سولتۇستىك قازاقستاندا ناۋرىز مەيرامىنا دايىندىق باستالىپ كەتتى

ايماقتار • 06 ناۋرىز، 2019

سولتۇستىك قازاقستاندا ناۋرىز مەيرامىنا دايىندىق باستالىپ كەتتى

قىزىلجار وڭىرىندە ازەربايجان ۇلتىنىڭ 1800-گە جۋىق وكىلى تۇرادى.

ازەربايجان مادەني ورتالىعى 1995 جىلدان بەرى جۇمىس ىستەيدى. العاشقىلاردىڭ ءبىرى بولىپ قۇرىلدى. ولار دا بارلىق تۇركى تىلدەس حالىقتار سياقتى ءاز ناۋرىزدى ۇلتتىق مەرەكە رەتىندە بار ناقىشىمەن اتاپ وتەدى. ازەربايجان ۇلتتىق مادەني ورتالىعىنىڭ توراعاسى شىڭعىس كۋربانوۆتىڭ ايتۋىنشا، ناۋرىز مەيرامى الدىنداعى ايدىڭ ءار سارسەنبىسىن ازەربايجان حالقى تىرشىلىكتىڭ ءتورت قۇدىرەتى – سۋ، وت ، جەر جانە اۋاعا ارنايدى ەكەن. ياعني، «سۋ چەرشەنبە» - سۋعا ارنالعان سارسەنبى، «ودلۋ چەرشەنبە» - وتقا ارنالعان سارسەنبى، «تورپاگ چەرشەنبە» - جەرگە ارنالعان سارسەنبى جانە «احىر چەرشەنبە» - سوڭعى سارسەنبى دەپ اتالادى. نانىم-سەنىم بويىنشا ءبىرىنشى سارسەنبىدە سۋ تازارادى، كەيىن كەزەكپەن وت جانە جەر جاڭارادى. ال سوڭعى سارسەنبىدە اعاشتار بۇرشىك جارادى. بۇل - قىستىڭ اياقتالىپ، جاڭا جىلدىڭ كەلگەنىن بىلدىرەدى.

«ناۋرىز» مەيرامىندا سالت-داستۇرلەرىمىزدى ەسكە الامىز، ۇستانۋعا تىرىسامىز. سولاردىڭ ءبىرى– وتتان سەكىرۋ. وتباسىنىڭ ءار مۇشەسى وتتان سەكىرۋى كەرەك. وت سونگەسىن ك ۇلىن ەلدى مەكەننەن شىعارىپ تاستايدى. بۇل - تازارۋدىڭ بەلگىسى»، دەيدى شىڭعىس كۋربانوۆ.

ناۋرىز مەيرامىنا دايىندىق بارىسىندا جاسالاتىن تاعى ءبىر ءداستۇر - ارنايى تاعام «سەمەني» ازىرلەۋ. وتباسىندا مولشىلىق بولۋ ءۇشىن بيدايدى الدىن الا ىدىستا وسىرەدى. وسكىن جاقسى شىقسا - كەلەر جىلى الىناتىن ءونىم دە مول بولماق. جالپى، ازەربايجان حالقى دا مەرەكەلىك داستارحانعا اسا ءمان بەرەدى. جەتى تاعامنان تۇراتىن ناۋرىز كوجە ازىرلەمەسە دە، مىندەتتى تۇردە «س» ارپىنەن باستالاتىن سيۋد-ءسۇت، سەمەني، سابزي-كوكونىس، تاعى باسقا جەتى تاعامدى داستارقانعا قويادى. بۇدان باسقا ۇستەلدە اينا، بويالعان جۇمىرتقا جانە بالاۋىز شام بولۋى قاجەت. وت - جىن-شايتاننان قورعايدى. جۇمىرتقا مەن اينا ەسكى جىلدىڭ بىتكەنىنىڭ جانە جاڭا جىلدىڭ العاشقى كۇنىنىڭ بەلگىسى.

ءازىربايجاندار دا – قازاقتار سياقتى قوناقجاي حالىق. مەرەكە كۇندەرى ءۇي ەسىكتەرى جابىلمايدى. تۋعان-تۋىستارىن، كورشى-قولاڭدى ارالاپ، مەيراممەن قۇتتىقتايدى، تاتتىلەردەن اۋىز تيەدى. جاڭا جىلدى تويلاۋ مەرەكەسى تەك 13-كۇننەن كەيىن عانا اياقتالادى.

«ناۋرىز مەيرامى - ەڭ كونە جانە سالت-داستۇرگە باي مەرەكەلەردىڭ ءبىرى. ول - جىل باسى، جاڭارۋدىڭ بەلگىسى. وسى مەيراممەن بارشا قازاقستاندىقتاردى قۇتتىقتايمىن. ەڭ الدىمەن، ارينە دەنساۋلىق، وتباسى اماندىعىن، باقىت، ساتتىلىك تىلەيمىن. بىرلىگىمىزدەن ايىرماسىن، الەمدە بەيبىتشىلىك بولسىن»، - دەيدى ءازىربايجان ۇلتىنىڭ وكىلى شىڭعىس كۋربانوۆ.

ءازىربايجان ۇلتتىق مادەني ورتالىعىنىڭ مۇشەلەرى وبلىستا، پەتروپاۆل قالاسىندا وتەتىن شارالاردان قالىس قالمايدى. جىل سايىن ءداستۇرلى تۇردە ءازىربايجان ۇلتتىق مادەنيەتىنىڭ فەستيۆالىن ۇيىمداستىرىپ، وبلىس ورتالىعىندا وتەتىن ناۋرىز مەرەكەسىنە دە بەلسەنە قاتىسادى. بيىل دا قالا تۇرعىندارى مەن قوناقتارىن كوكتەم مەرەكەسىندە ءان-بي، مول داستارقانمەن قارسى الماق بولىپ، قىزۋ دايىندالۋدا.

ءومىر ەسقالي،

«ەگەمەن قازاقستان»

سولتۇستىك قازاقستان وبلىسى