14 اقپان، 2019

كوكپاردىڭ حالىقارالىق ەرەجەسى بەكىتىلدى

454 رەتكورسەتىلدى

استانادا الەمنىڭ 10 ەلىنىڭ ۇلتتىق سپورت فەدەراتسيا باسشىلارىنىڭ قاتىسۋىمەن بۇكىلالەمدىك كوكپار قاۋىمداستىعىنىڭ كەڭەسىندە كوكپاردىڭ حالىقارالىق ەرەجەسى بەكىتىلدى. كوكپاردىڭ حالىقارالىق ەرەجەسى جايلى قازاقپارات تىلشىسىنە قر «كوكپار» فەدەراتسياسىنىڭ پرەزيدەنتى مۇحتارحان دىلدابەكوۆ ايتىپ بەردى.

«بۇگىن كوكپاردىڭ حالىقارالىق ەرەجەسى بەكىتىلدى. باسقا ەلدەن كەلگەن ۇلتتىق فەدەراتسيالاردىڭ بارىمەن كوكپاردىڭ ەرەجەسىن تالقىلاپ، ماقۇلداپ، ءبارى دە ءبىر اۋىزدان قولداپ وتىر. قۇجاتقا قول قويىلدى»، - دەدى مۇحتارحان دىلدابەكوۆ.

«كوكپار» فەدەراتسياسىنىڭ پرەزيدەنتى سونداي-اق، كوكپار ەرەجەلەرى تۋرالى تولىعىراق ايتىپ بەردى.

ء«وزىڭىز بىلەتىندەي، 15-20 جىلدان بەرى قازاندىقپەن كوكپار ويناپ جۇرگەن بولاتىنبىز. جاڭا ەرەجە بويىنشا قازاندىق الىنىپ تاستالدى، ونىڭ ورنىنا شەڭبەر قويىلادى. سونىمەن بىرگە، كوكپارشىلار ءتىرى سەركەمەن ويناپ شاۋىپ جۇرگەن. حالىقارالىق جان-جانۋارلار الەمىن قورعاۋ ۇيىمدارىنىڭ قاعيدالارىنا قايشى كەلمەس ءۇشىن مۋلياجبەن وينايتىن بولامىز. كوكپار وينايتىن الاڭنىڭ ۇزىندىعى - 200-220 مەتر، ەنى 65-70 مەتر بولىپ بەكىتىلىپ وتىر. كوكپاردى جاسوسپىرىمدەر، جاستار جانە ەرەسەكتەر وينايدى. سول سەبەپتى، جاس ساناتىنا قاراي الاڭنىڭ دا ۇزىندىعى ءارتۇرلى بولادى»، - دەدى ول.

مۇحتارحان دىلدابەكوۆتىڭ ايتۋىنا قاراعاندا، كوكپاردى ويناۋ ۋاقىتى بۇرىنعىشا 20 مينۋتتان ەكى تايم كۇيىندە قالادى.

ەسكە سالا كەتسەك، استانادا الەمنىڭ 10 ەلىنىڭ ۇلتتىق سپورت فەدەراتسيا باسشىلارىنىڭ قاتىسۋىمەن بۇكىلالەمدىك كوكپار قاۋىمداستىعىنىڭ كەڭەسى وتكەن بولاتىن. كەڭەستە قاۋىمداستىققا جاڭا مۇشەلەر قابىلدانىپ، حالىقارالىق جارىستاردى ۇيىمداستىرۋ ءتارتىبى قارالدى. جيىندا كوكپاردىڭ حالىقارالىق ەرەجەلەرى تالقىلاندى. كەڭەسكە قازاقستان، ماجارستان، تۇركيا، قىتاي، وزبەكستان، تاجىكستان، اۋعانستان، موڭعوليا، قىرعىز رەسپۋبليكاسى، رەسەي ۇلتتىق فەدەراتسياسىنىڭ وكىلدەرى قاتىستى.

كوكپاردىڭ حالىقارالىق ەرەجەسىنە حاتتاما نەگىزىندە جوعارىدا اتالعان 10 ەلدىڭ ۇلتتىق فەدەراتسيا باسشىلارى قول قويدى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار