قازاقستان • 08 اقپان، 2019

قورعانىس ءمينيسترى جۇمىس ساپارىمەن «ىلە» پوليگونىنا باردى

264 رەتكورسەتىلدى

اسكەري ۆەدومستۆو باسشىسى نۇرلان ەرمەكباەۆ «ىلە» پوليگونىنا جۇمىس ساپارىندا ەكىنشى جيىنتىق بىتىمگەرشىلىك روتاسى اسكەري قىزمەتشىلەرىنىڭ دايىندىق دەڭگەيى مەن جاۋىنگەرلىك مۇمكىندىكتەرىمەن تانىستى.

ساپار بارىسىندا قورعانىس ءمينيسترى بىتىمگەرشىلىك روتاسىمەن جابدىقتالعان وقۋ-ماتەريالدىق بازا مەن اسكەري تەحنيكانى ارالاپ كوردى. قازىرگى ۋاقىتتا ليۆان رەسپۋبليكاسىندا بىتىمگەرشىلىك ميسسياسىن ورىنداۋ ءۇشىن 120 اسكەري قىزمەتشى جۇمىس ىستەيدى.  

دارىستەردى بىتىمگەرشىلىك قىزمەتىندە تاجىريبەسى بار ماماندار، وفيتسەرلەر جانە بىتىمگەرشىلىك دايارلىعى جونىندەگى سەرجانتتار وتكىزەدى. ساباقتىڭ تەوريالىق بولىگى بۇۇ-نىڭ جالپى ەرەجەلەرى مەن قۇرىلىمىن، ليۆانداعى بىتىمگەرشىلىك ميسسياسىنىڭ ەرەكشەلىكتەرىن زەردەلەۋدى قامتيدى. ءىس جۇزىندە بىتىمگەرلەر بلوكپوستاردا، باقىلاۋ-وتكىزۋ پۋنكتتەرىندە قىزمەتتى ۇيىمداستىرۋ داعدىلارىن جەتىلدىرىپ، پاترۋلدەۋدى جۇزەگە اسىرادى.

«ليۆان رەسپۋبليكاسىنداعى بىتىمگەرشىلىك ميسسيا لايىقتى اتقارىلىپ كەلەدى. بۇل مەملەكەتتىك ماڭىزدى ءىس. ويتكەنى قازاقستان رەسپۋبليكاسىنىڭ الەمدىك قوعامداستىق الدىنداعى حالىقارالىق مىندەتتەمەلەرىن ورىنداۋى بولىپ تابىلادى. بىتىمگەرشىلىك ميسسياعا قاتىسا وتىرىپ، ءسىز قازاقستان رەسپۋبليكاسىن حالىقارالىق ارەنادا تانىستىراسىز. الىنعان جاڭا ءبىلىم مەن جاۋىنگەرلىك داعدىلار ءار ءتۇرلى ستاندارتتى ەمەس جاعدايلاردا بەكەتكە شابۋىل جاساۋ كەزىندە ارەكەت ەتۋگە مۇمكىندىك بەرەدى. ميسسيادا بولا وتىرىپ، بارلىق زاڭداردى، ەرەجەلەر مەن نۇسقاۋلىقتاردى قاتاڭ جانە ءدال ورىنداي وتىرىپ، جەكە قاۋىپسىزدىك شارالارىن ساقتاي وتىرىپ، باتىل، ءتارتىپتى جاۋىنگەرلەر بولىڭىزدار» دەدى مينيستر.

ونىڭ ايتۋىنشا، قورعانىس مينيسترلىگى اسكەري-ساياسي جاعدايى كۇردەلى اۋدانداردا، بەيتانىس فيزيكا-گەوگرافيالىق جاعدايلاردا قىزمەت اتقارۋدىڭ پايدالى پراكتيكالىق تاجىريبەسىن الۋ ماقساتىندا قازاقستاندىق اسكەري قىزمەتشىلەردىڭ شەتەلدە بىتىمگەرشىلىك ميسسيالارعا قاتىسۋىن كەڭەيتۋ جونىندە بەلسەندى جۇمىس جۇرگىزۋدە.

«وسىعان بايلانىستى «ىلە» پوليگونىندا بىتىمگەرشىلىك دايارلىقتان وتكەن قازاقستان قارۋلى كۇشتەرى اسكەري قىزمەتشىلەرىنىڭ سانىن ارتتىرۋ جوسپارلانىپ وتىر. سىزدەرگە اسكەري بورىشىن جوعارى دەڭگەيدە ورىنداپ، وتانعا دەگەن ابىرويمەن ورالۋلارىڭىزعا تىلەكتەسپىن» دەدى قورعانىس ءمينيسترى.

سونداي-اق، ساپار بارىسىندا الماتى گارنيزونىنىڭ اسكەري بولىمدەرى تەكسەرىلدى.

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

ۇقساس جاڭالىقتار