14 ناۋرىز، 2019

ەرلىگىن ەل ۇمىتپاس ەردىڭ ءبىرى

908 رەتكورسەتىلدى

كەڭەس وداعىنىڭ باتىرى ءابۋ دوسمۇحامبەتوۆتىڭ سۇيەگىن تۋعان جەرگە اكەلۋ جونىندە ءالسىن-ءالسىن ماسەلە كوتەرىپ، شىر-پىر بولىپ جۇرگەندەردىڭ ءبىرى – نەمەرە-جيەندەرى. ولاردىڭ ايتۋىنشا، باتىردىڭ دەنەسى جەر قوينىنا ءتورت رەت بەرىلىپتى. سوڭعى رەت چەرنوبىل قالاسىنىڭ اۋماعى كەڭەيتىلگەن كەزدە تاپسىرىلىپتى. 

ەرلىگىن ەل ۇمىتپاس ەر مام­ليۋت اۋدانىنا قاراستى ۇشكول اۋىلىندا ەڭبەك ەتىپ جۇرگەندە قىزىل ارميا قاتارىنا شاقى­رىلىپ، 1942 جىلى العاشقى ۇرىس­قا قاتىسادى. 1943 جىلى كۇز­دە پريپيات وزەنىنەن ءوتۋ كەز­ىندە ءابۋدىڭ روتاسى ەرەكشە كوزگە تۇسەدى. ءوزى اۋىر جا­را­قات العانىنا قاراماستان نە­مىس تانكىسىنە گرانات بايلامىن لاقتىرىپ، قازا تابادى. قاسىق قانى قالعانشا جاۋمەن ارىس­تانشا ارپالىسىپ، كوز جۇم­عان وعلانعا كسرو جوعارعى كەڭەسى القاسىنىڭ جارلىعىمەن كەڭەس وداعىنىڭ باتىرى اتاعى بەرىلەدى. وب­لىستىق دارىندى بالالارعا ارنالعان مەكتەپ-گيمنا­زيا، ءبىر كوشە ونىڭ ەسىمىمەن اتا­لادى. ءبىلىم وشاعى الدىنا قو­يىلعان ەسكەرتكىشتىڭ اۆتورى – جەر­گىلىكتى ءمۇسىنشى باقىتجان رامازانوۆ. 

ءبىر ۋىس توپىراق جات جەردەن بۇيىرعان اتامىز تولقۇجاتىنا ەكى جاس قوستىرىپ، قان مايدانعا 17 جاسىندا اتتانىپتى. دەنەسى 1966 جىلى عانا تابىلىپ، چەر­نوبىل قالاسىنىڭ داڭق اللەيا­سىنا جەرلەنگەن، دەگەن تۋىس­­تارى 1986 جىلعى اتوم اپا­تى­نان كەيىن زيراتىنىڭ مۇل­دەم كۇتىمسىز قالعانىنا نا­ليدى. ەشكىم تۇرمايتىن شاھاردا يادرولىق قالدىقتار توگەتىن ارنايى قويما سالىپ جاتقانىن ەستىپ، قاتتى الاڭداپ وتىرعان كورىنەدى. ونىڭ ۇستىنە ۋكراينا مەن اقش اراسىنداعى كەلىسىمگە وراي 2020 جىلعا تامان پوليگوننىڭ پايدالانۋعا بەرىلەتىنى قۇلاقتارىنا تيگەننەن كەيىن ۇيلەرىندە تىنىش جاتا الماپتى. قازاقستان سىرتقى ىستەر مينيسترلىگى مەن ۋكراينا ەلشىلىگىنە ءۇشبۋ حات جولداپ، با­تىردىڭ سۇيەگى يادرولىق قال­دىقتار استىندا قالماسا، تۋعان جەرگە قايتا­رىلسا دەگەن وتىنىشتەرىن جەت­كىزگەن. وكىنىشتىسى سول، قارسى تاراپ باتىردىڭ دەنەسىن ەكس­گۋ­ماتسيالاۋعا رۇقساتتى كەشىكتىرىپ جاتقانعا ۇقسايدى. ايتپەسە، وڭ شەشىلگەن جاعدايدا جەرگىلىكتى بيلىك ورىندارى بارلىق شى­عىن­داردى كوتەرۋگە، جەرلەۋ راسىمدەرىن اتقارۋعا ءازىر. 

چەرنوبىلدە امەريكالىق كومپانيانىڭ قۇرىلىسى قىزعان سايىن ەسكى زيرات اياق استىندا تاپتالىپ قالماسا دەگەن تىلەك ۇستىندە جۇرگەن سولتۇستىكقازاقستاندىقتار دا ماسەلەنىڭ مەملەكەتتىك دەڭ­گەي­دە شەشىم تابارىنا ءۇمىتتى. 

ءومىر ەسقالي،

«ەgemen Qazaqstan»

سولتۇستىك قازاقستان وبلىسى

سوڭعى جاڭالىقتار

قۇپتارلىق قادام

پارلامەنت • بۇگىن، 07:47

مەشىتتە بەتپەردە تسەحى اشىلدى

ايماقتار • بۇگىن، 07:35

ەلگە پايداسى تيگەن ادام جاقسى

پارلامەنت • بۇگىن، 07:30

اۋدان ءومىرىنىڭ ايناسى

ايماقتار • بۇگىن، 07:27

ارمان الاسارماسىن

رۋحانيات • بۇگىن، 07:22

ديقان ديزەلدى تومەن باعاعا الادى

ەكونوميكا • بۇگىن، 07:11

كوروناۆيرۋسسىز قوستاناي

ايماقتار • كەشە

ۇقساس جاڭالىقتار