ايماقتار • 02 ناۋرىز، 2019

قوستانايدا تۇركىستان وبلىسىنىڭ دەلەگاتسياسى ىسكەرلىك ساپارمەن بولىپ قايتتى

721 رەتكورسەتىلدى

دەلەگاتسيانى تۇركىستان وبلىسى اكىمىنىڭ ورىنباسارى ەربول تاسجۇرەكوۆ باسقارىپ كەلدى. بۇل ساپار قوستاناي وبلىسىنىڭ وڭىرگە ينۆەستيتسيا تارتۋ تاجىريبەسىمەن الماسۋدى، اۋىل شارۋاشىلىعى تەحنيكالارىن جانە قالا ىشىلىك جولاۋشىلار اۆتوبۋستارىن ساتىپ الۋ كەلىسىمدەرىن جۇرگىزۋدى جانە وڭىرارالىق كووپەراتسيا شەڭبەرىندە ىنتىماقتاسا جۇمىس ىستەۋدى جولعا قويۋدى ماقسات تۇتىپتى.

 

تۇركىستان دەلەگاتسياسى قوستاناي قالاسىنداعى يندۋستريالىق ايماققا بارىپ، وتكەن جىلى جۇمىسىن باستاعان «بەلورۋس» مينسك تراكتور زاۋىتىن قۇراستىراتىن «كومپوزيت گرۋپپ»، قۇرىلىس ماتەريالدارىن وندىرەتىن، «استىق» ەلەۆاتور جابدىقتارىن وندىرەتىن زاۋىتتارىندا بولدى، ولاردىڭ ونىمدەرىمەن تانىستى.

دەلەگاتسيا «كومپوزيت گرۋپپ» جاۋاپكەرشىلىگى شەكتەۋلى سەرىكتەستىگىنىڭ باسشىلارىمەن ەكىجاقتى كەزدەسۋدە «بەلورۋس» ماركالى تراكتورلارىن الۋعا قول جەتكىزدى. سونىمەن قاتار تۇركىستاندىق قوناقتارعا بارلىعى 300 ملرد تەڭگە ينۆەستيتسيا سالىنعان ماشينا قۇراستىرۋ، تاماق ونەركاسىبى، قۇرىلىس يندۋسترياسى سالالارىندا جۇزەگە اسىپ جاتقان 10 جوبا تانىستىرىلدى. اسىرەسە، قوستاناي وبلىسىندا SINOTRUK (HOWO ماركالى جۇك كولىكتەرىن ءوندىرۋ)، YTO GROUP (اۋىل شارۋاشىلىعى تەحنيكالارىن ءوندىرۋ)، SANY GROUP (ارنايى تەحنيكالار مەن كەن جابدىقتارىن ءوندىرۋ) جانە HANTENG automobile Co. Ltd. («Hanteng» ماركالى جۇردەك ماشينالاردى قۇراستىرۋ) سياقتى ترانسۇلتتىق كومپانيالاردى تارتۋ ارقىلى ماشينا جاساۋ كلاستەرىن قۇرۋ شەڭبەرىندەگى جوبالار ايىرىقشا اتالدى.

تۇركىستاننان كەلگەن دەلەگاتسيا مۇنان كەيىن ءوندىرىس كولەمى مەن جەرگىلىكتەندىرۋ جۇمىستارى بويىنشا رەسپۋبليكاداعى اۆتوموبيل يندۋسترياسىنىڭ كوشىن باستاپ وتىرعان «سارىارقااۆتوپروم» ماشينا جاساۋ زاۋىتىنا باردى. مۇندا ولار جەڭىل اۆتوموبيلدەردىڭ، اۆتوبۋستاردىڭ جانە كوممەرتسيالىق تەحنيكالاردىڭ وندىرىسىمەن تانىستى، سونداي-اق «Ankai» اۆتوبۋستارىن ساتىپ الۋعا مۇددەلىلىك تانىتتى. تۇركىستان وبلىسى دەلەگاتسياسىنىڭ باسشىلىعى وسى ماسەلە بويىنشا «سارىارقااۆتوپروم» زاۋىتىمەن جۇمىس ىستەۋگە كەلىستى.

دەلەگاتسيا وبلىس اكىمى ارحيمەد مۇحامبەتوۆپەن كەزدەسىپ، وندا ەكى ءوڭىردىڭ ىنتىماقتاستىعىن كەڭەيتۋ ماسەلەلەرى ءسوز بولدى. ونىڭ ىشىندە ونەركاسىپ كووپەراتسياسىن كۇشەيتۋ، ءبىلىم بەرۋ، دەنساۋلىق، ينۆەستيتسيا تارتۋ، مادەنيەت پەن تۋريزم سالالارىندا تاجىريبە الماسۋ ماسەلەلەرى تالقىلاندى. تۇركىستان دەلەگاتسياسىنىڭ شاقىرۋىمەن تاياۋ ۋاقىتتا قوستاناي دەلەگاتسياسى قارسى ساپار جاساۋدى جوسپارلادى. ەكى جاق ەكونوميكا مەن مادەنيەتتىڭ نەگىزگى باعىتتارى بويىنشا وڭىرلىك ىنتىماقتاستىق تۋرالى مەموراندۋمعا قول قويۋعا نيەتتەستى.

تۇركىستان دەلەگاتسياسى وبلىس ورتالىعىنىڭ ىرگەسىندەگى ىبىراي التىنسارين كەسەنەسىنە بارىپ، زيارات ەتتى.

 ءنازيرا جارىمبەت،

«ەگەمەن قازاقستان»

قوستاناي

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار