۇجىمدىق كەلىسىمدەر مەن مەموراندۋمدار دا الەۋمەتتىك احۋالعا وڭ اسەرىن تيگىزىپ جۇرگەنىن ايتىپ بەردى. سونداي-اق ءمينيستردىڭ ايتۋىنشا شەتەلدىكتەردىڭ باسقارۋىنا بەرىلگەن كومپانيالار اراسىندا جۇمىسشىلارعا ەڭبەكاقى تولەۋ ىسىندە ايىرماشىلىقتار كەزدەسەدى. مۇنداي جاعدايدا الەۋمەتتىك شيەلەنىسۋشىلىك كورىنىستەرى ورىن الۋى مۇمكىن. سوندىقتان مۇنداي جاعدايعا جول بەرىلمەگەنى ءجون دەدى ول.

باسقوسۋ كەزىندە وڭىردەگى «كازحروم» كومپانياسىنىڭ باسشىسى امان ەسەنجولوۆ، «اقتوبەمۇنايگاز» اق باس ديرەكتورىنىڭ ورىنباسارى تاحتا ليفۋم ەسەنعۇلوۆ، اقتوبەرەلس-ارقالىق زاۋىتىنىڭ باس ديرەكتورى اندرەي كۋزمين، «نەكتار» وندىرىتىك كووپەراتيۆىنىڭ جەتەكشىسى شاميل كازپرانوۆ جانە «اقتوبە مۇناي قۇرىلىس» جشس-نىڭ باسشىسى سەرىك ەستەمىسوۆتەر الەۋمەتتىك قولداۋ كورسەتۋگە قاتىستى اتقارىلعان جۇمىستار جونىندە بايانداپ بەردى. تۇجىرىمداپ ايتقاندا اتالعان كاسىپورىندارعا ورتاشا جالاقى مولشەرىنىڭ تۇراقتى ءوسىمى ءتان. بۇعان قوسا ۇجىم مۇشەلەرىنە قارجىلاي قولداۋ كورسەتۋ تۇتقالارى ەنگىزىلگەن. كاسىپورىندا قىزمەت جاسايتىن كوپ بالالى وتباسىلارعا قايتارىمسىز باسپانالار بەرىلگەن. اتالعان كاسىپورىن باسشىلارىنىڭ ءبىرى جەتى جەتىم بالانىڭ بانكىدەگى ەسەپشوتىنا 14 ميلليونعا جۋىق قاراجات اۋدارعان.

پرەمەر-ءمينيستردىڭ ورىنباسارى گۇلشارا ابدحالىقوۆا كوپ بالالى انالارعا جالپى اۋماعى 140 شارشى مەتر باسپانا سالىپ بەرگەن بيزنەس وكىلى سەرىك ەستەمىسوۆكە ريزاشىلىعىن جەتكىزدى. تاعى ءبىر ايتارىمىز ءسۇيىنشتى ءجايت كاسىپورىن جەتەكشىسىنىڭ ايتۋىنشا بۇل ەڭبەك ۇجىمىنىڭ مۇشەلەرى ەش ۋاقىتتا بانكىدەن نەسيە الىپ كورمەپتى. جۇمىسشىلاردىڭ بارلىق مۇقتاجدىقتارى كاسىپورىننىڭ ءوز ىشىنەن، جۇمىسشىنىڭ الاتىن قاراجاتى ەسەبىنەن وتەلەدى، -  دەيدى كاسىپورىن باسشىسى. سونداي-اق «اقتوبەمۇنايگاز» جشس كومپانياسى شەتەلدەردەن ءوز اتامەكەنىنە ورالعان وتانداستارىمىزعا جۇمىس بەرۋشى رەتىندە ەرەكشەلەتىنىن دە ايتا كەتكەن ءجون.

كەزدەسۋدى اقتوبە وبلىسىنىڭ اكىمى وڭداسىن ورازالين قورىتىندىلاپ الەۋەتتى كومپانيالار تاراپىنان جاسالاتىن الەۋمەتتىك ارىپتەستىك پەن قامقورلىق اياسىنىڭ ودان ءارى ارتا تۇسۋىنە سەنىم ءبىلدىردى.

تەمىر قۇسايىن،

«ەگەمەن قازاقستان»

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار