قازاقستان • 13 ناۋرىز، 2019

قورشاۋ سالىپ العان، ال رۇقسات الىنباعان...

782 رەتكورسەتىلدى

كەنشىلەر استاناسىنداعى ورتالىق ساياباقتا اياق استىنان قورشاۋ پايدا بولعانىن بايقاپ قالعان تۇرعىندار دابىل قاقتى. قورشاۋ پايدا بولدى دەگەنشە، ونداعى تال-تەرەكتىڭ تۇبىنە بالتا جەتەدى دەي بەرىڭىز...

تۇرعىندار قاققان دابىل دىتتەگەن جەرىنە جەتتى دە. ساياباققا قالا اكىمى نۇرلان اۋباكىروۆتىڭ ءوزى كەلىپ، ءمان-جايعا تۇسىنىك بەردى.

– بۇل جەردە سپورتتىق نىساندار سالىنادى،  – دەدى ول. – قازىر مۇندا كوپ جىلداردان بەرى پايدالانىلماي كەلە جاتقان فۋتبول الاڭى بار. سوندىقتان، بۇل جەرگە سپورتتىق نىسان سالۋدى ويلاستىرىپ ءجۇرمىز. بىزگە مۇنداي ۇسىنىسپەن قازاقستاننىڭ تەننيس فەدەراتسياسى شىقتى. ينۆەستيتسيا قۇنى 2،2 ميلليارد تەڭگە.

قالا اكىمىنىڭ ءۋاجى بەلسەندى تۇرعىنداردىڭ كوكەيىنە قونىڭقىرامادى. «بىزدە – پريشاحتينسك پەن وڭتۇستىك-شىعىستا ەكى تەننيس كورتى بار. قاراعاندىدان قاپتاپ شىققان تەننيسشىلەردى كورگەنىمىز جوق، ال تەننيسپەن اينالىسام دەگەندەرگە وسى ەكى كورت تا جەتپەي مە؟ ءبىر نارسەنى سالماس بۇرىن تۇرعىندارمەن نەگە اقىلداسپايسىزدار؟ قوعامدىق تىڭداۋ نە سەبەپتەن وتكىزىلمەيدى؟»، دەپ ولار قالا باسشىسىن سۇراقتىڭ استىنا الدى.

اۋباكىروۆتىڭ دە جاۋابى ءازىر ەكەن، ناقتى دەرەكتەرمەن جاۋاپ بەردى.

– پريشاحتينسكىدە ءبىر ساعات تەننيسپەن اينالىسقانىڭىز ءۇشىن 4000 تەڭگە تولەيسىز. ال وڭتۇستىك-شىعىستاعى تەننيس ورتالىعى اۋزى-مۇرنىنان شىعادى. ياعني، تەننيسپەن شۇعىلدانۋعا دەگەن سۇرانىس زور، – دەدى قالا اكىمى.

سونداي-اق ول ساياباقتاعى جەر تەلىمىنىڭ جەكەمەنشىككە وتپەيتىنىن ايتتى. ال ساياباقتاعى اتالعان جەر 4 جىل 11 اي مەرزىمگە جالعا بەرىلگەن ەكەن. اكىمنىڭ سوزىنە سەنسەك، قورشاۋعا الىنعان جەردەگى اعاشتار كەسىلمەيتىن كورىنەدى.

«مادەني جانە دەمالىس ساياباعى باسقارماسى جاقىن ارادا زاماناۋي تەحنيكا ساتىپ الىپ، كورت سالۋعا كەدەرگى كەلتىرەتىن 180-گە جۋىق تالدى تامىرىمەن قوپارىپ ج ۇلىپ الادى دا، باسقا جەرگە ەگە سالادى»، دەدى قالا اكىم. ياعني، اربا سىنبايدى، وگىز دە ولمەيدى.

قىزىقتىڭ كوكەسى مىنادا بولىپ شىقتى: ساياباقتاعى جەر تەلىمى قورشاۋعا الىنعانىمەن، ول جەرگە قانداي دا ءبىر قۇرىلىس جۇرگىزۋگە رۇقسات ءالى الىنباعان ەكەن. تەك جوبا دايىن بولعاننان كەيىن عانا قوعامدىق تىڭداۋ ۇيىمداستىرىلماقشى. «اپام دا اڭ-تاڭ، مەن دە اڭ-تاڭمىن» دەگەن وسى بولار.

ءبىر جاعىنان الىپ قاراساڭىز، قاراعاندىنىڭ تۇرعىندارى مەن قوناقتارى ءسۇيىپ كەلەتىن ورتالىق ساياباقتا سپورتتىق-ساۋىقتىرۋ نىسانىنىڭ بولعانى دا جاقسى. قولعا راكەتكا الىپ، ءبىر مەزگىل اششى تەر شىعارۋ – سالاماتتى ءومىر سالتىن ۇستانعان ادامعا ناعىز دەمالىس قوي. تەك، بالەنباي جىلدان بەرى جايقالىپ ءوسىپ تۇرعان جاسىل جەلەكتى ايايسىڭ...

قوعامدىق تىڭداۋ ناۋرىز مەرەكەسىن تويلاعاننان كەيىن ءوتۋى مۇمكىن. ال ازىرگە ساياباقتا قۇرىلىسقا دايىندىق جۇمىستارى استە سايابىرلاعان ەمەس. كەرىسىنشە، قاڭىلتىر تەمىردەن سوعىلعان قورشاۋ كەڭەيىپ، قۇرىلىسقا قاجەتتى ماتەريالدار ءۇستى-ۇستىنە جەتكىزىلىپ جاتىر. سوعان قاراعاندا، جوعارىدان نۇسقاۋ العان قالا اكىمدىگى ءۇشىن قوعامدىق تىڭداۋ دەگەنىڭىز قۇر انشەيىن كوزالداۋ سياقتى ما دەپ قالاسىڭ...

قايرات ءابىلدا،

«Egemen Qazaqstan»

قاراعاندى

سوڭعى جاڭالىقتار

ۇقساس جاڭالىقتار