بريتاندىق عالىمداردىڭ وبىرعا قارسى رەۆوليۋتسياسى

الەم • 12 اقپان، 2019

بريتاندىق عالىمداردىڭ وبىرعا قارسى رەۆوليۋتسياسى

296 رەت كورسەتىلدى

بريتاندىق ينستيتۋت عالىمدارى وبىردىڭ 6 تۇرىنە قارسى ءدارى ويلاپ تاپتى. بۇل تۋرالى BBC News اقپاراتتىق اگەنتتىگى حابارلادى.

يننوۆاتسيالىق تەراپيا «تروياندىق ات» پرينتسيپىمەن اسەر ەتەدى. وندىرۋشىلەر توكسيندىق مولەكۋلالاردى زيانسىز انتيدەنەمەن قاپتاعان. وسىلايشا ول وبىردى ءدوپ تاۋىپ، ونى ىشىنەن قۇرتادى. وبىر سوڭعى شەگىنە جەتكەن، ەڭ كوپ تارالعان، سونداي-اق بۇعان دەيىن باسقا ەم تۇرلەرى اسەر ەتپەگەن قارالۋشىلارعا تاجىريبە جاسالدى.

اسىرەسە، زەرتتەۋشىلەر جاتىر موينى ىسىگى مەن نەسەپ جولدارىنداعى وبىرعا قارسى جاقسى ناتيجەگە قول جەتكىزگەن. جازىلمايدى دەگەن دياگنوز قويىلعان ءتورت قارالۋشىنىڭ جاعدايى وسىدان سوڭ جاقسارا باستادى. التى اي مەن توعىز اي ارالىعىندا تاجىريبە جاسالعان قارالۋشىلاردا ىسىك وسپەگەن نەمەسە كولەمى قىسقارعان.

سونىمەن قاتار تەراپيا وكپە، اس قورىتۋ، جاتىر مەن انالىق بەزدىڭ قاتەرلى ىسىگىن قايتاردى دەيدى بريتاندىق مەدبيكەلەر. بىراق، قۋىق جولى قاتەرلى ىسىگىنە اسەر ەتپەپتى.

«تروياندىق ات»

وندىرۋشىلەر تV (tisotumab vedotin) دەپ اتاعان دارىدە حيميالىق گيبريد پەن يممۋنوتەراپيا بار.

توكسيندى زات انتيدەنەنىڭ سوڭىنا بەكىتىلگەن. ول قاتەرلى ىسىك جاسۋشالارىنىڭ بەتىندە كوپ مولشەردە بولاتىن CD142 اقۋىزىمەن بىرىگەدى. ناتيجەسىندە مولەكۋلا ىسىك ىشىنە ەنەدى، توكسيننىڭ سىرتقى قابىعى اجىراپ، جاسۋشانى ىشىنەن جويادى.

تەراپيانىڭ جۇرەك اينۋ، السىزدىك، مۇرىننان قان اعۋ سىندى كەرى اسەرلەرى دە بار. الايدا، ول وتپەلى. ءبىرىنشى كلينيكالىق زەرتتەۋدە بەلگيا، ۇلىبريتانيا، دانيا، اقش، شۆەتسيادان 150-گە جۋىق ناۋقاستار قارالعان. تاجىريبە جەتەكشىسى، وبىرعا قارسى زەرتتەۋ ينستيتۋتىنىڭ باسشىسى دجوانا دە بونونىڭ ايتۋىنشا، بۇل ءدارى ىشەك، ۇيقى بەزى جانە باس قاتەرلى ىسىگىنەن ايىعۋعا دا سەپتىگىن تيگىزەدى.

«بۇل جاڭالىق تەراپيانىڭ ارەكەت ەتۋ ءپرينتسيپىن بىلدىرەدى. ءدارى-دارمەك وبىر جاسۋشالارىنا ەنىپ، تروياندىق ات سياقتى ولاردى ىشىنەن ولتىرەدى»، دەپ ءتۇسىندىردى ول.

بەس جىل كولەمىندە مۇنداي تەراپيا كلينيكالىق زەرتتەۋ اياسىندا عانا ەمەس، قاتارداعى پاتسيەنتتەرگە دە قول جەتىمدى بولماق.

سالتانات شىءنادىل

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز