«استانا تازالىق»: تسيفرلىق ترانسفورماتسيا ءوندىرىس تيىمدىلىگىن قالاي وزگەرتتى؟

«استانا تازالىق» جشس كوممۋنالدىق قىزمەت ساپاسىن ارتتىرۋ جانە اشىقتىقتى قامتاماسىز ەتۋ ماقساتىندا اۋقىمدى تسيفرلىق ترانسفورماتسيا جۇرگىزىپ جاتىر. كاسىپورىندا ەلەكتروندى جول پاراقتارى, GPS-ناۆيگاتسيا, جاساندى ينتەللەكت كامەرالارى جانە اۆتوماتتاندىرىلعان مەديتسينالىق تەكسەرۋ جۇيەلەرى ەنگىزىلىپ, بارلىق وندىرىستىك پروتسەسس ونلاين رەجيمدە باقىلاۋعا كوشىرىلدى.

2025–2026 جىلعى قىسقى كەزەڭدە كاسىپورىن ۇلكەن كولەمدەگى جۇمىستاردى اتقاردى: 2,2 ميلليون تەكشە مەتردەن استام قار شىعارىلدى, 475 توننا رەاگەنت قولدانىلدى. كۇندەلىكتى 600-دەن استام ارنايى تەحنيكا مەن 750-دەن استام جول جۇمىسشىسى جۇمىلدىرىلدى. قارقىندى قار جاۋعان كەزەڭدەردە (اقپان – ناۋرىز ايىنىڭ باسى) جۇمىستار كۇشەيتىلگەن رەجيمدە جۇرگىزىلدى. قازىر شامامەن 200 قىزمەتكەر تۇنگى اۋىسىمدا جۇمىسىن جالعاستىرىپ جاتىر.

«قازىر بىزدە جۇرگىزۋشىلەردى مەديتسينالىق تەكسەرۋدەن وتكىزۋگە ارنالعان ەكى اۆتوماتتاندىرىلعان كەشەن جۇمىس ىستەيدى. جالپى سانى – التاۋ. سونىڭ ءبىرى – №765 قۇرىلعىسى. جۇرگىزۋشى جۇمىسقا كەلگەن كەزدە جۇيەگە Face ID ارقىلى تىركەلەدى. سودان كەيىن ول قاجەتتى ءتىلدى تاڭدايدى, ال جۇيە ونىڭ جەكە باسىن اۆتوماتتى تۇردە انىقتايدى.

ءارى قاراي مىندەتتى مەديتسينالىق تەكسەرۋ جۇرگىزىلەدى. ول جۇمىسقا شىعار الدىندا دا, اۋىسىمنان كەيىن دە ورىندالادى. قۇرىلعى قان قىسىمىن, الكوگول دەڭگەيىن, كورۋ رەاكتسياسىن تەكسەرەدى. سونىمەن قاتار جۇرگىزۋشىنىڭ دەنساۋلىق جاعدايى بويىنشا شاعىمدارى تىركەلەدى. بارلىق مالىمەت اۆتوماتتى تۇردە مەديتسينالىق قىزمەتكەردىڭ جۇيەسىنە تۇسەدى. دەگەنمەن رەيسكە شىعۋعا رۇقساتتى تەك مەديتسينا قىزمەتكەرى ەلەكتروندى تۇردە راستايدى. تەكسەرۋدەن كەيىن جۇيە ارنايى چەك قالىپتاستىرادى. جۇرگىزۋشى ونى جۇمىس بارىسىندا وزىمەن بىرگە الىپ جۇرەدى. ەگەر قان قىسىمى جوعارى نەمەسە الكوگول ءىشۋ فاكتىلەرى انىقتالسا, جۇرگىزۋشى جۇمىسقا جىبەرىلمەيدى. بۇل جۇيە قاۋىپسىزدىكتى ارتتىرۋعا مۇمكىندىك بەردى. مەديتسينالىق تەكسەرۋدەن كەيىن دەرەكتەر باس مەحانيكتەردىڭ جۇيەسىنە تۇسەدى. ولار تەحنيكا مەن جۇرگىزۋشىلەردىڭ اۋىسىمدىق جۇمىسىن ەلەكتروندى تۇردە جوسپارلايدى.

بارلىق جۇرگىزۋشىلەردىڭ تەلەفونىندا ارنايى قوسىمشا بار. جۇمىسقا كەلگەن كەزدە QR-كود ارقىلى تىركەلىپ, جول پاراعى اۆتوماتتى تۇردە اشىلادى. بارلىق دەرەكتەر بىرىڭعاي تسيفرلىق جۇيەدە ونلاين باقىلانادى», دەدى «استانا تازالىق» جشس IT مامانى جاراس احمەديا.

كاسىپورىن قالا اۋماعىنىڭ شامامەن 32%-ىنا قىزمەت كورسەتەدى, نەگىزگى جانە ورتالىق كوشەلەردىڭ تازالىعىن قامتاماسىز ەتەدى. بالانسىندا 418 بىرلىك تەحنيكا بار, قاجەت بولعان جاعدايدا مەردىگەر ۇيىمداردىڭ قوسىمشا تەحنيكاسى تارتىلدى. بارلىق تەحنيكا تاۋلىك بويى جۇمىس ىستەدى. جازعى كەزەڭدە قىزمەتكەرلەر سانىن 450–550 ادامعا دەيىن وڭتايلاندىرۋ جوسپارلانعان.

مودەرنيزاتسيانىڭ نەگىزگى باعىتتارىنىڭ ءبىرى – پروتسەستەردى تسيفرلاندىرۋ بولدى. ەلەكتروندى جول پاراقتارى جۇيەسى ەنگىزىلىپ, ول قازىردىڭ وزىندە 393 تەحنيكا بىرلىگىن قامتيدى جانە ناقتى ۋاقىت رەجيمىندە قوزعالىستى, ورىندالعان جۇمىس كولەمىن جانە ماتەريالداردىڭ شىعىنىن باقىلاۋعا مۇمكىندىك بەرەدى.

سونىمەن قاتار GPS-ناۆيگاتسيا, جانارماي دەڭگەيىن باقىلاۋ داتچيكتەرى جانە جاساندى ينتەللەكت نەگىزىندەگى مونيتورينگ جۇيەلەرى ەنگىزىلگەن. بۇل شەشىمدەر مارشرۋتتاردى ءدال باقىلاۋعا, جانارماي شىعىنىن ەسەپتەۋگە جانە جۇرگىزۋشىلەردىڭ جاعدايىن قاداعالاۋعا مۇمكىندىك بەرىپ وتىر. كەيبىر جۇيەلەر شارشاۋ نەمەسە قاۋىپ بەلگىلەرىن انىقتاعان جاعدايدا اۆتوماتتى تۇردە ءتيىستى قىزمەتكە سيگنال جولدايدى.

تسيفرلاندىرۋ باعىتى «استانا تازالىق» ءۇشىن تەك تەحنولوگيالىق جاڭارۋ عانا ەمەس, سونىمەن قاتار قىزمەت ساپاسىن ارتتىرۋ مەن قالالىق ينفراقۇرىلىمنىڭ تۇراقتى جۇمىسىن قامتاماسىز ەتۋدىڭ ماڭىزدى قۇرالىنا اينالعان. سونداي-اق ەلەكتروندى باقىلاۋ جۇيەلەرى مەن اۆتوماتتاندىرىلعان پروتسەستەر تەك ەڭبەك ونىمدىلىگىن ارتتىرىپ قانا قويماي, اشىقتىق پەن ءتارتىپتى كۇشەيتۋگە ىقپال ەتىپ وتىر.