ۇلى وتان سوعىسى: قازاقتان قانشا باتىر شىقتى؟

بيىلعى جىلى ۇلى وتان سوعى­سى­نىڭ اياقتالعانىنا 66 جىل تولىپ وتىر. سوڭعى مالىمەتتەر  بويىنشا، بۇرىنعى كەڭەس وداعىنىڭ 27 ميلليونداي ادامىن جالماعان سۇراپىلدا قازاقستاننان دا كوپتەگەن جاۋىنگەرلەر جاۋعا قارسى جان اياماي شايقاستى. وسىناۋ سوعىستا بۇكىل كسرو بويىنشا 12 مىڭنان استام جاۋىنگەرلەر، كومانديرلەر، قولباسشى­لار، پارتيزاندار، قاراپايىم حالىق وكىلدەرى وسى ەلدەگى 1934 جىلى  بەلگىلەنگەن ەڭ جوعارعى قۇرمەت – كەڭەس وداعىنىڭ باتىرى اتاعىن يەلەندى. سولاردىڭ قاتارىندا وعان يە بولعان قازاق ۇلتىنىڭ ازا­مات­تارى 103 بولىپ وتىر. اتالمىش كورسەتكىش بۇرىنعى دەرەكتەردە، ءتىپتى تاريح وقۋلىقتارىنىڭ بەتتەرىندە بىردە 95 نەمەسە 97، ەندى بىردە 98 بولىپ بەرىلىپ كەلگەن بولاتىن. مىنە، سونى ناقتىلاي ءتۇسۋ ماقساتىمەن كوپتەگەن انىقتامالىق كىتاپ­تارداعى 12 مىڭنان استام باتىردىڭ ءومىرباياندارىن سۇزە قاراپ، قازاق ازاماتتارىن زەردەلەي ىزدەۋگە تۋرا كەلدى. وزبەكتەر يەلەنىپ كەتكەن ايتۋلى قازاقتار: گەنەرال-مايور سابىر راحيموۆ پەن بولىمشە كومانديرى راسۋل ەسەتوۆ وسى ساناتقا قوسىلدى. دالىرەك ايتقاندا، سوعىس كەزەڭىندە بۇل اتاق 100 ادامعا ناقتى بەرىلسە، 1946 جىلى ونى سۇراعانوۆ قۇدايبەرگەن، 1965 جىلى گەنەرال راحيموۆ سابىر، ال 1990 جىلى مومىش ۇلى باۋىرجان الدى. بۇل تازا ۇرىس الاڭىندا بارلىعى 103 قازاق وسى جو­عا­رى اتاققا يە بولدى دەگەن ءسوز. كەيىن، ياعني بەيبىت كە­زەڭدە وعان قازاقتىڭ تۇڭعىش عارىشكەرى توقتار ءاۋبا­كىروۆ، اۋعان سوعىسىنىڭ قاھارمانى قايىربولات مايدانوۆ قوسىلدى. سوڭعى ازامات كەيىننەن چە­شەن­ستانداعى قانتوگىستە رەسەي باتىرى اتاعىن دا يەلەندى. وكىنىشكە قاراي، 2000 جىلى ونىڭ تىك­ۇشا­عى اتىپ ءتۇسىرىلىپ، ءوزى قازاعا ۇشىرادى. بۇلاردان تىس 90-شى جىلداردىڭ سوڭىندا كەش تە بولسا رەسەي باتىرى اتاعىن ۇلى وتان سوعىسىندا ەرلىكپەن قازا تاپقان ۇشقىش-راديست جەتىسۋلىق باقتىوراز بەيسەكباەۆ تا الدى. بىزدەر تومەندە ۇلتىمىزدىڭ ماقتانىشىنا اي­نال­عان ۇلى وتان سوعىسىنداعى باتىرلارىمىزدىڭ ناقتىلانعان قىسقاشا مالىمەتتەرىن نازارلارىڭىزعا ۇسىنىپ وتىرمىز. بۇل دەرەكتەر وسىدان 30-40 جىلداي بۇرىن شىققان كوپ تومدىق «گەروي سوۆەتسكوگو سويۋزا»، «قازاقستاندىق سوۆەت وداعىنىڭ باتىرلارى»، «قازاق سوۆەت ەنتسي­كلو­پەدياسى» كىتاپتارى نەگىزىندە قورىتىل­عاندىق­تان، ولاردىڭ ومىرباياندىق دەرەكتەرى سول كەزگە سايكەس كەلەدى. قازىرگى تاڭدا سوعىستان ءتىرى ورالعان باتىر­لاردىڭ دەنى ومىردەن ءوتىپ كەتكەندىگىن قاپەردە ۇستاعان ءجون. سوڭعى شىققان «قازاقستان» ۇلتتىق ەنتسي­كلو­پەدياسىندا باتىرلار ءىشىنارا قامتىلىپتى. اتاپ ايتقاندا، جالپى ءتىزىم تۇرىندە بەرىلگەن. بىراق ولاردىڭ ءوزى، وكىنىشكە قاراي، تولىق ەمەس. بىزگە ەڭ ماڭىزدىسى – كەشەگى ۇلى دالا باتىرلارىنىڭ تىككەن ەرلىك تۋىن قۇلاتپاي، اسقاق ۇستاعان وسى زامانعى قازاق باتىرلارىن جاس ۇرپاق قاستەر تۇتسىن، ارداقتاسىن دەگەن ىزگى تىلەكتى جۇزەگە اسىرۋ. ويتكەنى، قازاق قانىنان جارالعان جاس ۇرپاقتىڭ وتان ءۇشىن وت كەشكەن اتالارى مەن اپالارىنىڭ ەسىمدەرىن ءاردايىم قاستەر تۇتىپ جۇرگەندەرى ابزال! 1941 جىلدىڭ 22 ماۋسىمىندا فاشيستىك گەرمانيانىڭ كەڭەس وداعىنا وپاسىزدىقپەن باسىپ كىرگەنىنە بيىلعى جىلى 70 جىل تولماق. 1418 كۇن مەن تۇنگە سوزىلعان سۇراپىل سوعىستا ءبىزدىڭ سان مىڭداعان باۋىرلارىمىز وتان ءۇشىن وتقا ءتۇسىپ، قانشاما بوزداقتارىمىز سۇم سوعىستىڭ قۇربانى بولعانى – اششى شىندىق. ولاردىڭ باسىم كوپشىلىگى ەرلىكتىڭ ەرەن ۇلگىسىن كورسەتىپ، حالقىمىزدىڭ ەرلىك رۋحىن اسقاق­تات­تى. مىنا تومەندە بەرىلىپ وتىرعان كەڭەس ودا­عىنىڭ باتىرى اتاعىن العان قانداستارىمىزدىڭ ءتىزىمى – سونىڭ ايعاعى. 

P.S. تومەندەگى بەرىلىپ وتىرعان ءاربىر قىسقاشا دەرەكتىڭ  سوڭىندا ەرەكشەلەنىپ كورسەتىلگەن داتالاردى اعالارىمىزعا كەڭەس وداعىنىڭ باتىرى اتاعى قاي كۇنى بەرىلگەندىگىن بىلدىرەتىن كسرو جوعارعى كەڭەسى پرەزيديۋمىنىڭ جارلىعى شىققان كۇن دەپ ۇعىڭىزدار. 

پەرنەباي دۇيسەنبين، قازاقستان جازۋشىلار وداعىنىڭ مۇشەسى. 

* * * 

1. ابدولوۆ ميحايل 1918 جىلى ورال وبلىسىنىڭ چاپاەۆ  اۋدانىنداعى بىتىك قىستاعىندا مالشى وتباسىندا تۋعان. باتىر اتاعىنا 1944 جىلعى 7 قاراشادا دۋنايدان ءوتۋ كەزىندەگى ەرلىگى ءۇشىن ۇسىنىلعان. 23.3.1945. 

2. ايتقۇلوۆ ءسالىم 1913 جىلى ورال وبلىسىنىڭ جاڭاقالا اۋدانىنداعى مۇ­قىر قىستاعىندا تۋعان. كىشى لەيتەنانت. باتىر اتاعىنا 1943 جىلعى 29 قىركۇيەكتە دنەپر ءۇشىن بولعان ۇرىستا كورسەتكەن ەرلىگى ءۇشىن ۇسى­نىلعان. 17.12.1943. 

3. ايتىقوۆ ىزعۇتتى (1922-1944).  شىعىس قا­زاق­ستان وبلىسىنىڭ ۇلان اۋدا­نىندا تۋعان. گۆارديا ستار­شيناسى، بارلاۋشى. باتىس دۆينا وزەنىندە، پولوتسك قالاسىندا بولعان ۇرىستا ەرلىك كورسەتكەن. 22.7. 1944. 

4. اقباۋوۆ ورازاق 1908 جىلى ورىنبور وبلى­سىندا تۋعان. گۆارديا كاپي­تا­نى. 1943 جىلى دنەپر، پريپيات ما­ڭىنداعى ۇرىستاردا تاپ­قىر­لىق، ەرلىك كورسەتكەن. 17.10.1943. 

5. اۋحاديەۆ قوي­گەل­دى (1907-1943). سەمەي وب­لىسىنىڭ كوكپەكتى اۋدا­نىن­دا تۋعان. قاتارداعى جاۋىن­گەر. 1943 جىلعى دنەپر وزەنى ءۇشىن بولعان ۇرىستا ۇلكەن ەرلىك كورسەتىپ، نەگىزگى كۇشتىڭ كەدەرگىسىز ءوتۋىن قامتاماسىز ەتكەن. 16.10.1943. 

6. ابدىاليەۆ قارا­قوزى (1908-1943).  شىمكەنت وبلىسىنىڭ لەنگىر اۋدانىندا تۋعان. لەيتەنانت. باتىر اتا­عىنا 1943 جىلعى مەليتوپول قالاسىنداعى ۇرىستا كورسەت­كەن ەرەن ەرلىگى ءۇشىن ۇسى­نىلعان. 1.11.1943. 

7. ءابدىروۆ نۇركەن (1919-1942). قاراعاندى وب­لىسىنىڭ قارقارالى اۋدا­نىندا تۋعان. سەرجانت. 1942 جىلى روستوۆ وبلىسىنىڭ ۆەشەنسك اۋدانىنداعى بول­عان اۋە ۇرىسىندا جانعان ۇشا­عىن جاۋ تەحنيكاسىنىڭ شو­عىرلان­عان جەرىنە ءدال باعىتتاپ، ەرلىكپەن قازا تاپقان. 31.3.1943. 

8. ءابدىجاپپاروۆ سا­دىق. 1925 جىلى شىمكەنت وب­لىسىنىڭ شايان اۋدانىندا تۋعان. قاتارداعى جاۋىنگەر. باتىر اتاعىنا باتىس دۆينادان جالعىز ءوزى ءوتىپ، جاۋ پۋلەمەتىن جانە 30-داي نەمىس سولداتىن جويعان ەرلىگى ءۇشىن ۇسىنىلعان. 22.7.1944. 

9. ابەۋىلوۆ مۇقاتاي (1917-1944).  سەمەي وبلى­سىنىڭ شۇبارتاۋ اۋدانىندا تۋ­عان. گۆارديا سەرجانتى. با­تىر اتاعىنا ۆەنگريانى ازات ەتۋ سوعىسىندا كورسەتكەن ەرلىگى ءۇشىن ۇسىنىلعان.  28.04.1945. 

10. ءابۋتالىپوۆ ءان­ۋ­ار. 1923 جىلى قىزىلوردا وبلىسىنىڭ جاڭاقورعان اۋدا­نىندا تۋعان. پۋلەمەت راسچەتىنىڭ كومانديرى. باتىر اتاعىنا تيسسا وزەنى ماڭىن­دا بولعان ۇرىستا وزەننەن 47 رەت قايىقپەن قاتىناپ، روتا جاۋىنگەرلەرىن اسكەري جاب­دىقتارمەن قامتاماسىز ەتكەن ەڭبەگى ءۇشىن ۇسىنىلعان. 24.03.1945. 

11. ءاجىموۆ تولەباي. 1921 جىلى  استراحان وب­لىسىنىڭ يكريان اۋدانىندا تۋعان. 1944 جىلى كراستنوستيۆ قالاسىن ازات ەتۋدە، ۆيسلا وزەنىنەن وتكەندە ۇلكەن ەرلىك كورسەتكەن. 29.4.1944 

12. الىمبەتوۆ ابى­لاي. 1921 جىلى شىمكەنت وبلىسىنىڭ قىزىلقۇم اۋدانىندا تۋعان. باتىر اتاعىنا بريانسك، ۋكراينا جەرلەرىندە وتكەن ۇرىستاردا كوزسىز ەرلىك كورسەتكەنى ءۇشىن ۇسىنىلعان. 30.10.1943. 

13. ءاشىروۆ سەيىت­قا­سىم. 1924 جىلى شىمكەنت وبلىسىنىڭ تۇركىستان اۋدا­نىندا دۇنيەگە كەلگەن. قا­تارداعى جاۋىنگەر. باتىر اتاعىنا بەلورۋسسيا، پولشا ءۇشىن بولعان ۇرىستار الدىن­داعى بارلاۋدا ۇلكەن ەرلىكتەر كورسەتكەن ەرجۇرەكتىگى ءۇشىن ۇسىنىلعان. 24.3.1945. 

14. بايماعانبەتوۆ سۇلتان (1920-1943). قوس­تاناي وبلىسىنىڭ سەميوزەر اۋدانىندا تۋعان. اعا سەرجانت. لەنينگراد ءۇشىن بول­عان ۇرىستا جاۋ امبرا­زۋ­راسىن دەنەسىمەن جاۋىپ، ەرلىكپەن قازا تاپقان. 21.02.1944. 

15. بايمۇقانوۆ مۇسا (1910-1945). گۋرەۆ وبلى­سىنىڭ ماقات اۋدانىندا تۋعان. ۆزۆود كومانديرى. ودەر وزەنىن كەسىپ ءوتۋ كەزىندە ۇلكەن ەرلىگىمەن تانىلعان. 10.04.1945. 

16. بال­ما­عان­بە­توۆ ماقاش. 1914 جىلى قىزىل­وردا وبلىسىنىڭ قا­زالى اۋدا­نىندا تۋعان. قاتارداعى جاۋىنگەر. دنەپروپەتروۆسك وب­لىسىنىڭ بوروداەۆكا قىس­تاعى ماڭىندا بولعان شاي­قاستا قاھارماندىق، تەڭدەسسىز باتىلدىق كورسەتكەن. 22. 2.1944. 

17. بەگەنوۆ ءمادي (1916-1944). استراحان وبلىسىنىڭ احتۋبا اۋدانىندا تۋعان. بولىمشە كومانديرى. دنەپردەن ءوتۋ كەزىندە اسقان ەرلىك كورسەتكەن. 19.3.1943. 

18. بەلىباەۆ زاكاريا. 1917 جىلى سەمەي وبلى­سى­نىڭ اباي اۋدانىندا تۋعان. قاتارداعى جاۋىنگەر. دنەپر­دەن ءوتۋ كەزىندە اسقان ەرلىك كورسەتكەن. 10.10.1943. 

19. بوكەنباەۆ ءمال­كاجدار. 1924 جىلى اقتوبە وبلىسىنىڭ جۇرىن اۋدا­نىندا تۋعان. لەيتەنانت. ول باسقارعان ۆزۆود بۋگ وزەنى ماڭىنداعى ۇرىستا جاۋدىڭ 102 سولداتى مەن وفيتسەرىن قولعا تۇسىرگەن. 22.2.1945. 

20. بالتابەكوۆ يمان­­­عالي (1925-1945). اق­توبە وبلىسىنىڭ قوبدا اۋدا­نىندا تۋعان. سەرجانت. پۋلەمەت راسچەتىنىڭ كومانديرى. ودەر وزەنى ماڭىن­دا­عى ودەرفەلد  دەرەۆنياسى ءۇشىن شاي­قاستاعى ءبىر اپتا ىشىندە 120 جاۋدىڭ كوزىن جويىپ، ەرلىكپەن قازا تاپقان. 10.4.1945. 

21. بايىسوۆ ماتاي (1903-1943). تالدىقورعان وب­لى­سىنىڭ تالدىقورعان اۋدا­نىندا تۋعان. دنەپردەن ءوتۋ كەزىندە ۇلكەن ەرلىك كورسەتىپ، كيەۆ وبلىسىنىڭ چەرنياحوۆ سەلوسى ءۇشىن بولعان ۇرىستا قازا  تاپقان. 10.1.1944. 

22. بەكبوسىنوۆ سە­­رىكعازى. 1925 جىلى  سەمەي وبلىسىنىڭ اباي اۋ­دانىندا تۋعان. سۆير وزەنىنەن ءوتۋ كەزىندە جان­قيارلىق ەرلىكتىڭ ۇلگىسىن كورسەتكەن. 21.06.1944. 

23. بيگەلدينوۆ تال­عات. 1922 جىلى اقمولا وب­لىسىنىڭ اقمولا اۋدانىندا تۋعان. بالالىق شاعى فرۋنزە قالاسىندا وتكەن. چكالوۆ اسك­ە­ري اۆياتسيا ۋچيليششەسىن بىتىرگەن. كالينين، ۆورونەج، دالا­لىق ۋكراينا، ودەر مەن نيدجەردەگى ۇرىستارعا قاتىسقان. جاۋعا قارسى 305 دۇركىن ۇشىپ شىعىپ، سان رەت باتىلدىق پەن تاپقىرلىقتىڭ ۇلگىسىن كورسەت­كەن. سول ءۇشىن باتىر اتاعىنا ەكى مارتە ۇسى­نىل­عان قازاقتىڭ دارا ازاماتى.  26.10.1944.، 27.6.1945. 

24. عابدۋللين مالىك (1915-1973). كوكشەتاۋ وبلى­سىنىڭ زەرەندى اۋدانىندا تۋعان. روتا كومانديرى. مايور. اتاقتى 8-ءشى گۆارديالىق ديۆيزيا ساپىندا شايقاسقان. با­تىر اتاعىنا ماسكەۋ تۇبىندەگى ەرلىگى ءۇشىن ۇسىنىلعان. 30.1.1943. 

25. داۋلەتبەكوۆ امان­تاي (1917-1943). قاراعاندى وبلىسىنىڭ جاڭاارقا اۋدا­نىندا تۋعان. زەڭبىرەك كومانديرى. دون، ەدىل وزەنى، كۋرسك يىنىندەگى شايقاستارعا قاتى­سىپ، ءار كەزەڭدە ءوز زەڭبى­رە­گىمەن جاۋدىڭ 24 تانك، 13 زەڭبىرەگىن، 200-گە جۋىق ءفاشيستى جويعان. 24.12.1943. 

26. دوسمۇحامبەتوۆ ءابۋ (1920-1943). سولتۇستىك قازاقستان وبلىسىنىڭ پريشيم اۋدانىندا تۋعان. روتا كومانديرى، اعا لەيتەنانت. دنەپردەن ءوتۋ كەزىندە ەرەن ەرلىك، قاھارماندىق ۇلگىسىن كورسەتكەن. 16.10.1943. 

27. ەلەۋىسوۆ جانىبەك 1925 جىلى التاي ولكەسى، تاۋلى التاي اۆتونوميالىق وبلىسىندا تۋعان. پۋلەمەتشىلەر بولىمشەسىنىڭ كومانديرى. ۆورونەج مايدانىنداعى ۇرىستاردا قاھارماندىق ۇلگى­سىن كورسەتكەن. 16.10.1943. 

28. ەسبولاتوۆ نار­سۇت­باي (1913-1941).  تالدى­قور­عان وبلىسىنىڭ اقسۋ اۋدا­نىندا تۋعان. 28 پانفيلوۆشى جاۋىنگەردىڭ ءبىرى. دۋبوسەكوۆو رازەزى تۇبىندەگى ۇرىستا ەرلىكپەن قازا تاپقان. 21.7.1944. 

29. ەستەمىسوۆ ساتتار (1919-1943).  جامبىل وبلى­سىنىڭ شۋ اۋدانىندا تۋعان. سەرجانت، اۆتومات­شى­لار بولىمشەسىنىڭ كومانديرى. سمولەنسك وبلىسىنىڭ پرەچيستينسك اۋدانىندا بولعان شاي­قاستا ۇلكەن ەرلىك كور­سەتىپ، قاھارماندىقپەن قازا تاپقان. 4.6.1944. 

30. ەسەتوۆ راسۋل 1924 جىلى شىمكەنت وبلىسىنىڭ تۇركىستان قالاسىندا تۋعان. بولىمشە كومانديرى. شابۋىل كەزىندە ونىڭ بولىمشەسى جاۋ­دىڭ 50 سولداتى مەن وفيتسەرىن جويىپ، وق-ءدارى قويماسىن قول­عا تۇسىرگەن. 13.9.1945. 

31. ەسقاليەۆ سۇندەت­قالي (1924-1944). ورال وبلىسىنىڭ ءبورلى اۋدانىندا تۋعان. قاتارداعى جاۋىنگەر. موگيلەۆ وبلىسىنىڭ ليديتسا دەرەۆنياسى ماڭىندا بولعان شايقاستا جاۋ امبرازۋراسىن كەۋدەسىمەن جاۋىپ قازا تاپقان. 24.3.1945. 

32. جازىقوۆ قوجاباي. 1920 جىلى اقتوبە وبلىسى­نىڭ بايعانين اۋدانىندا تۋ­عان. لەيتەنانت. بارلاۋ­شى­لار ۆزۆودىنىڭ كومانديرى. ءار كەزەڭدە جاۋدىڭ 250 وفيتسەر، سولداتىن تۇتقىنعا العان. بۋداپەشتەگى جاۋ توبىن جويىپ، ۇلكەن ەرلىك ىسىمەن كوزگە ءتۇس­كەن. 28.4.1945. 

33. جاقسىعۇلوۆ سا­دىق. 1924 جىلى ورال وبلى­سىنىڭ جاڭاقالا اۋدانىندا تۋعان. مينومەت بولىمشەسىنىڭ كومانديرى. دنەپردەن ءوتۋ ءۇشىن بولعان ۇرىستا ۇلكەن ەرلىك، باتىلدىق كورسەتكەن. 22.2.1944. 

34. جانۇزاقوۆ ابدۋللا (1918-1944).  اقتوبە وبلىسىنىڭ قوبدا اۋدا­نىن­دا تۋعان. اۆتوماتشى. نەۆەل قالاسى مەن گلۋحوۆكا ەلدى مەكەنىندە جانقيارلىق ەرلىكپەن كوزگە تۇسكەن. باتىس دۆينا وزەنىنەن ءوتۋ كەزىندە قاھار­مان­دىقپەن قازا تاپقان. 22.7.1944. 

35. ءجۇنىسوۆ ءماجيت (1917-1945). ورال وبلىسى­نىڭ جاڭاقالا اۋدانىندا تۋعان. ستارشينا. اۆتومات­شى. دنەپر­دەن ءوتۋ كەزىندە اسكەري باس­شىلىق تاپسىرما­سىن ءمۇل­تىك­سىز ورىنداپ، وپە­را­تسيانىڭ ءساتتى ورىندالۋىن قام­تاماسىز ەتكەن. 20.12.1943. 

36. جامانعاراەۆ قا­شاعان 1910 جىلى الما­تى وبلىسىنىڭ شەلەك اۋدا­نىن­دا تۋعان. قاتارداعى جاۋ­ىنگەر. ستالينگراد، كۋرسك، ۋكرايناداعى شايقاستاردا ەر­لىك كورسەتكەن. 17.10.1943. 

37. جولداسوۆ لەسبەك. 1920 جىلى شىمكەنت وبلى­سىنىڭ كەلەس اۋدانىندا تۋ­عان. روتا كومانديرى. دۋناي وزەنىنەن ءوتۋ كەزىندە ەرلىك ۇلگىسىن   كورسەتكەن. 24.3.1945. 

38. جۇماليەۆ قيل­ماش (1918-1945). رسفسر-ءدىڭ دونباسس وبلىسىنداعى پريما اۋدانىندا تۋعان. كىشى سەرجانت. ۆارشاۆا تۇبىندەگى  ۇرىستا عاجاپ ەرلىكتىڭ ۇلگىسىن كورسەتىپ، جاۋدىڭ 2 دزوتىن جويىپ، بيىكتەگى بلينداجىن توپتالعان گراناتامەن تال­قان­داپ، نەمىستەردى قىرعىنعا ۇشىراتقان. 27.2.1945. 

39. يشانوۆ ەستاي 1906 جىلى قوستاناي وبلى­سىنىڭ جەتىقارا اۋدانىندا تۋعان. گۆارديا كىشى سەر­جان­تى. دنەپردىڭ باتىسىنداعى  مەدۆين اۋدانىندا دۇش­پان­نىڭ 3 تانكىسىن، قارۋ تيەگەن 7 ماشيناسى مەن ءبىر با­تالون­عا جۋىق اسكەرىن جويىپ، ەرەسەن ەرلىك كورسەتكەن. 17.10.1943. 

40. يبراگيموۆ تەمىربەك (1922-1943).  شىمكەنت وبلىسىنىڭ ءشاۋىلدىر اۋدا­نىندا تۋعان. قاتارداعى جاۋ­ىنگەر. دنەپردەن ءوتۋ كەزىندە اسا زور ەرلىك كورسەتىپ، قازا تاپقان. 30.10.1943. 

41. يساحانوۆ بەرگەن (1922-1970). قاراعاندى وب­لى­سىنىڭ جاڭاارقا اۋدا­نىندا تۋعان. بولىمشە كومانديرى، سەرجانت. دنەپردەن ءوتۋ كەزىندە ەرلىك پەن باتىلدىق كورسەتىپ، وپەراتسيانىڭ ءساتتى وتۋىنە ۇلكەن ىقپال جاساعان. 30.10.1943. 

42. كەنجەباەۆ تولە. 1902 جىلى الماتى وب­لى­سىنىڭ شەلەك اۋدانىندا تۋ­عان. اتتى اسكەر پولكىنىڭ جاۋ­­ىن­گەرى. دنەپردەن ءوتۋ كەزىندە ۇلكەن ەرلىك پەن با­تىلدىق كورسەتكەن. 15.1.1944. 

43. كومەكباەۆ تاي­ىمبەت. 1896 جىلى قى­زىل­وردا وبلىسىنىڭ قارماقشى اۋدانىندا تۋعان. بار­لاۋ­شى­لار بولىمشەسىنىڭ كومانديرى. كەزەكتى ءبىر وپەراتسيادا ءبىر ءوزى 60 ءفاشيستى ءولتىرىپ، 12-ءسىن تۇتقىنعا العان. ودەردەن ءوتۋ كەزىندە ەرەسەن ەرلىك كورسەتكەن. 10.4.1945. 

44. كوبىكوۆ حاميت (1916-1973). تالدىقورعان وبلى­سىنىڭ پانفيلوۆ اۋدا­نىندا تۋعان. زەڭبىرەك ءبولىم­شە­سىنىڭ كومانديرى. ستالينگراد، بەرلين، پراگا ءۇشىن بول­عان ۇرىستارعا قاتىسقان. ودەر وزەنىنەن وتكەن كەزدە جاۋدىڭ 3 تانكىسىن، 30-داي سولدات، وفيتسەرى مەن 4 برون­دى ماشيناسىن جويعان. 10.4.1945. 

45. قوساەۆ الىكباي (1905-1941).  الماتى وبلى­سى­نىڭ ەڭبەكشىقازاق  اۋدا­نىندا تۋعان. قاتارداعى جاۋ­ىن­گەر. قاھارمان 28 گۆار­دياشى پانفيلوۆشىنىڭ ءبىرى. دۋبوسەكوۆو تۇبىندە بولعان جويقىن سوعىستا ەرلىكپەن قازا تاپقان.  21.7.1942. 

46. قاۋىنباەۆ تو­عان­باي. 1923 جىلى شىمكەنت وبلىسىنىڭ قىزىلقۇم اۋدا­نىندا تۋعان. قاتارداعى جاۋ­ىنگەر. دنەپردەن ءوتۋ كەزىندە اسقان ەرلىك جاساپ، كوزگە تۇسكەن. 30.10.1943. 

47. قيزاتوۆ جالەل. 1920 جىلى سولتۇستىك قازاق­ستان وبلىسىنىڭ لەنين اۋدا­نىندا تۋعان. قاتارداعى جاۋ­ىن­گەر. دنەپردەن ءوتۋ كەزىندە ۇلكەن ەرلىك كورسەتكەن. 17.1.1944. 

48. قوجابەرگەنوۆ الياسقار (1917-1941). تال­دى­قورعان وبلىسىنىڭ قارا­تال اۋدانىندا تۋعان. قاتار­دا­عى جاۋىنگەر. قاھارمان 28 گۆاردياشى-پانفيلوۆشىنىڭ ءبىرى.  دۋبوسەكوۆو تۇبىندەگى شاي­قاستا ەرلىكپەن قازا تاپقان. 21.7.1942. 

49. قۇرمانوۆ اقان (1918-1943).  اقمولا وبلى­سىنىڭ اتباسار اۋدانىندا تۋعان. اتقىشتار ديۆيزيا­سى­نىڭ قۇرامىندا ۇرىسقا قا­تى­سىپ، وجەتتىگىمەن كوزگە ءتۇس­كەن. دنەپردەن ءوتۋ كەزىندە ەرلىكپەن قازا تاپقان. 15.1.1944.

50. قابىلوۆ تولەن (1917-1945). الماتى وبلى­سىنىڭ شەلەك اۋدانىندا تۋ­عان. قاتارداعى جاۋىنگەر. ستالينگراد، دون، قىرىم، ۋكراينا مايداندارىنداعى كوپ­تەگەن  ۇرىستارعا قاتىس­قان. كەنيگسبەرگ قالاسى ءۇشىن بولعان شايقاستا ۇلكەن ەرلىك كورسەتىپ، قازا تاپقان. 19.4.1945. 

51. قايىپوۆ ءجۇنىس­باي (1907-1944). الماتى وب­لىسىنىڭ  شەلەك اۋدانىندا تۋعان. ستارشينا. تانككە قار­سى وق اتاتىن زەڭبىرەك كومانديرى. اسقان مەرگەندىگىمەن كوزگە تۇسكەن. نوۆگورود قالا­سى ءۇشىن بولعان ۇرىستا ۇلكەن ەرلىك جاساعان. 1.7.1944.

52. قايىرباەۆ ماحمەت. 1925 جىلى سەمەي وبلى­سىنىڭ بەسقاراعاي اۋدانىن­دا تۋعان. اعا لەيتەنانت. باتارەيا كومانديرى. شاۋلياي قا­لاسى ءۇشىن بولعان ۇرىستا جاۋعا ويسىراتا سوققى بەرىپ، ۇلكەن ەرلىك كورسەتكەن. 24.3.1944. 

53. قالدىقاراەۆ جۇ­ماعالي (1922-1944). تۇركى­مەن­ستاننىڭ تاشاۋىز وبلى­سىنداعى حودجەيلى اۋدانىندا تۋعان. قاتارداعى جاۋىنگەر. 1943 جىلى دنەپردەن ءوتۋ كەزىندە ەرەن ەرلىك جاساعان. 15.1.1944. 

54. قامزين قاناش (1919-1944).  پاۆلودار وبلىسىنىڭ ەرماك اۋدانىندا تۋعان. روتا كومانديرى، لەيتەنانت. دنەپردەن ءوتۋ كەزىندە اسقان ەرلىك كورسەتىپ، قازا تاپقان. 13.9.1944. 

55. قاراقۇلوۆ جۇمان (1921-1944).  قاراقالپاق­ستان­­داعى احۋنباباەۆ اۋى­لىندا تۋعان. قاتارداعى جاۋ­ىنگەر. ۋكراينا، سولتۇستىك كاۆكاز مايداندارىندا شاي­قاس­قان. چەحوسلوۆاكيانى ازات ەتۋ ءۇشىن بولعان ۇرىستارعا قا­تىسىپ، ەرلىكپەن قازا تاپقان.  24.3.1945. 

56. مامىراەۆ مارتبەك. 1908 جىلى قاراعاندى وبلىسىنىڭ قارقارالى اۋدا­نىندا تۋعان. اعا سەرجانت. پۋلەمەتشى. دنەپردەن وتكەن كەزدە ۇلكەن ەرلىك، باتىلدىق كور­سەتكەن. 15.1.1944. 

57. مامەتوۆا مانشۇك (1922-1944). ورال وبلىسىنىڭ وردا اۋدانىندا تۋعان. اعا سەرجانت. پۋلەمەتشى. نەۆەل قالا­سى ءۇشىن بولعان ۇرىستا عا­جايىپ ەرلىك كورسەتىپ، قازا تاپقان. 1.3.1944. 

58. مولداباەۆ ەرەجەپباي (1925-1944).  شىم­كەنت وبلىسىنىڭ قاتىنكوپىر ەلدى مەكەنىندە تۋعان. قا­تار­داعى جاۋىنگەر. ۆيسلا وزە­نى­نەن ءوتۋ كەزىندە ەرلىكپەن قازا تاپقان. 23.9.1944. 

59. مولداعاليەۆ جان­عازى (1917-1944).  سەمەي وبلىسىنىڭ اباي اۋدا­نىندا تۋعان. روتا كومانديرى. لەيتەنانت. ستالينگراد، ۆورونەج، دون مايداندارىندا شايقاسقان. ۋكرايناداعى چەرونوپاروۆكا دەرەۆنياسى ءۇشىن بولعان ۇرىستا جاۋ دزوتىنىڭ اۋزىن ءوز دەنەسىمەن جاۋىپ، قاھارماندىقپەن قازا تاپقان. 19.3.1944. 

60. مولداعۇلوۆا ءاليا (1924-1944).  اقتوبە وبلى­سىنىڭ قوبدا اۋدانىن­دا تۋعان. ەفرەيتور. مەرگەن. 2-پري­بالتيكا مايدانىندا بو­لىپ، پسكوۆ وبلىسىنىڭ نو­ۆو­سوكولنيكي ستانتسياسى ما­ڭىن­داعى شەشۋشى شاي­قاس­تا جاۋىنگەرلەردى ۇرىسقا باستاپ، قاھارماندىقپەن قازا تاپقان. 4.6.1944. 

61. مۇساەۆ مۇقات (1919-1954) استراحان وبلى­سىنىڭ قارابالى اۋدانىندا تۋعان. قاتارداعى جاۋىنگەر. پۋلەمەتشى. تيسسا وزەنىنەن ءوتۋ ءۇشىن بولعان ۇرىستا جاۋ­دىڭ 60 سولداتى مەن وفيتسەرىن، 3 پۋلەمەت ۇياسىن جويعان. سوعىستان كەيىن ستالينگراد وبلىسىندا ەڭبەك ەتتى. 24.3.1945. 

62. مۇتكەنوۆ سەرىكباي (1913-1944). پاۆلودار وبلىسىنىڭ كراسنوكۋتسك اۋدا­نىندا تۋعان. زەڭبىرەك كومانديرى. ءبىر ءوزى جاۋدىڭ 1 تانكىسىن، 40 شاقتى سولداتى مەن وفيتسەرىن جويعان. ۋكراي­نانى ازات ەتۋ سوعىسىندا ەرلىكپەن قازا تاپقان. 3.2.1944. 

63. ماحامبەتوۆ جا­قىپبەك 1912 جىلى قى­زىل­وردا وبلىسىنىڭ سىرداريا اۋدانىندا تۋعان. كىشى سەرجانت. پۋلەمەتشى. چەركاسسك وب­لىسىنىڭ كرەششاتيك سەلو­سى ءۇشىن بولعان شايقاستا 40-تان استام جاۋدى جەر جاس­تاندىرىپ، ءبىر تانك پەن ءۇش ماشينانى جويعان. 22.2.1944. 

64. مامىتوۆ حاسان. 1922 جىلى شىمكەنت وبلى­سىنىڭ لەنگىر اۋدانىندا تۋ­عان. قاتارداعى جاۋىنگەر. پۋ­لەمەتشى. ستالينگراد، دنەپر ءۇشىن بولعان ۇرىس­تار­عا قاتىسىپ، روگاچەۆ قالاسىن جاۋدان ازات ەتۋ كەزىندە ۇلكەن ەرلىك كورسەتتى. 3.6.1944. 

65. ماسين تەمىر (1907-1947).  ورال وبلىسىنىڭ وردا اۋدانىندا تۋعان. ۇلى وتان سوعىسىندا قاتارداعى جاۋىنگەردەن روتا كومانديرىنە دەيىن كوتەرىلگەن. مينسك تاس جولىن جاۋدان قورعاۋ كەزىندە ۇلكەن ەرلىك جاساعان. بەيبىت ومىردە تايپاق اۋداندىق پارتيا كوميتەتىنىڭ حاتشىسى بولىپ ءجۇرىپ، 1947 جىلى دالا ءورتىن وشىرۋدە قازا تاپقان. 24.3.1945. 

66. مومىش ۇلى باۋ­ىرجان (1910-1982). جامبىل وبلىسىنىڭ جۋالى اۋدا­نىن­دا تۋعان. گۆارديا پولكوۆنيگى. سوعىس جىلدارىندا جەكە باسىنىڭ قاھارماندىعىمەن، ۇرىس جۇرگىزۋدەگى شەبەرلىگىمەن كوزگە تۇسكەن. سول كەزدىڭ وزىندە-اق ورتالىق باسپادان ونىڭ اسكەري تۇلعاسىن ايقىن بەينەلەگەن ا.بەكتىڭ «ارپالىس» پوۆەسى جارىق كورگەن. ديۆيزيا باسقارعان.  12.12.1990. 

67. نىسانباەۆ بوران (1918-1943). گۋرەۆ وبلىسى­نىڭ ەسبول اۋدانىندا تۋعان. قاتارداعى جاۋىنگەر. مينومەتشى. لەسكي قالاسىندا بول­عان شايقاستا جاۋىپ تۇرعان وققا قاراماستان جاۋدىڭ بىرنەشە اتىس ۇياسىن گراناتامەن تالقانداپ، ەر­لىكپەن قازا تاپ­قان. 23.9.1943. 

68. نۇرلىباەۆ جول­دى­باي (1922-1945).  شىم­كەنت وبلىسىنىڭ ماقتا­ارال اۋدانىندا تۋعان. كاپيتان. ار­تيللەريا باتارەيا­سىنىڭ كو­مانديرى. ستالينگراد، ۋكراينا، بەلورۋسسيا مايداندارىندا ەرلىكپەن شاي­قاسىپ، لۋكاتس-كرەيتس قالاسى ماڭىنداعى سۇراپىل ۇرىستا ەرلىكپەن قازا تاپقان.  24.3.1945. 

69. نۇرماعامبەتوۆ ساعادات. 1924 جىلى اقمولا وبلىسىنىڭ الەكسەەۆ اۋدا­نىن­دا تۋعان. روتا، باتالون كومانديرى بولدى. سولتۇستىك كاۆكاز، 4-ۋكراينا، 1-بەلورۋسسيا مايداندارىندا شاي­قاسىپ، پيليتسا وزەنى ماڭىن­دا بولعان ۇرىستا اسقان ەرلىك كورسەتكەن. سوعىستان كەيىنگى جىلدارى موسكۆاداعى جوعارى اسكەري اكا­دەميانى ءبىتىردى. تاۋەلسىز ەلىمىزدىڭ تۇڭعىش قورعانىس ءمينيسترى بولدى. ارميا گەنەرالى. 27.2.1945. 

70. نۇرپەيىسوۆ ءبىلىس (1919-1945). قاراقالپاق­ستان­نىڭ تاقتاكوپىر اۋدانىندا تۋ­عان. ۇشقىش. اعا لەيتەنانت. اۆياتسيالىق بارلاۋ پولكىندە قىزمەت ەتىپ، ۇلكەن ەرلىكتەر كورسەتكەن. بەرلين ماڭىندا جاۋىنگەرلىك تاپسىرمانى ورىن­داۋ كەزىندە قاھارمان­دىق­پەن قازا تاپقان. 18.8.1945. 

71. نۇرسەيىتوۆ جاپپاسباي. 1923 جىلى قىزىل­وردا وبلىسىنىڭ تەرەڭوزەك اۋدانىندا تۋعان. قاتارداعى جاۋىنگەر. دنەپردەن ءوتۋ كەزىندە جانقيارلىق ەرلىك، قا­ھار­ماندىق كورسەتكەن.  10.1.1944. 

72. نيەتقاليەۆ ەردەنبەك (1914-1945). ورال وب­لىسىنىڭ جانىبەك اۋدان­ىن­دا تۋعان. اتتى اسكەر ەس­كا­درو­نىنىڭ كومانديرى. مايداندا باتىلدىعىمەن، كوزسىز ەرلىگىمەن اتى شىققان. گەر­ما­نيا­نىڭ راتسەبۋر قالاسى ماڭىندا بول­عان شايقاستا اسقان ەرلىك كور­سەتىپ، قازا تاپقان. 24.3.1945. 

73. نۇرجانوۆ قازبەك (1919-1945).  قاراعاندى وبلى­سىنىڭ اقتوعاي اۋدانىندا تۋ­عان. بارلاۋشىلار ۆزۆودى­نىڭ كومانديرى. ۆولوگدا، ورەل، زۋكي، دەسنا، سوج، دنەپر، پرۋت، بەرەزينا وزەن­دەرىنەن ءوتۋ كەزىندە نەبىر ەرلىكتەر كورسەتكەن. ۆولكوۆ قالاسىن الۋ كەزىندە ەرلىكپەن قازا تاپقان. 24.3.1945. 

74.  وراقباەۆ ەسەن. 1922 جىلى ورال وبلى­سىنىڭ چاپاەۆ اۋدانىندا تۋ­عان. ارتيللەريا ۋچيليششە­سى­نىڭ ءتۇ­لەگى. چەحوسلوۆاكيانى، ۆەن­گريانى جاۋدان ازات ەتۋ وپەراتسيالارىندا ۇلكەن ەرلىكتەر كورسەتكەن. 25.3.1945. 

75. وڭتاەۆ بەيسەن. 1922 جىلى شىمكەنت وبلى­سىنىڭ ارىس اۋدانىندا تۋ­عان. قا­تارداعى جاۋىنگەر. بار­لاۋشى. دنەپردەن ءوتۋ كەزىندە ۇلكەن ەرلىك جاساعان. 30.10.1943.

76. ورازوۆ ءىلياس (1922-1945).  تاشكەنت وبلىسىنىڭ يانگيۋل اۋدانىندا تۋعان. لەيتەنانت. ۆزۆود كومانديرى. اتقىشتار ديۆيزياسىندا بو­لىپ، دۋناي وزەنىنەن ءوتۋ وپە­راتسياسىندا قاھارماندىقتىڭ شىنايى ۇلگىسىن كورسەتكەن. سوڭعى ءبىر ۇرىستا قازا تاپ­قان. 24.3.1945. 

77. راحيموۆ سابىر (1902-1945).  1943 جىلدان گۆار­ديا گەنەرال-مايورى. پولك، ديۆيزيا كومانديرى بولعان.  روس­توۆ­تى، پولشانى ازات ەتۋگە قاتىسىپ، اسا كورنەكتى اسكەري باسشى دەڭگەيىندە كورىنگەن. 6.5.1965. 

78. رىسبەكوۆ  قۇر­مان­باي (1922-1943).  شىم­كەنت وبلىسىنىڭ فرۋنزە اۋ­دانىندا تۋعان. ۆزۆود كومانديرى. ۋكراينادا بولعان ۇرىس­تاردا اسقان جانقيارلىق كور­سەتىپ، دنەپر وزەنىنەن ءوتۋ كەزىندە ەرلىكپەن قازا تاپقان. 10.1.1944. 

79. سەڭگىرباەۆ مۇ­سا­بەك (1914-1941).  تالدى­قور­عان وبلىسىنىڭ قاراتال اۋدا­نىندا تۋعان. قاتارداعى جاۋ­ىنگەر. 28-گۆاردياشى-پان­في­لوۆشىنىڭ ءبىرى. دۋبوسەكوۆو رازەزى تۇبىندە ءوز سەرىكتەرىمەن جاۋدىڭ 50 تانكىسىنە قارسى تۇرىپ، ەرلىكپەن قازا تاپقان. 21.7.1942. 

80. سيحىموۆ ەسمۇرات (1922-1942). تالدىقورعان وبلىسىنىڭ اقسۋ اۋدانىندا تۋعان. پۋلەمەت راسچەتىنىڭ كومانديرى. پوگۋدينو قىستا­عىندا 2 ساعات ايقاسىپ، 60 گيتلەرشىلدى جەر جاس­تان­دى­رىپ، ەرلىكپەن قازا تاپقان. 18.10.1943.

81. سىپاتاەۆ قارسى­باي (1918-1942). شىمكەنت وبلىسىنىڭ شايان اۋدانىندا تۋعان. قاتارداعى جاۋىنگەر. ستالينگراد ىرگەسىندەگى بولعان ۇرىستاردا عاجايىپ ەرلىك ۇلگىسىن كورسەتىپ، سوڭعى ءبىر شايقاستا جاۋ تانكىلەرىمەن جەكە دارا ايقاسقان. اقىرعى ميناسىن قولىنا ۇستاپ، تانك استىنا قۇلاپ، ونى جويىپ جىبەرىپ، قازا تاپقان. 17.4.1943. 

82. سمايىلوۆ سادىق. 1911 جىلى شىمكەنت وبلى­سىنىڭ بوگەن اۋدانىندا تۋعان. قاتارداعى جاۋىنگەر. ءوز زەڭ­بىرەگىمەن نەمىستەردىڭ 7 تانكىسىن، 2 زەڭبىرەگىن جانە 300-دەن استام جاۋدى جويىپ، اسقان ەرلىك كورسەتكەن. 1.11.1943. 

83. سماعۇلوۆ قايىر­عالي. 1919 جىلى گۋرەۆ وب­لىسىنىڭ بالىقشى اۋدا­نىندا تۋعان. روستوۆ، نوۆوروسسيسك قالالارىن ازات ەتۋگە قاتىسقان. دەسانتشىلاردان قۇرالعان 20 جاۋىنگەر 44 كۇن بويى جاۋ قىسپاعىنا توتەپ بەرىپ، ەلتيگەن قىستاعى ءۇشىن بولعان ۇرىستا تەڭدەسسىز ەرلىك كورسەتكەن. اتاقتى جازۋشى عابيت مۇسىرەپوۆتىڭ «قازاق سولداتى» رومانىنىڭ ءپروتوتيپى. 17.11.1943. 

84. سۇلەيمەنوۆ جولداس. 1921 جىلى شىمكەنت وب­لى­سىنىڭ سارىاعاش اۋدانىندا تۋ­عان. بارلاۋشىلار توبىنىڭ كومانديرى. دنەپر ءۇشىن بولعان ۇرىس­تا قاھارماندىق ەرلىك ۇلگى­سىن كورسەتىپ، جاۋدى وراسان شى­عىن­عا ۇشىراتقان. كوپ قارۋ-جا­راقتى قولعا تۇسىرگەن. 30.10.1943. 

85. سۇراعانوۆ قۇداي­بەرگەن. 1921 جىلى پاۆلودار وبلىسىنىڭ كاچير اۋدانىندا تۋعان. زەڭبىرەك باتارەياسىنىڭ كومانديرى. اعا لەيتەنانت. ۆول­گادان شپرەەگە دەيىن داڭقتى ەرلىك جولىمەن ءجۇرىپ وتكەن. 15.5.1946. 

86. سۋحامباەۆ اعادىل (1920-1944).  جامبىل وبلى­سىنىڭ سۆەردلوۆ اۋدانىندا تۋعان. قاتارداعى جاۋىنگەر. بەلورۋسسيانى، ليتۆانى، پول­شانى ازات ەتۋ سو­عىس­تارىنا قاتىسقان. پولشادا بولعان ۇرىستا پۋلەمەت امبرا­زۋراسىن دەنەسىمەن جاۋىپ، ەرلىكپەن قازا تاپقان.  24.3.1945. 

87. تاسقۇلوۆ قالى­باي. 1922 جىلى شىمكەنت وب­لىسىنىڭ بوستاندىق اۋدا­نىن­دا تۋعان. قاتارداعى جاۋ­ىن­گەر. دنەپر وزەنىنەن ءوتۋ كەزىندە ۇلكەن ەرلىك كورسەتكەن. 30.10.1943. 

88. توقاتاەۆ راقىم­جان. 1923 جىلى الماتى وبلىسىنىڭ ەڭبەكشىقازاق اۋدا­­نىندا تۋعان. قاتارداعى جاۋ­ىنگەر. ارتيللەريا ات­قىشتار پولكىنىڭ قۇرامىن­دا سوعى­سىپ، ءبىر شايقاستا جاۋدىڭ 9 تانكىسى مەن 4 برونوترانسپورتەرىن جويىپ جىبەرگەن. 29.6.1945. 

89. توقتاروۆ تولەگەن (1921-1942). شىعىس قازاق­ستان وبلىسىنىڭ ۇلان اۋدا­نىن­دا تۋعان. قاتارداعى جاۋ­ىنگەر. 8-گۆارديالىق ديۆيزيادا قىز­مەت ەتكەن. 1942 جىلى 9 اق­پاندا بورودينو ءۇشىن بول­عان ۇرىستا اسقان ەرلىك جاساپ، نەمىستەرمەن قويان-قولتىق شاي­قاستا قاھارماندىق ۇلگىسىن كورسەتتى. 30.1.1943. 

90. تەمىرباەۆ سەيىتحان. 1922 جىلى قوستاناي وب­لىسىنىڭ تاران اۋدانىنداعى قىزىلجار اۋىلىندا تۋعان. ۆزۆود، روتا كومانديرى بولىپ، بەلورۋسسيا، پولشانى ازات ەتۋگە قاتىسقان. بەرلينگە شا­بۋىل كەزىندە تاپقىرلىق پەن باتىلدىق تانىتقان. 31.5.1945.

91. تۋعانباەۆ قا­دى­ران (1924-1944). التاي ءول­كە­سىنىڭ ۋست-كان قىستاعىندا دۇنيەگە كەلگەن. اتقىشتار دي­­ۆيزياسىنىڭ قاتارداعى جاۋ­­ىنگەرى. ەرجۇرەك قازاق ۇلا­نى تالاي قيىن تاپ­سىر­مالاردى ابىرويمەن ورىن­دا­عان. دنەپردەن ءوتۋ كەزىندە جاۋ پۋلەمەتتەرىن باتىلدىقپەن جويىپ، جا­را­لان­عان سوڭ شەپتەن شىعارىلىپ، گوسپيتالدا قايتىس بولدى. 19.3.1944. 

92. تۇكتىباەۆ ءۇرماش (1917-1944). قىزىلوردا وبلى­سىنىڭ قازالى اۋدانىندا تۋ­عان. كىشى سەرجانت. سولتۇستىك باتىس، 2-پريبالتيكا مايدان­دا­رىندا سوعىسقان. پەرەلي قىس­تاعى تۇبىندەگى ۇرىستا اس­قان ەرلىكپەن قازا تاپقان. 24.3.1945. 

93. تىشقانباەۆ قو­جاحمەت (1917-1943).  تالدى­قورعان وبلىسىنىڭ پانفيلوۆ اۋدانىندا تۋعان. قاتار­داعى جاۋىنگەر. زەڭبىرەكشى. قى­رىم­داعى ەلتيگەن اۋدا­نىن­دا نەمىس تانكىلەرىمەن بەت­كە-بەت ۇرىستا ەرلىك كور­سە­تىپ، قازا تاپقان. 16.5.1944. 

94. ۇرگەنىشباەۆ ىدى­­­رىس (1912-1943). اق­توبە وبلىسىنىڭ شالقار اۋدا­نىندا تۋعان. سەرجانت. بولىمشە كومانديرى. دنەپردەن ءوتۋ كەزىندە جاۋدىڭ 90-نان استام سولداتى مەن  وفيتسەرىن جويىپ، وسى ۇرىستا قازا تاپقان. 15.1.1944. 

95. ۇسەنوۆ  ابدوللا (1924-1943). شىمكەنت وبلى­سىنىڭ تۇركىستان قالاسىندا تۋعان. قاتارداعى جاۋىنگەر. ۋكراينا جەرىندە جاۋدىڭ 8 تانكىسىن جويىپ، سول جويقىن ۇرىستا ەرلىكپەن قازا تاپقان. 25.8.1943. 

96. حۇسايىنوۆ احمەديار (1924-1986). ورال وبلىسىنىڭ وردا اۋدانىندا تۋعان. قاتارداعى جاۋىنگەر. مەليتوپول قالاسىن ازات ەتۋ كەزىندە ءبىر ءوزى 40 شاقتى جاۋدى جويىپ، ەرەن ەرلىك كورسەتكەن. 1.11.1943. 97. شاكەنوۆ كەنجەبەك. 1924 جىلى سەمەي وبلىسىنىڭ جارما اۋدا­نىن­دا تۋعان. پۋلەمەت ۋچيليششەسىن بىتىرگەن. 2-ۋكراينا ماي­دانىندا بولىپ، دنەپردەن ءوتۋ كەزىندە جاۋدىڭ شا­بۋىلىن 3 رەت تويتارىپ، 17 سولداتى مەن وفيتسەرىن، ءىرى كاليبيرلى پۋلەمەتىن جويعان. 22.2.1944. 

98. شاكىروۆ استانقۇل (1921-1945). وزبەكستاننىڭ ءاندىجان قالاسىندا تۋعان. بارلاۋ ۆزۆودىنىڭ جاۋىنگەرى. نەمان وزەنىنەن ەڭ ءبىرىنشى بولىپ ءوتىپ، بۇكىل پولكتىڭ اسكەري تاكتيكاسىن وزگەرتىپ، جاۋعا جويقىن سوققى بەرۋگە جاعداي جاساعان. ءسويتىپ، ەرلىكپەن قازا تاپقان. 24.3.1945. 

99. شاكىروۆ ءسادۋ. 1922 جىلى جامبىل وبلىسىنىڭ تالاس اۋدانىندا تۋعان. قاتارداعى جاۋىنگەر. دنەپردەن ءوتۋ كەزىندە لوەۆوداعى بيىكتىككە الدىمەن جەتىپ، تۋ تىككەن. 30.10.1943. 

100. ىسقاقوۆ قاپاي. (1906-1973). سەمەي وبلى­سى­نىڭ جارما اۋدانىندا تۋعان. قاتارداعى جاۋىنگەر. ستالينگراد، ۋكراينا مايدان­دا­رىندا ۇلكەن ەرلىكتەر كور­سەتكەن. 13.9.1944. 

101. ىبىراەۆ ايتكەن. (1924-1944). سەمەي وبلى­سى­نىڭ جاڭاسەمەي اۋدانىندا تۋعان. ستارشينا. جاۋدىڭ 6 زەڭبىرەگى مەن 12 پۋلەمەت ۇياسىن جويىپ قازا تاپقان. 24.3.1945. 

102. ىبىراەۆ  ىسقاق (1911-1965).  سولتۇستىك قا­زاق­ستان وبلىسىنىڭ پريشيم اۋدانىندا تۋعان. ات­قىشتار ۆزۆودىنىڭ كومانديرى. ودەر وزەنىنەن ءوتۋ كەزىندە قاھارماندىقتىڭ ەرەن ۇلگىسىن كورسەتكەن. 27.2.1945.

103. ءىلياسوۆ ناعي. 1920 جىلى قىزىلوردا وبلىسىنىڭ تەرەڭوزەك اۋدانىندا تۋعان. قا­تار­داعى جاۋىنگەر. دۋناي وزەنىنەن ءوتۋ كەزىندە با­تىلدىق پەن ەرلىك كور­سەتكەن. 9.4.1945.