ايماقتار • 05 ناۋرىز، 2019

ءو.شوكەەۆ: تۇركىستاننىڭ دامۋ جوسپارىنا جۇيەلىلىك قاجەت

914 رەت كورسەتىلدى

بۇگىن تۇركىستان قالاسىندا وبلىس اكىمى ومىرزاق شوكەەۆتىڭ توراعالىعىمەن تۇركىستان قالاسىن جان-جاقتى دامىتۋ تۋرالى اپپارات ءماجىلىسى ءوتتى. جيىندا تۇركىستان قالاسىنىڭ اكىمى الىپبەك وسەرباەۆ وبلىس ورتالىعىنداعى قۇرىلىس جۇمىستارىمەن تانىستىردى دەپ حابارلايدى وبلىس اكىمدىگىنىڭ ءباسپاسوز قىزمەتى. 

«قالانىڭ جالپى دامۋىنا كوپتەگەن وزگەرىستەر ەنگىزىلىپ، جاڭا اۋقىمدى جوبالار جولعا قويىلدى. قالانىڭ قازىرگى تاڭداعى جەر اۋماعى 19،6 مىڭ گەكتاردى، حالىق سانى 165 مىڭ ادامدى قۇراپ وتىر. باس جوسپارعا سايكەس قالا قۇرىلىسى مەن ساۋلەتى ءۇش باعىتتا جۇرگىزىلەتىن بولادى. ءبىرىنشى 88،7 گەكتار جەرگە ورنالاسقان قوجا احمەت ياساۋي كەسەنەسىنىڭ ماڭىنداعى «تاريحي ايماقتى» قايتا جاڭعىرتۋ. ەكىنشى 98 گەكتار قۇرىلىسى رەتتەلەتىن اۋماعىندا «رۋحاني مادەني ورتالىقتى» دامىتۋ. ءۇشىنشى 750 گەكتاردى قۇرايتىن اكىمشىلىك-ىسكەرلىك ورتالىعىن سالۋ»، – دەدى قالا اكىمى.

سونداي-اق، شاھار باسشىسى مەملەكەت مۇقتاجدىعى ءۇشىن الىنىپ جاتقان جەر تەلىمدەرى مەن قالانىڭ ينفراقۇرىلىم، جىلۋ، گاز، اۋىز سۋ جۇيەسىنىڭ جايىنا توقتالدى.

جيىندا وبلىستىق قۇرىلىسى باسقارماسىنىڭ باسشىسى توقتار ۇسىپاليەۆ  تۇركىستان قالاسىنداعى قۇرىلىس جۇمىستار جايىن باياندادى.   

 «ەلباسىنىڭ تۇركىستان قالاسىن دامىتۋ تۋرالى تاپسىرماسىنا سايكەس 29 نىساننىڭ قۇرىلىسى وڭىرلەر، ۇلتتىق كومپانيالار جانە بيزنەس وكىلدەرىنە بەكىتىلگەن. اتاپ ايتقاندا: اكىمشىلىك-ىسكەرلىك ورتالىعىندا 17 نىسان، رۋحاني-مادەني ورتالىعىندا 9 نىسان جانە تاريحي-مادەني ورتالىعىندا 3 نىسان.  بارلىعىنىڭ جوبالاۋ-سمەتالىق قۇجاتتامالارى دايىندالىپ، جەر قازۋ جۇمىستارى اياقتالىپ، ىرگەتاس قۇيۋ جۇمىستارى جۇرگىزىلۋدە. ال تۇرعىن ءۇي قامتۋ بويىنشا تۇركىستان قالاسىنىڭ باس جوسپارىنا سايكەس،  «وتىرار» مولتەك اۋدانىندا كوپقاباتتى 20 تۇرعىن ءۇيدىڭ قۇرىلىسى جۇرگىزىلۋدە. 2019 جىلدىڭ مامىر ايىندا 11 ءۇيدى، ال قالعان 9 ءۇيدى ءىى-جارتى جىلدىقتا پايدالانۋعا بەرۋ جوسپارلانۋدا.  ودان بولەك 20 كوپقاباتتى تۇرعىن ۇيلەردىڭ جسق دايىندالىپ، ساراپتاماعا ۇسىنىلۋدا. «7-20-25» باعدارلاماسى اياسىندا 6 كوپقاباتتى تۇرعىن ۇيلەردى پايدالانۋعا بەرۋ كوزدەلۋدە»، – دەدى توقتار وراز ۇلى.

تۇركىستان وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى بەكزات تىلەگەنوۆ وبلىس ورتالىعىنداعى جول قۇرىلىسىمەن تانىستىردى

«2019 جىلى 974،2 شاقىرىم جول مەن كوشەلەر قۇرىلىس-جوندەۋ جۇمىستارىمەن قامتىلادى دەپ كۇتىلۋدە. ونىڭ بيىل 653،2 شاقىرىمى پايدالانۋعا بەرىلەتىن بولادى. ال تۇركىستان قالاسى بويىنشا كوشەلەردىڭ جالپى ۇزىندىعى 845 شاقىرىمدى قۇرايدى. بۇگىنگى تاڭدا، كوشەلەردىڭ 21،3%-ى عانا قاناعاتتى جاعدايدا»، – دەدى باسقارما باسشىسى.

تۇركىستان قالاسىنىڭ جاي-كۇيى جايلى باياندامالاردى تىڭداعان وبلىس باسشىسى شاھارداعى تازالىق، كارىز جانە سۋ جۇيەلەرى مەن جول ساپاسىن سىنعا الىپ، ماسەلەنى تەزدەتىپ شەشۋدى تاپسىردى. 

 «تۇركىستان قالاسىنىڭ ينفراقۇرىلىمدىق جۇيەلەرى سىن كوتەرمەيدى. قالدىق سۋدى اعىزۋ، جىلۋ، اۋىز سۋ جانە گازبەن قامتۋ جۇيەسىن جاساماي، قالانى دامىتۋ مۇمكىن ەمەس. ساپالى جولمەن قامتۋ وزەكتى بولىپ وتىر. جىلىنا 10 شاقىرىمداي جولدى جوندەۋمەن ەشقانداي ناتيجەگە قول جەتكىزە المايمىز. بەس جىلدىق جوسپار ءتۇزىپ، تۇركىستانداعى بۇل ماسەلەنى تۇبەگەيلى شەشۋىمىز كەرەك. سونداي-اق، وبلىس ورتالىعىنىڭ تازالىعىن قامتاماسىز ەتۋ بويىنشا ءتيىستى جۇمىستار جانداندىرىلىپ، قاتاڭ باقىلاۋعا الىنۋ قاجەت. كوگالداندىرۋ جۇمىستارى جىلدام ءجۇرۋى ءتيىس. ءاربىر اۋدان، قالاداعى ەلدى مەكەندەردى اباتتاندىرۋ، كوگالداندىرۋ، سانيتارلىق تازالاۋ جۇمىستارىن جۇرگىزىپ، قالا تازالىعى ءۇشىن اۆتوكولىكتەردى جۋاتىن كولىك جۋ بەكەتتەرىن اشۋ قامتاماسىز ەتىلسىن. بۇل تاپسىرمالاردىڭ ورىندالۋى بويىنشا ناقتى جاۋاپ كۇتەمىن»، – دەدى ومىرزاق ەستاي ۇلى.

سوڭعى جاڭالىقتار

اۋليە اتا ءھام ۇلى جىراۋ

رۋحانيات • كەشە

ۇقساس جاڭالىقتار