بىلىكتى پەداگوگ ولگا ءتيمنىڭ ەسىمى وبلىسىمىزعا كەڭىنەن تانىمال. ۇلتى نەمىس بولسا دا, جۇرەگى «قازاق» دەپ سوققان ۇستاز مەملەكەتتىك ءتىلدىڭ ايبارىن اسىرىپ ءجۇر. قازاق تىلىنەن ساباق بەرەدى. مۇنىمەن قوسا دوستىق ۇيىندەگى «مامىلە» كلۋبىنىڭ بەلسەندىسى.
ولگا تيمنەن ء«تىلدى قالاي ۇيرەندىڭىز؟» دەپ سۇرايتىندار كوپ. وساكاروۆ اۋدانى شۇڭقىركول اۋىلىندا ومىرگە كەلگەن كەيىپكەرىمىز قارادومالاق قازاق بالالارىمەن ويناپ وسكەندىكتەن, ءتىلدى ەركىن مەڭگەرگەنىن ايتادى. ولگانىڭ مەكتەپتەگى ەڭ سۇيىكتى ءپانى قازاق ءتىلى بولىپتى. ال 5-سىنىپتان باستاپ «مۇعالىم بولامىن» دەگەن اسىل ارمانى ونى العا جەتەلەدى.
ورىس مەكتەبىن بىتىرسە دە, ولگا گەرمانوۆنا بولاشاق ماماندىعىن تاڭداۋدا ەش مۇدىرگەن جوق. سەنىمدى تۇردە قازاق ءتىلى ءپانىنىڭ مۇعالىمى بولۋعا بەل بۋدى. قاراعاندىداعى «بولاشاق» كوللەدجىنىڭ ءبىرىنشى كۋرسىن اياقتاعان سوڭ, العاشقى پەداگوگيكالىق تاجىريبەدەن ءوتۋدى پيونەرسكوە اۋىلىنداعى مەكتەپتە باستايدى. ول جەردە اپكەسى مەن جەزدەسى (العاشقى اسكەري دايىندىق ءپانىنىڭ مۇعالىمى) قىزمەت ەتەتىن. ءدال وسى جەردە جاس ماماننىڭ ءومىرى كۇرت وزگەرەدى.
مەكتەپتىڭ سول كەزدەگى باسشىلىعى ەكى ءتىلدى دە جەتىك بىلەتىن, بالا ءتىلىن تابا الاتىن دارىندى, تالاپتى قىزدى بىردەن بايقايدى. مەكتەپ ديرەكتورى ولگاعا سىرتتاي بولىمگە اۋىسىپ, بىردەن جۇمىسقا قالۋدى ۇسىنادى. وسىلايشا, نەبارى 18 جاسىندا ولگا گەرمانوۆنا ءوزىنىڭ ۇستازدىق جولىن قازاق ءتىلى مۇعالىمى رەتىندە باستايدى.
كوللەدجدى اياقتاعان سوڭ ءبىلىمىن «Bolashaq» اكادەمياسىندا جالعاستىردى. ونىڭ ىزدەنىمپازدىعى مەن قوعامدىق بەلسەندىلىگى ەلەۋسىز قالعان جوق. 2012 جىلى قاراعاندى وبلىسى اكىمىنىڭ ءداستۇرلى «قاينار» جاستار سىيلىعىنىڭ «جىل ستۋدەنتى» اتالىمىن جەڭىپ الدى. وسى جەتىستىگىنەن كەيىن ماگيستراتۋراعا گرانت ۇسىنىلسا دا, ولگا «مەنىڭ ورنىم – جوعارى وقۋ ورنىندا ەمەس, مەكتەپتەگى شاكىرتتەرىمنىڭ جانىندا» دەپ, عىلىم جولىنان گورى جانىنا جاقىن ۇستازدىق جولدى تاڭدايدى.
سەگىز جىل بويى اۋىل مەكتەبىندە شىڭدالعان ۇستاز, تۇرمىس قۇرعاننان كەيىن وبلىس ورتالىعىنا قونىس اۋداردى. قاراعاندى قالاسىنداعى №21 ورتا مەكتەپتە مۇعالىم جانە اعا تالىمگەر بولىپ قىزمەت ەتىپ, كەيىننەن بىلىكتىلىگىنىڭ ارقاسىندا ق.ساتباەۆ اتىنداعى گيمنازيانىڭ تاربيە ءىسى جونىندەگى ديرەكتوردىڭ ورىنباسارى لاۋازىمىنا دەيىن كوتەرىلدى. بۇل جىلدار ىشىندە ول وبلىستىق جانە رەسپۋبليكالىق دەڭگەيدەگى كوپتەگەن بايقاۋدىڭ شىڭىن باعىندىردى. اسىرەسە ء«تىل جاناشىرلارى» بايقاۋىنىڭ ء«تىل بىلگىرى» اتالىمىندا ۇزدىك شىعۋى – ونىڭ كوپجىلدىق ەڭبەگىنىڭ لايىقتى باعاسى ەدى.
ءبىر قىزىعى, ولگا گەرما-نوۆنانىڭ وتباسى دا – كوپۇلتتى. اناسى – ۋكراين, اكەسى – نەمىس. ال ومىرلىك سەرىگى – قازاق ازاماتى. ءتىپتى ەنەسى دە – نەمىس ۇلتىنان.
«شاڭىراعىمىزدا قازاقتىڭ بارلىق سالت-ءداستۇرىن ۇستانامىز. ناۋرىزكوجە ازىرلەپ, جەتى شەلپەك پىسىرەمىز. قازاق وتباسىنا كەلىن بولعان سوڭ, مۇنىمىز – ۇيرەنشىكتى ءۇردىس. بالالارىمىزعا نەمىس داستۇرلەرىن دە ۇيرەتەمىز. ءبىلىپ وسكەننىڭ ارتىقشىلىعى جوق», دەيدى ول.
ولگا ءتيمنىڭ قوعامداعى قىزمەتى تەك مەكتەپپەن شەكتەلمەيدى. 2019 جىلدان باس-تاپ ول دوستىق ءۇيى جانىنداعى «مامىلە» كلۋبىنىڭ جۇمىسىنا بەلسەنە ارالاسىپ, مەملەكەتتىك ءتىلدى ۇيرەنۋگە قۇشتار جاندارعا ءدارىس وقيدى. كلۋبتىڭ ەرەكشەلىگى – ءتىلدى ەرەجە, ەملەلەر ارقىلى ەمەس, حالقىمىزدىڭ تاريحى مەن مادەنيەتى ارقىلى مەڭگەرتۋىندە.
بۇگىندە كلۋبقا كەلۋشىلەردىڭ قاتارى كۇن سايىن كوبەيىپ كەلەدى. ولاردىڭ اراسىندا بالاباقشا تاربيەشىلەرىنەن باستاپ, زەينەتكەرلەرگە, تانىمال ارتىستەر مەن قاراپايىم تاكسي جۇرگىزۋشىلەرىنە دەيىن بار. ولگانىڭ پايىمىنشا, قازاقستاندا تۇراتىن ءاربىر ازامات مەملەكەتتىك ءتىلدى بىلۋگە مىندەتتى. ويتكەنى ءتىل – حالىقتىڭ جانى, دوستىقتىڭ دانەكەرى.
قىسقاسى, ولگا تيم سياقتى ءتىل جاناشىرلارى باردا قازاق ءتىلىنىڭ كوسەگەسى كوگەرىپ, كوكجيەگى كەڭي تۇسەتىنىنە كامىل سەنەمىز.
قاراعاندى وبلىسى