الماتىدا ديگيتالدى گرافيكا ونەرىنىڭ ايرىقشا كورمەسى اشىلدى.

ونەر • 07 اقپان، 2019

الماتىدا ديگيتالدى گرافيكا ونەرىنىڭ ايرىقشا كورمەسى اشىلدى.

248 رەت كورسەتىلدى

ءا.قاستەەۆ اتىنداعى ونەر مۋزەيىندە زاماناۋي ديگيتالدى گرافيكا ونەرىنىڭ ايرىقشا كورمەسى اشىلدى. ەسىمدەرى سۋرەت الەمىنەن گورى جۋرناليستيكادا قالىپتاسقان الەنا ۆەسەلوۆا مەن نادەجدا بەسەدينا بۇل باعىتتاعى ءتول تۋىندىلارىن مۋزەي كەڭىستىگىندە العاش رەت ۇسىنىپ وتىر.

كومپيۋتەرلىك گرافيكا – بۇقارالىق اقپارات قۇرالدارىندا دارا مانگە يە بولعانىمەن، جوعارى ونەر رەتىندە تولىق تانىلماعان قۇبىلىس. امبەباپتىق، ايقىندىلىق، ىقشامدىلىق وسىناۋ وزەكتى سالانىڭ باستى ەرەكشەلىگى. ونەر يەلەرى بەينەشىلدىككە ماتىندەر ارقىلى بويلاعان، سوندىقتان ادەبيلىك – ولاردىڭ گرافيكاسىنىڭ ورتاق ەرەكشەلىگى. ەكەۋى دە ءبىر تەحنيكادا جۇمىس ىستەي وتىرىپ، تۇبەگەيلى قاراما-قايشى بەينەلەر جاسايدى.

قوس اۆتوردىڭ تۋىندىلارىن ءبىر ارنادا توعىستىرعان كورمە ەكى بولىمنەن تۇرادى. الەنا ۆەسەلوۆانىڭ شىعارماشىلىق جۇمىستارى «ۆەكتورلار»، ال نادەجدا بەسەدينانىڭ كورمەسى «دارا ەسىم» دەپ اتالىپتى.

نادەجدا بەسەدينانىڭ نەگىزگى ماماندىعى - ساۋلەتشى. 90-جىلداردىڭ سوڭىندا ول ءوزىن سۋرەتشى-انيماتور رەتىندە سىناپ كورەدى. انيماتورلار توبىنىڭ قۇرامىندا «الدار-كوسە»، «زدراۆستۆۋي، دەتكا!»، «لەگەندى ستەپەي» سىندى مۋلتحيكايالاردىڭ جاسالۋىنا، وتاندىق تەلەارنالارداعى ءتۇرلى باعدارلامالاردىڭ انيماتسيالىق بەزەندىرۋ جۇمىستارىنا قاتىسادى. اسىرەسە، «گازەتا KZ»، «توچكا KZ»، «الاۋ كازاحستان»، Forbes Kazakhstan سياقتى باسىلىمداردا سۋرەتشى بولىپ قىزمەت اتقارعان جىلدارى ونەر يەسىن شىعارماشىلىق ەركىندىككە جەتەلەپتى.

الەنا ۆەسەلوۆا بولسا، بۇل ىسپەن جيىرما جىلدان استام ۋاقىتتان بەرى اۋەستەنىپ كەلەدى. الايدا، تىلسىم ونەرگە دەگەن قىزىعۋشىلىعى بالا جاستان ويانعان. ول جاستايىنان جانىنا جاقىن بولعان ديزاين مەن ونەر الەمىنە جان دۇنيەسىمەن ەنىپ كەتكەنىن ايتادى. تابيعاتىنان سەزىمتال الەنا ءوز گرافيكالىق پاراقتارىن ومىرگە، الەمگە، ادامدارعا دەگەن ىستىق ىقىلاسپەن، ماحابباتپەن تولتىرادى. ونىڭ كومپوزيتسيالارىندا سۇيىكتى قالاسى الماتىنىڭ اسەم كورىنىستەرى، تانىس كوشەلەرى كورەرمەنگە قالىپتى كۇيىندە ەمەس، ارمان سەكىلدى، ادەبي مەتافورا، جۇمباق گرافيكالىق بەلگى، شيفرلانعان نىشان سياقتى ەلەس بەرەدى.