مەملەكەت باسشىسىنىڭ تاپسىرماسى بويىنشا قازاقستاندا ازاماتتاردىڭ ءومىر ءسۇرۋ ساپاسىن ارتتىرۋ, ادامي كاپيتالدى دامىتۋ جانە الەۋمەتتىك تۇراقتىلىقتى نىعايتۋ جونىندەگى شارالار ىسكە اسىرىلىپ جاتىر. جۇمىسكەرلەردىڭ كاسىبي دامۋىنا, وتباسىلاردى قولداۋعا جانە وڭىرلەردىڭ تۇراقتى دامۋىنا جاعداي جاساي وتىرىپ, بۇل مىندەتتەردى شەشۋگە ەلىمىزدىڭ ءىرى جۇمىس بەرۋشىلەرى ەلەۋلى ۇلەس قوسىپ وتىر.
وسىنداي جۇمىس بەرۋشىلەردىڭ ءبىرى − «قازاقستان تەمىر جولى» ۇك» اق. ۇلتتىق كومپانيانىڭ الەۋمەتتىك ساياساتى ارداگەرلەر مەن جاستاردى قولداۋدان باستاپ تەمىرجولشىلار تۇراتىن جانە جۇمىس ىستەيتىن ەلدى مەكەندەردە الەۋمەتتىك ينفراقۇرىلىمدى دامىتۋعا دەيىنگى باعىتتاردىڭ كەڭ اۋقىمىن قامتيدى.
وڭىرلەردە ءومىر ءسۇرۋ ءۇشىن قولايلى جاعداي جاساۋعا ەرەكشە كوڭىل بولىنەدى. سونىمەن, Wabtec كومپانياسىمەن بىرلەسىپ سەكسەۋىل مەن شالقاردا شىعارماشىلىق ورتالىق پەن ونەر مەكتەبىن سالۋ بويىنشا جوبالار ىسكە اسىرىلىپ جاتىر. جاركەنتتە التىنكول – جەتىگەن تەمىر جول ۋچاسكەسىن جاڭعىرتۋ اياسىندا «قازاقستان تەمىر جولى» ۇك» اق وبلىس اكىمدىگىمەن بىرلەسىپ جانە «تەمىرجول جوندەۋ» جشس كومەگىمەن سالعان 140 ورىندىق بالاباقشا اشىلدى. بۇل نىساندار جۇمىسشىلار مەن وتباسىلارىنىڭ ءومىر ءسۇرۋ ساپاسىن جاقسارتىپ قانا قويماي, ەلدى مەكەندەردىڭ الەۋمەتتىك ينفراقۇرىلىمىن دامىتۋعا ىقپال ەتەدى.
سالا ارداگەرلەرىن قولداۋ ماڭىزدى باعىت بولىپ قالا بەرەدى. كومپانيا 45 مىڭنان استام زەينەتكەرگە مەديتسينالىق كومەك, ساناتورلى-كۋرورتتىق ەمدەۋ جانە مەرەيتويلىق تولەمدەردى قوسقاندا الەۋمەتتىك قولداۋ كورسەتىپ كەلەدى. قتج ارداگەرلەر كەڭەسى مەن ارداگەرلەردىڭ كونسۋلتاتيۆتىك كەڭەسى ارقىلى ۇرپاقتار بايلانىسى ساقتالىپ وتىر, ال ارداگەرلەردىڭ كاسىبي تاجىريبەسى جاس مامانداردى دايارلاۋدا سۇرانىسقا يە.
جۇمىسشىلاردىڭ وتباسىلارىنا كوپ كوڭىل ءبولىنىپ وتىر. بيىل قتج بالالاردى ساۋىقتىرۋ لاگەرلەرىنە تەگىن جول جۇرۋىمەن 7 372 جولداما ساتىپ الدى. جالعىزباستى اتا-انالارعا اتاۋلى قولداۋ كورسەتىلەدى, مەكتەپ تۇلەكتەرىنىڭ اتا-انالارىنا قوسىمشا اقىلى دەمالىس كۇندەرى بەرىلەدى.
ءداستۇرلى تۇردە بالالاردى قورعاۋ كۇنىنە وراي اۋقىمدى ءىس-شارالار وتكىزىلەدى. بيىلعى جىلى قتج باسقارما توراعاسىنىڭ تاپسىرماسى بويىنشا شالعاي ستانتسيالاردا تۇراتىن تەمىرجولشىلاردىڭ كوپبالالى وتباسىلارىنان شىققان ءجۇز بالا زياتكەرلىك جانە شىعارماشىلىق دامۋعا, سونداي-اق بەلسەندى دەمالىسقا ىقپال ەتەتىن ۆەلوسيپەدتەر, LEGO كونسترۋكتورلارى جانە باسقا دا دامىتۋشى جيىنتىقتار الدى.
ەلىمىز بويىنشا بالالارى وقۋ, سپورت جانە شىعارماشىلىق بويىنشا ەلەۋلى ناتيجەلەرگە قول جەتكىزگەن قىزمەتكەرلەردىڭ وتباسىلارىن قۇتتىقتاۋ ۇيىمداستىرىلدى.
وسكەلەڭ ۇرپاقتى قولداۋ كاسىپتىك باعدار بەرۋ جۇمىسىن دا قامتيدى. كومپانيا مەكتەپ وقۋشىلارى مەن ستۋدەنتتەردى تەمىرجول ماماندىقتارىمەن تانىستىرا وتىرىپ, وندىرىستىك نىساندار مەن سالالىق مۇراجايعا ەكسكۋرسيالار ۇيىمداستىرادى. بيىل قتج ورتالىق مۇراجايىنا 400-دەن استام جوعارى سىنىپ وقۋشىلارى مەن كوللەدج ستۋدەنتتەرى كەلدى.
بالالاردىڭ شىعارماشىلىق جانە زياتكەرلىك الەۋەتىن دامىتۋ ماڭىزدى. كومپانيادا تەمىرجول كاسىپتەرىن تانىمال ەتۋگە جانە ۇرپاقتار ساباقتاستىعىن نىعايتۋعا ىقپال ەتەتىن «تەمىر جول بالالار كوزىمەن» تاقىرىبىندا بەينەكونكۋرستار مەن شىعارمالار كونكۋرستارى وتكىزىلەدى.
بيىل كومپانيا تەمىر جولعا اۋەستىك تانىتقان 6 جاسار ءانۋار ءابساتتاروۆ پەن 11 جاستاعى ءامىر جانعاليەۆتىڭ تىلەكتەرىن ورىنداپ, ولاردى لوكوموتيۆ كابينالارىندا ساپارلاۋعا مۇمكىندىك جاسادى جانە دەپو بويىنشا ەكسكۋرسيالار ۇيىمداستىردى. سونىمەن قاتار, قتج 100 جاس سپورتشى-تەمىرجولشى اراسىندا شاعىن فۋتبولدان رەسپۋبليكالىق تۋرنير وتكىزدى.
جاس كادرلاردى دايارلاۋ دا ماڭىزدى مىندەت بولىپ قالا بەرەدى. جاستار ساياساتىنىڭ 2023-2026 جىلدارعا ارنالعان باعدارلاماسى شەڭبەرىندە جاس قىزمەتكەرلەردىڭ كاسىبي جانە باسقارۋشىلىق قۇزىرەتتەرىن دامىتۋعا باعىتتالعان جوبالار ىسكە اسىرىلىپ جاتىر. ولاردىڭ قاتارىندا «قتج-نىڭ 100 جاس ەسىمى» جاس مامانداردى دامىتۋ باعدارلاماسى, «جاس ۇزدىك مامان» كاسىبي شەبەرلىك كونكۋرسى, «تەمىرجول بىلگىرلەرى» ينتەللەكتۋالدى ليگاسى, «مويا PROFەسسيا» جانە «Zaman AI» كونكۋرستارى, سونداي-اق كۆن كورپوراتيۆتىك قوزعالىسى جانە «گالستۋكOFF» مەديا جوباسى بار.
بۇقارالىق سپورتتى دامىتۋ كومپانيانىڭ الەۋمەتتىك ساياساتىنىڭ ءبىر بولىگى. وسى جىلدىڭ العاشقى بەس ايىندا 9,2 مىڭنان استام جۇمىسشى سپورت سەكتسيالارىندا جاتتىقتى. 7,1 مىڭنان استام ادامنىڭ قاتىسۋىمەن 197 سپورتتىق ءىس-شارا ءوتتى. كومپانيا قىزمەتكەرلەرى حالىقارالىق جارىستاردا قتج مەن قازاقستان اتىنان جاقسى ناتيجە كورسەتىپ ءجۇر.
سونىمەن قاتار, كورپوراتيۆتىك ۆولونتەرلىك بەلسەندىلىك دامىپ كەلەدى. تەمىرجولشىلار قايىرىمدىلىق پەن ەكولوگيالىق اكتسيالارعا قاتىسىپ, ارداگەرلەر مەن زەينەتكەرلەرگە جاردەمدەسەدى, الەۋمەتتىك مەكەمەلەرگە قولداۋ كورسەتەدى جانە وڭىرلىك ءوزارا كومەك جوبالارىن جۇزەگە اسىرادى.
ايتا كەتەيىك, استاناداعى پاراليمپيادالىق ورتالىقتى قولداۋ, قاراعاندىدا «قۇستارعا كومەكتەسەمىز» ەكولوگيالىق اكتسياسى, رامازان ايىندا ورازا ۇستاۋشىلارعا قۇرما مەن سۋ تاراتۋ, «جۇرەكتەن جۇرەككە» جانە «جاقسىلىق جاساپ جارىسايىق» وڭىرلىك يگى ىستەر مارافوندارى, سونداي-اق اتاۋلى الەۋمەتتىك-تۇرمىستىق كومەك كورسەتۋ جانە ارداگەرلەر مەن زەينەتكەرلەرگە ازىق-ت ۇلىك سەبەتتەرىن تاپسىرۋ سياقتى ءىس-شارالار وتكىزىلدى.
تاجىريبە كورسەتكەندەي, بۇگىندە ءىرى جۇمىس بەرۋشىنىڭ الەۋمەتتىك جاۋاپكەرشىلىگى ەڭبەك ۇجىمى الدىنداعى مىندەتتەمەلەردى ورىنداۋ شەڭبەرىنەن اسىپ تۇسەدى. ءسوز ادامي كاپيتالدى دامىتۋعا جاعداي جاساۋ, الەۋمەتتىك تۇراقتىلىقتى نىعايتۋ جانە ادامداردىڭ ءومىر ءسۇرۋ ساپاسىن ارتتىرۋ تۋرالى بولىپ وتىر. سوندىقتان دا قتج-نىڭ الەۋمەتتىك جوبالارى كورپوراتيۆتىك ساياساتتىڭ ءبىر بولىگى عانا ەمەس, سونىمەن قاتار وڭىرلەر مەن تۇتاستاي العاندا ەلدىڭ تۇراقتى دامۋىنا قوسقان ۇلەسى بولىپ وتىر.