تۋريزم جانە سپورت ءمينيسترى ەربول مىرزابوسىنوۆ مانەرلەپ سىرعاناۋدان وليمپيادا چەمپيونى ميحايل شايدوروۆپەن قانداي كەلىسىمشارت جاسالعانىن مالىمدەدى, دەپ حابارلايدى Egemen.kz.
ءمينيستردىڭ ايتۋىنشا قازىرگى ۋاقىتتا وليمپيادا چەمپيونىنىڭ جالاقىسىنا قاتىستى بارلىق ماسەلەلەر شەشىلگەن.
«ميحايلمەن جاسالعان كەلىسىمشارت ماسەلەسى شەشىلدى. بۇل – ستاندارتتى شارت, وعان تەك وليمپيادا چەمپيوندارى عانا ەمەس, بارلىق سپورتشىلار قول قويادى. ءبىز ونى باق قىسىمىمەن جەكە تۇردە ازىرلەي المايمىز», دەدى مينيستر ۇكىمەتتەگى بريفينگتە.
ەربول مىرزابوسىنوۆ سپورتشىعا تالاپتار دۇرىس تۇسىندىرىلمەگەنىن ايتىپ, وسىعان بايلانىستى كىنالىلەر جاۋاپقا تارتىلعانىن اتاپ ءوتتى.
ء«بىز ميحايلمەن بىرگە كەلىسىمشارتتى قاراپ شىقتىق, ەكى تاراپتان دا قورىتىندى جاسالدى. كوممۋنيكاتسيادا ولقىلىقتار بولعان, دۇرىس تۇسىندىرىلمەگەن. قازىر ماسەلە تولىق شەشىلدى. ەڭ باستىسى – الداعى ماۋسىمعا دايىندىققا كوڭىل ءبولۋ. ەكى تاراپتىڭ دا ورىنداۋشىلارى مەن مەنەدجەرلەرى اكىمشىلىك جازاعا تارتىلدى», دەدى ول.
ءمينيستردىڭ ايتۋىنشا, شايدوروۆپەن تيپتىك ۇلگىدەگى كەلىسىمشارت جاسالعان. ول وليمپيادا چەمپيوندارى مەن تومەن دەڭگەيدەگى سپورتشىلارعا دا بىردەي مىندەتتەر جۇكتەيدى. كەلىسىمشارتقا سايكەس, تولەنگەن قوسىمشا قارجى كەرى قايتارىلمايدى.
ايتا كەتەيىك, بۇعان دەيىن ميحايل شايدوروۆ اقپان ايىنان بەرى جالاقى الماعانىن مالىمدەگەن بولاتىن. كەيىن بۇل ماسەلەگە قاتىستى تۋريزم جانە سپورت مينيسترلىگى تۇسىنىكتەمە بەرىپ, سپورتشىعا جاڭا كەلىسىمشارت ۇسىنىلعانىن حابارلاعان ەدى. سونداي-اق جاقىندا سپورتشى 30 جاس سپورتشىنىڭ ارقايسىسىنا 200 مىڭ تەڭگەلىك سەرتيفيكات تابىس ەتتى.