ايماقتار • 15 ناۋرىز، 2019

مۇقتاج جاندار الەۋمەتتىك قولداۋدان تىس قالمايدى

819 رەتكورسەتىلدى

ون ءتورتىنشى ناۋرىز ەلىمىزدىڭ باتىس وڭىر­لەرىندە جىلدىڭ باسى دەپ سانالىپ بۇل كۇن ەجەلدەن كورىسۋ، امال مەرەكەسى رەتىندە اتالىپ ءوتىپ ءجۇر. پرەمەر-ءمينيستردىڭ ورىنباسارى گۇلشارا ابدىقالىقوۆا باستاعان ۇكىمەتتىڭ اقپاراتتىق-ءتۇسىندىرۋ توبى مۇشەلەرىنىڭ اقتوبە وبلىسىنا ساپارى وسىنداي حالىقتىق مەرەكەمەن تۇسپا-تۇس كەلدى. 

ۇكىمەت باسشىسىنىڭ ورىن­باسارى ساپار ماقساتىن ەل-جۇرت­قا ءتۇسىندىرۋ الدىندا «جۇبانوۆ­تار الەمى» ورتالىعىنا جينال­عان جۇز­دەگەن تۇرعىنداردى، كوپ بالا­لى انالار مەن قوعام­دىق ۇيىم وكىلدەرىن كورىسۋ كۇنى­مەن قۇت­تىق­تاعانى جىلى اسەر قالدىردى. 

– مەملەكەت باسشىسى «نۇر وتان» پارتياسى كەزەكتى XVIII سەزىندە ەلىمىزدەگى مۇق­تاج ازاماتتارعا، كوپ بالالى وتباسىلار مەن انالارعا الەۋ­مەتتىك تۇرعىدان قولداۋ كور­سەتۋدىڭ جاڭا رەفورماسىن جاريا ەتتى. وسىعان بايلانىستى ۇكىمەتتىك جۇمىس توبىنىڭ قىز­مەتى رەسپۋبليكامىزدىڭ باتىس وڭىرلەرىنەن باستالىپ وتىر. مۇنداعى باستى ماقسات تۇرعىن­دارعا تيەسىلى ەڭ تومەنگى تابىس كوزىن كوبەيتۋ، ءبىلىم مەن دەن­ساۋلىق ساقتاۋ سالالارىنىڭ قىز­مەتىن جاڭا ساپالىق دەڭگەيگە كوتەرۋ جانە وڭىرلەردىڭ دامۋى­نا تىڭ سەرپىن بەرۋ. بۇل ءۇشىن مەملەكەت قازىناسىنان 2،3 تريل­ليون تەڭگە ءبولىندى، – دەدى گۇل­شارا ناۋشاقىزى. پرەمەر-ءمينيستر­دىڭ ورىنباسارىنىڭ ايتۋىنشا، ەل ازاماتتارىنا جاڭا الەۋمەتتىك قولداۋ كورسەتۋ باعدارلاماسىنىڭ اۋقىمى وتە كەڭ. سوندىقتان دا ەلباسى قويعان تالاپتار مەملەكەت پەن قوعام­دىق ۇيىمدار، ەلىمىزدىڭ تۇكپىر-تۇكپىرىندەگى اقساقالدار القاسى جانە «نۇر وتان» پارتياسىنىڭ بەلسەندىلەرى ءوزارا بىرلەسىپ، ءىس-قيمىل تانىتقاندا عانا ءتيىستى ناتيجە بەرە الادى. سول ءۇشىن دە بۇگىن وزدەرىڭىزبەن كەزدەسىپ، وي-پىكىر الماسۋعا ارنايى كەلىپ وتىرمىز، – دەدى ۆيتسە-پرەمەر. 

بۇدان كەيىنگى كەزەكتە اقپا­راتتىق ءتۇسىندىرۋ جونىندەگى ۇكى­مەت توبى مۇشەلەرى ءسوز الىپ الەۋ­مەتتىك قامقورلىق ماسە­لە­لەرىنە قاتىستى ناقتى اتقارى­لا­تىن شارالار جونىندە ايتىپ بەردى. وسى ورايدا ەڭبەك جانە حالىقتى الەۋمەتتىك قورعاۋ ءمي­نيسترى بەردىبەك ساپارباەۆ تۇرعىنداردىڭ تۇرمىسى مەن ءومىرىنىڭ ساپاسىن جاقسارتۋ ءىسى ەڭ الدىمەن جالاقى مولشەرىن وسىرۋدەن باستاۋ الاتىنىن مالىم­دەدى. سونىڭ ىشىندە بيۋدجەت قىز­مەتكەرلەرىنىڭ جالاقىسى 15-30 پايىزعا دەيىن كوتەرىلمەك. ونىڭ اياسى كەم دەگەندە ءبىر ميلليون ادامدى قامتيدى.

مينيستر اتاۋلى الەۋمەتتىك كومەك تاعايىنداۋ مەن تولەۋ ءتارتىبى تۋرالى ايتا كەلىپ، بۇگىنگى كۇنى رەسپۋبليكادا ونىڭ مولشەرى 70 پايىزعا وسكەنىن، بۇعان 830 مىڭ­نان استام تۇرمىسى تومەن ازاماتتار تارتىلعانىن ايتتى. بۇعان قوسا جۇمىس ورىندارىن اشۋ مەن قوسىمشا ماماندىقتارعا وقىتۋ ماسەلە­لەرى الەۋمەتتىك قولداۋدىڭ ءبىر تەتىگى رەتىندە قاراستىرىلادى. ب.ساپارباەۆ بۇل رەتتە ءبىر وت­ب­اسىنىڭ ۇلگىسىندە اتاۋلى الەۋ­مەتتىك كومەك بەرۋدىڭ ءمان-جا­يى­نا جەكە توقتالىپ، الداعى كەز­دە ونىڭ كولەمى 63 پايىزعا كوبە­يە­تىنىن العا تارتتى. اۋىل تۇرعىن­دارىن قولداۋ، جەڭىلدىكپەن نەسيە بەرۋ ماسەلەلەرى تۋرالى دا سالا باسشىسى ناقتى دەرەكتەر كەلتىردى. 

ء بىلىم جانە عىلىم ءمينيسترى كۇلاش ءشامشيدينوۆا ءوز سوزىن­دە ەل وڭىرلەرىنەن مەكتەپ عيما­راتتارىن سالۋعا سۇرانىس كوپ ەكەنىن مالىمدەدى. ونىڭ ايتۋىنشا، تاۋەلسىزدىك جىلدارىندا 1672 مەكتەپ سالىنعان. سوڭعى ءۇش جىلدا اقتوبەدە توعىز ءبىلىم ورداسى بوي كوتەرگەن. ءبىلىم ساپاسى ەڭ الدىمەن مۇعالىمنىڭ بىلىكتىلىگىنە بايلانىستى. سوندىقتان دا قازىر ەلىمىزدە پەداگوگ مامانداردى قايتا ازىرلىكتەن وتكىزۋدىڭ جاڭا جوباسى بەلگىلەندى، – دەدى كۇلاش نوعاتايقىزى. الداعى جىلدارى حيميا، بيولوگيا، فيزيكا جانە ينفورماتيكا پاندەرىن جوعار­عى سىنىپتاردا اعىلشىن تىلىن­دە وقىتۋعا بايلانىس­تى ءتىلدى ۇيرەنۋگە بولىنەتىن قارجى كولەمى ەداۋىر ۇلعايادى. سونى­مەن بىرگە قازاقستان تاريحى مەن گەوگرافياسىن وقىپ ۇيرە­نۋگە ارنال­عان قوسىمشا باعدار­لا­­مالار بەلگىلەنبەك. ك.ءشام­شي­­­دينوۆا جوعارى وقۋ ورىن­دارى­­نىڭ رەيتينگى الداعى كەزدە تۇلەك­تەر­دىڭ جۇمىسقا ورنالاسۋ دەڭگەيى­مەن انىقتالاتىنىن اتاپ كورسەتتى. 

دەنساۋلىق ساقتاۋ ءمي­نيسترى ەلجان ءبىرتانوۆ مەدي­تسي­نا­­لىق قىزمەتتىڭ ساپاسى مەن قول­­ج­ەتىمدىلىگىن كوتەرۋ جونىن­دە تىڭ ءىس-شارالار جوسپارى بەل­گى­لەنگەنىنە توقتالدى. 

بيىلعى جىلدىڭ ءبىرىنشى شىلدەسىندە دارىگەرلەر مەن ورتا بۋىن مەديتسينا قىزمەت­كەرلەرى­نىڭ جالاقىسى وسەدى. اۋىل­دىق فەلدشەرلىك-اكۋشەرلىك قو­سىن­دار مەن جەدەل جاردەم بري­گا­داسى مۇشەلەرى جالاقىسى وتىز پايىزعا كوتەرىلەدى. جالاقى ءوسى­مى ەلىمىزدەگى وتىز مىڭ دارىگەر مەن 225 مىڭ ورتا مەديتسينا قىزمەت­كەر­لەرىن قامتيدى، – دەدى مينيستر.

بۇدان كەيىنگى كەزەكتە ين­دۋس­تريالىق جانە ينفراقۇرىلىم­دىق دا­مۋ مينيسترلىگى، قۇرىلىس جا­نە تۇرعىن ءۇي-كوممۋنالدىق شارۋا­شىلىق ىستەرى كوميتەتىنىڭ تور­اعاسى مارحابات جايىمبەتوۆ رەسپۋب­ليكا قالالارىنىڭ شەت­كەرى ايماقتارىنىڭ ينفرا­قۇرى­لىمىن دامىتۋ، باسپانا مەن اۋىز سۋ ماسەلەلەرىن شەشۋ جونىندە جاڭا جوبالار بەلگىلەنگەنىن جەتكىزدى.

– بۇل ورايدا ەلىمىزدەگى 340 مىڭ كوپ بالالى وتباسى نازاردان تىس قالمايدى. ەلىمىزدە سوڭعى جىلدارى 12،5 ميلليون شارشى مەتر تۇرعىن ءۇي سالىنعان. رەس­پۋبليكاداعى 18 ملن 320 مىڭ تۇرعىنعا شاققاندا بۇل تمد كولەمىندەگى ەڭ جوعارعى كورسەت­كىش، – دەدى كوميتەت باسشىسى.

سونداي-اق كەشە پرەمەر-ءمينيستردىڭ ورىنباسارى گ.اب­دى­قالىقوۆا مەن اقتوبە وبلىسىنىڭ اكىمى وڭداسىن ورازالينمەن وڭىردەگى بىرقاتار كوپ بالالى وتباسىلار مەن انالاردىڭ ۇيىنە باس سۇعىپ، ولاردىڭ تۇرمىسىمەن تان­ىستى. بۇگىن ۇكىمەت باسشىسى ورىنباسارىنىڭ اقتوبە وبلىسىنا ساپارى ودان ءارى جالعاسادى.

تەمىر قۇسايىن،

«Egemen Qazaqstan»

اقتوبە

سوڭعى جاڭالىقتار

ۇقساس جاڭالىقتار