ايماقتار • 07 اقپان، 2019

2018 جىلى باتىس قازاقستاندا 450 شاقىرىم جول سالىندى

333 رەتكورسەتىلدى

باتىس قازاقستان وبلىسى ەلىمىز بويىنشا اۆتوكولىك جولدارىنىڭ ساپاسى ەڭ تومەن وبلىستاردىڭ قاتارىنا جاتادى. سوڭعى جىلدارى جول قۇرىلىسى قارقىن الىپ، 2018 جىلى عانا ءتۇرلى دارەجەدەگى 450 شاقىرىم سالىندى. سونىڭ وزىندە جىل قورىتىندىسى بويىنشا وڭىردەگى جاقسى جانە قاناعاتتانارلىق جاعدايداعى جەرگىلىكتى ماڭىزى بار جولدارىنىڭ ۇلەسى – 28،7 % جەتكەن.

- قازىرگى تاڭدا باتىس قازاقستان وبلىسى بويىنشا اۆتوموبيل جولدارىنىڭ ءجاي-كۇيى وتە ماڭىزدى ماسەلە بولىپ تۇر. ويتكەنى تەمىرجول ءبىر بۇيىردەن وتەدى. باسىم كوپشىلىك اۋدان ءۇشىن اۆتوكولىك قاتىناسى – جالعىز عانا بايلانىس امالى. جولاۋشىلار دا، جۇك تاسىمالى دا وسى اۆتوجول ارقىلى جۇرەدى. بۇل ءوڭىردىڭ الەۋمەتتىك-ەكونوميكالىق دامۋىنا دا وتە زور اسەر ەتەتىندىگى دە ءسوزسىز، - دەيدى باتىس قازاقستان وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مەدەت شاقاەۆ.

باتىس قازاقستان وبلىسىندا اۆتوموبيل جولدارىنىڭ جالپى ۇزىندىعى 6 496،3 كم ەكەن. ونىڭ ىشىندە رەسپۋبليكالىق ماڭىزى بار جولدار – 1 392،6 كم، وبلىستىق جانە اۋداندىق ماڭىزى بار (جەرگىلىكتى) جولدار – 5 103،7 كم. جالپى العاندا جولداردىڭ 2 288 كم (35،2%) شاقىرىمى عانا اسفالتبەتون جابىندىلى.

وڭىردەگى جول قاتىناسى احۋالىنىڭ قانشالىق قيىن بولعانىن ءوزىڭىز باعامداڭىز: كۇنى كەشەگە دەيىن وبلىستاعى اۋدان ورتالىقتارىنىڭ تەڭ جارىمىنا قاتقىل تاباندى جول بولعان جوق. 2014-2017 جىلدارى عانا ءوڭىردىڭ ەڭ ماڭىزدى ماسەلەسى جارتىلاي شەشىلدى. «جىمپيتى-قاراتوبە»، «اقساي-شىڭعىرلاۋ»، «چاپاەۆ-جاڭاقالا-سايقىن» اۆتوجولدارىنىڭ تەلىمدەرىن قايتا جاڭعىرتۋ جانە كۇردەلى جوندەۋ ارقىلى جالپى سانى 56 مىڭنان استام ادام تۇراتىن 74 ەلدى مەكەنى بار قاراتوبە، شىڭعىرلاۋ، جاڭاقالا اۋدان ورتالىقتارى اسفالتبەتوندى جولعا جالعانىپ، وبلىس ورتالىعىمەن قوسىلدى.

وڭىردە جول سالاسىندا ەڭ اۋقىمدى جۇمىستار وتكەن جىلى اتقارىلدى. 2018 جىلى 33،8 ملرد تەڭگە بولىنگەن قاراجاتقا 450 كم جول جوندەلدى. ونىڭ ىشىنەن رەسپۋبليكالىق ماڭىزى بار 285 كم، جەرگىلىكتى ماڭىزى بار 77،9 كم جول سالىندى. اقساي قالاسى مەن باسقا اۋدان ورتالىقتارىندا 38،8 كم اۋىلىشىلىك جول سالىنسا، ورال قالاسىنىڭ وزىندە جاڭادان 50 شاقىرىم كوشە جولدارى جاڭارتىلدى.

ورالداعى وڭ وزگەرىستەر قازاقستاننىڭ حالىقارالىق كولىك قاتىناسىنا دا وڭ سەرپىن بەردى. «نۇرلى جول» باعدارلاماسى شەڭبەرىندە باتىس قازاقستان وبلىسى اۋماعىندا رەسپۋبليكالىق ماڭىزى بار «ورال-تاسقالا-رف شەكاراسى (وزينكي باعىتى)» 100 كم اۆتوجولىن قايتا جاڭعىرتۋ جوباسى اياقتالدى. جول II تەحنيكالىق ساناتقا قايتا جاڭعىرتىلدى. جولدىڭ جۇرەتىن بولىگىنىڭ ەنى 7،5 مەترگە جەتىپ، بەلتەمىرگە تۇسەتىن 13 توننا سالماقتى كوتەرەتىن ساپالى اسفالتبەتون جابىندىسىمەن قامتاماسىز ەتىلدى. 20 جىلعا كەپىلدىك بەرىلگەن بۇل جولمەن تاۋلىگىنە 4 403 اۆتوكولىك وتە الادى. رەسەي فەدەراتسياسىمەن شەكاراداعى «تاسقالا» وتكىزۋ پۋنكتىندە جولاقتار سانى ارتىپ، شەكارادا اۆتوكولىك پەن جولاۋشى كەپتەلىسىن جويدى. «بۇل ءوز كەزەگىندە مەملەكەت يميدجىنە وڭ اسەر ەتەدى. ويتكەنى كەز كەلگەن مەملەكەت تۋرالى العاشقى پىكىر شەكارا مەن كەدەندە قالىپتاسادى عوي» دەيدى مەدەت شاقاەۆ.

باتىس قازاقستاندا قازىر وبلىستىق ماڭىزى بار «ۇلكەن شاعان-پەرەمەتنوە-ۆەچنىي» 0-32 كم اۆتوجولىندا دا كۇردەلى جوندەۋ ءجۇرىپ جاتىر. ول بۇيىرسا 2019 جىلى پايدالانۋعا بەرىلمەك. اتالعان اۆتوجول ەكى رەسپۋبليكالىق ماڭىزى بار «ورال-اتىراۋ» جانە «ورال-تاسقالا-رف شەكاراسى (وزينكي باعىتى)» اۆتوجولدارىن قوسادى. جوبانى ىسكە اسىرۋ وبلىس ورتالىعى جولدارىن اتىراۋ-ساراتوۆ جانە كەرى باعىتتاردا كولىك قۇرالدارى اعىمىنىڭ ازايۋىنا مۇمكىندىك بەرەدى.

وڭىردە جول قۇرىلىسىنىڭ قارقىنى 2019 جىلى دا قىزۋ بولماق. ياعني 27،6 ملرد. تەڭگە قاراجاتقا 465 كم جول جوندەۋ جوسپارلانىپ وتىر. جىل ىشىندە جاڭا جانە باستالعان جوبالاردى ىسكە اسىرۋعا قوسىمشا قارجىلاندىرۋ كۇتىلۋدە.

رەسپۋبليكالىق ماڭىزى بار «چاپاەۆ-جالپاقتال-قازتالوۆ-رف شەكاراسى»، «سامارا-شىمكەنت»، «ورال-اتىراۋ» جانە وبلىستىق ماڭىزى بار «ۇلكەن شاعان-پەرەمەتنوە-ۆەچنىي»، «شىڭعىرلاۋ-اقشات-سەگىزساي»، «فەدوروۆ-اقساي»، ء«بورلى-اقساي-جىمپيتى»، «تاسقالا-اققۋراي-بولاشاق-رف شەكاراسى» اۆتوجولدارى بولىكتەرىندە جوندەۋ جۇمىستارىن جالعاستىرۋ جوسپارلانعان.

- وسىنداي كەشەندى جۇمىستاردىڭ ناتيجەسىندە 2019 جىلدىڭ قورىتىندىسى بويىنشا جاقسى جانە قاناعاتتانارلىق جاعدايداعى جەرگىلىكتى ماڭىزى بار اۆتوموبيل جولدارىنىڭ ۇلەسىن – 30،2 % دەيىن جەتكىزۋ جوسپارلانۋدا، - دەيدى باتىس قازاقستان وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مەدەت شاقاەۆ.

2018 جىلى مەملەكەت باسشىسىنىڭ باتىس قازاقستان وبلىسىنا ساپارى كەزىندە ەلباسى تاراپىنان شەشىلگەن ۇلكەن ماسەلە – بقو-نىڭ ورتالىعىن وڭتۇستىك اۋداندارمەن ساپالى جول قاتىناسى ەدى. وسى تاپسىرمانى ورىنداۋ ماقساتىندا قازتالوۆ، جانىبەك جانە بوكەي ورداسى اۋداندىرىنىڭ ورتالىقتارىن ورال قالاسىمەن جالعاۋ ءۇشىن ۇزىندىعى 245 كم قۇرايتىن اۆتوجولدى كۇردەلى جوندەۋ جوسپارلانعان. ونىڭ ىشىندە «قازتالوۆ-جانىبەك-رف شەكاراسى» اۆتوجولى - 142 كم، «ونەگە-بيسەن-سايقىن» اۆتوجولى – 103 كم. مەدەت ماحامبەت ۇلىنىڭ ايتۋىنشا، قازىرگى ۋاقىتتا بۇل جولداردىڭ جوبالىق-سمەتالىق قۇجاتتاماسى جاساقتالىپ، مەملەكەتتىك ساراپتاماعا جولدانعان. مەملەكەتتىك ساراپتامانىڭ وڭ قورىتىندىسىن العاننان كەيىن ناقتى قۇرىلىس باستالماق. وسى ءۇشىن 2019 جىلعا ارنالعان بيۋدجەت جوباسىندا 10 ملرد. تەڭگە جوسپارلانعان. ءسويتىپ 2021 جىلدىڭ سوڭىنا دەيىن وردا مەن جانىبەككە دە اسفالت جول جەتەدى.

ءبىر قۋانارلىعى، ورالدان ورىنبور قالاسى باعىتىندا اۆتوجولىن قايتا قۇرۋ ماسەلەسى بويىنشا دا جۇمىس جۇرگىزىلىپ جاتىر ەكەن. بقو جولاۋشىلار كولىگى جانە اۆتوموبيل جولدارى باسقارماسىنىڭ باسشىسىنىڭ ايتۋىنشا، «پودستەپنوە-فەدوروۆ-رف شەكاراسى باعىتىنداعى 144 شاقىرىمدىق اۆتوجولدى قايتا جاڭعىرتۋ بويىنشا دا جوبالىق-سمەتالىق قۇجاتتاما جاساقتالىپ جاتىر ەكەن. ول دا 2019-2021 جىلدار ارالىعىندا ىسكە اسپاق.

جول سالىنسا، تامىرمەن قان جۇرەدى، اۋىل ەكونوميكاسىنا جان كىرەدى. اق جايىق ءوڭىرى حالقى الداعى ءۇش جىلدى اسىعا كۇتىپ وتىر.

قازبەك قۇتتىمۇرات ۇلى،

«ەگەمەن قازاقستان»

باتىس قازاقستان

سوڭعى جاڭالىقتار

ۇقساس جاڭالىقتار