قازاقستان • 12 اقپان، 2019

سۋ تاسقىنىنىڭ الدىن الۋ جونىندە كوميسسيالار قۇرىلدى - ج. قاسىمبەك

387 رەتكورسەتىلدى

پرەمەر-مينيستر باقىتجان ساعىنتاەۆتىڭ توراعالىعىمەن ءوتىپ جاتقان ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك بايانداما جاسادى.

"رەسپۋبليكالىق ماڭىزى بار اۆتوموبيل جولدارىن سۋ تاسقىنى كەزەڭىنە دايىنداۋ ماقساتىندا ءىس-شارالار جوسپارى بەكىتىلدى. ورتالىق جانە وڭىرلىك دەڭگەيدە اۆتوموبيل جولدارى كوميتەتىنىڭ، «قازاۆتوجول» ۇلتتىق كومپانياسى» اكتسيونەرلىك قوعامىنىڭ، «قازاقاۆتوجول» جاۋاپكەرشىلىگى شەكتەۋلى سەرىكتەستىگىنىڭ وكىلدەرىنەن، سونداي-اق ولاردىڭ وبلىستىق فيليالدارىنىڭ وكىلدەرىنەن سۋ تاسقىنىنىڭ الدىن الۋ جونىندە كوميسسيالار قۇرىلدى"، دەدى ول. 

سونىمەن قاتار 10 اقپاننان باستاپ تاۋلىكتىك كەزەكشىلىك ۇيىمداستىرىلدى جانە كۇن سايىن جولدار مەن جول قۇرىلىستارىن پاترۋلدەۋ جۇرگىزىلىپ، سۋ تاسقىنى قاۋپى بار ۋچاسكەلەر مەن كوپىرلەر باقىلاۋعا الىناتىن بولادى. مۇنداي ۋچاسكەلەرگە قاجەتتى جول تەحنيكاسى بەكىتىلەدى. سۋ تاسقىنى كەزەڭىنە ۋاقتىلى دايىندىقتى ۇيىمداستىرۋ ءۇشىن بەكىتىلگەن ءىس-شارالار جوسپارىنا سايكەس قاجەتتى جانار-جاعار ماي، جول ماتەريالدارى جانە تەمىربەتوندى كونسترۋكتسيالار قورى قۇرىلىپ جاتىر. سۋ تاسقىنىنا قارسى شارالاردى اتقارۋ كەزىندە وڭىرلەردەگى كليماتتىق جاعدايلار، سونىمەن قاتار وتكەن جىلدارداعى سۋ تاسقىنى كەزەڭى قورىتىندىلارى ەسكەرىلەدى.

سونىمەن قاتار جەڭىس قاسىمبەك تەمىر جولداردى جانە جاساندى قۇرىلىمداردى سۋ تاسقىنى كەزەڭىنە ۋاقتىلى دايىنداۋ ماقساتىندا، «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ بۇيرىعى بەكىتىلەتىنىن ايتتى.

پويىزدار ۇزدىكسىز جانە قاۋىپسىز ءجۇرۋ ءۇشىن 1 ناۋرىزعا دەيىن وڭتۇستىك وڭىردە، 15 ناۋرىزعا دەيىن باتىس جانە شىعىس وڭىرلەردە، ال 1 ساۋىرگە دەيىن سولتۇستىك ايماقتا قاجەتتى ماتەريالدار مەن كونسترۋكتسيالار تيەلگەن 42 ارنايى پويىز دايىندالادى.

سوڭعى جاڭالىقتار

ۇقساس جاڭالىقتار