تسيفرلاندىرۋ – جاستارعا جاڭا مۇمكىندىك

قازاقستان • 14 اقپان، 2019

تسيفرلاندىرۋ – جاستارعا جاڭا مۇمكىندىك

2019 جىلدىڭ «جاستار جىلى» بولىپ جاريالانۋىن «تەحنولوگيالىق، ەكونوميكالىق جانە الەۋمەتتىك شاپشاڭ دا تەرەڭ وزگەرىستەر ءداۋىرى» دەپ اتاپ وتكەن مەملەكەت باسشىسىنىڭ ءتورتىنشى ونەركاسىپتىك رەۆوليۋتسيا داۋىرىندەگى جاڭا تالاپتارعا دايىن بولۋ قاجەتتىگى جونىندەگى تاپسىرماسىن جاۋاپكەرشىلىكپەن قابىلداعان جاس عالىمدار وتاندىق عىلىمدا تىڭ جاڭالىقتار اكەلۋگە تىرىسۋدا.

الەمنىڭ كوپتەگەن ەلىندەگىدەي قازاقستاندا دا تسيفرلاندىرۋ كەزەڭى باستالىپ كەتتى. وسى جىلدىڭ «جاستار جىلى» دەپ جاريالانۋى IT سالاسىنداعى جاستارعا سەنىم ارتتى دەۋگە نەگىز كوپ. ونىڭ ىشىندە اقپاراتتىق جانە ەسەپتەۋىش تەحنولوگيالار ينستيتۋتىندا (اەتي) ەڭبەك ەتىپ جۇرگەن جاستار ەرەكشە سەرپىلىپ، عىلىمي ىزدەنىستەرگە ىنتالارى ارتا تۇسكەندەي. ينستيتۋت جاستارى وزدەرىنىڭ IT سالاسىنداعى ىزدەنىستەرىن عىلىمي جوبالار تالاپتارىنا سايكەستەندىرىپ، سەمينارلارعا ۇسىنۋدا. وسى تۇستا جاس عالىمداردىڭ جەتىستىگىن ايتا كەتكەندى ءجون كورىپ وتىرمىز. تالعات يسلامعوجاەۆ كوپشىلىككە قىزمەت كورسەتۋگە ارنالعان روبوتتىق جۇيەلەردىڭ 3 ءتۇرىن جوبالاپ تۇتىنۋشىلارعا ۇسىنسا، جاڭعىرمالى ەنەرگيا كوزدەرى بويىنشا جاڭا جوبالار دايىنداۋدا سالاۋات داۋىلباەۆ، ءومىرلان اۋەلبەكوۆ، مۇرات كۇنەلباەۆ، نازبەك كاتاەۆ سياقتى جاستار تسيفرلى باسقارىمدى جاڭا ەنەرگەتيكالىق جۇيەلەر جاساۋدى قولعا الۋدا. ال رۋستام مۇساباەۆتىڭ جەتەكشىلىگىندەگى جاستار جەكە تۇلعانىڭ قوعامداعى دامۋى، ەلىمىزدىڭ قاۋىپسىزدىگى جانە الەۋمەتتىك تۇراقتىلىعى سياقتى ماسەلەلەرگە نەگىز بولاتىن الەۋمەتتىك قۇنى بار جوبانى جۇزەگە اسىرۋدا جەتىستىكتەرگە جەتۋدە.

بۇگىندە ينستيتۋت قۇرامىنىڭ 60 پايىزى جاس عالىمداردان جاساقتالعان. جاستاردىڭ عىلىمي جۇمىسىنىڭ، شىعارماشىلىعىنىڭ، سونداي-اق لاۋازىمىنىڭ وسۋىنە تولىق جاعداي بار. ينستيتۋت جاستارى الدىڭعى قاتارلى شەتەلدىك ۋنيۆەرسيتەتتەردە عىلىمي تاعىلىمدامالاردان وتە الادى. ءال-فارابي اتىنداعى قازۇۋ مەن اEتي اراسىنداعى ءبىلىم الۋ باعدارلاماسى بويىنشا ينستيتۋت جاستارىنا PhD دوكتورى دارەجەسىن الۋ دا جولعا قويىلعان. ال ينستيتۋتتىڭ 9 عىلىمي قىزمەتكەرىنىڭ نەسيەلەۋ باعدارلاماسى اياسىندا جەڭىلدىكپەن باسپانالى بولۋى جاستاردىڭ عىلىمعا دەگەن قۇلشىنىسىن ارتتىرا تۇسكەنى انىق.

ەلىمىزدە اقپاراتتىق تەحنولوگيالار سالاسىنداعى بىردەن-ءبىر مامانداندىرىلعان بەيىندى عىلىمي ۇيىم رەتىندە ينستيتۋت قۇرامىندا ءارتۇرلى عىلىمي باعىتتار بويىنشا اقپاراتتىق قاۋىپسىزدىك، ماتەماتيكالىق جانە كومپيۋتەرلىك مودەلدەۋ، بەينەلەردى تانۋ جانە شەشىمدەر قابىلداۋ، ماتەماتيكالىق كيبەرنەتيكا جانە ەسەپتەۋىش تەحنولوگيالار، اقپاراتتىق جانە تەلەكوممۋنيكاتسيالىق قىزمەت كورسەتۋ، يننوۆاتسيالىق جانە سمارت-تەحنولوگيالار، 13 زەرتحانا جۇمىس ىستەيدى. «روبوتوتەحنيكالىق جۇيەلەر جانە ماشينالىق كورۋ» جوباسى شەڭبەرىندە كەدەرگىلەردى اينالىپ ءوتۋ ءۇشىن موبيلدىك روبوت، وقۋ-جاتتىعۋ ماقساتتارى ءۇشىن موبيلدىك پلاتفورما، ۆيدەوكامەراسى بار گەكسوكوپتەر، بارلاۋشى روبوت-تانك، ءموبيلدى مينيروبوت، بيونيكالىق قول، FarmBot روبوت-باعبان ازىرلەمەلەرى دايىندالدى.

ينستيتۋت عالىمدارى روبوتوتەحنيكالىق جۇيەلەردى باسقارۋ ءۇشىن مالىمەتتەردى سىمسىز تاسىمالداۋ جانە «بۇلتتىق ەسەپتەۋلەر» تەحنولوگيالارىن دامىتۋدا. بۇل مودەلدەردىڭ كوپشىلىگى KADEX-2016، 2018، «قايسار-2016»، «ايبىن-2016» ارنايى كورمەلەرىندە سىناقتان ءوتتى.

سونداي-اق قازاق ءتىلىن اقپاراتتىق جۇيەلەرگە ينتەگراتسيالاۋ بويىنشا ماتىندىك اقپاراتتاردى اۆتوماتتى جيناۋ، ساراپتاۋ جانە ءتىلدى انىقتاۋ، تانۋ ءۇشىن باعدارلامالىق كەشەندەر ازىرلەندى. جاس عالىمدار «قازاقستان حالقى» ينتەراكتيۆتى كارتاسىن جاساپ شىقتى.

ۇجىمنىڭ زياتكەرلىك الەۋەتىنىڭ قارجىلىق جانە ماتەريالدىق-تەحنيكالىق جاعىنان جەتكىلىكتى قامتاماسىز ەتىلۋى ەكونوميكانى جانە قوعامدى تسيفرلاندىرۋعا تولىق مۇمكىندىك بەرەدى.

ماقسات قاليمولداەۆ،

ۇعا اكادەميگى، اقپاراتتىق جانە ەسەپتەۋىش

تەحنولوگيالار ينستيتۋتىنىڭ باس ديرەكتورى