قازاقستاندا شەتەل ازاماتتارىنا ارنالعان كوشى-قون قىزمەتتەرىن تسيفرلاندىرۋ جۇمىستارى جالعاسىپ جاتىر. ەندى ولار جەكە سايكەستەندىرۋ ءنومىرىن (جسن) جانە باسقا دا مەملەكەتتىك قىزمەتتەردى جاڭا ءموبيلدى قوسىمشا ارقىلى الا الادى, دەپ حابارلايدى Egemen.kz.
بۇل تۋرالى ۇكىمەت وتىرىسىندا ىشكى ىستەر ءمينيسترى ەرجان سادەنوۆ مالىمدەدى.
قازىر ەلىمىزدىڭ اۋەجايلارى مەن ءىرى وتكىزۋ بەكەتتەرىندە شەتەلدىكتەرگە QR-كودى بار تۋريستىك كارتالار تاراتىلىپ جاتىر. وندا قازاقستاندا بولۋ ەرەجەلەرى, توتەنشە جاعداي قىزمەتتەرى مەن ۇيالى بايلانىس وپەراتورلارى تۋرالى ماڭىزدى اقپارات قامتىلعان.
وتكەن جىلى شامامەن 80 مىڭ شەتەلدىك قازاقستانعا ەم الۋ ءۇشىن كەلگەن
كوشى-قون پروتسەستەرىن ودان ءارى تسيفرلاندىرۋ ماقساتىندا QazETA ءموبيلدى قوسىمشاسى ازىرلەنىپ جاتىر. جاڭا سەرۆيس ارقىلى شەتەل ازاماتتارى بىرقاتار مەملەكەتتىك قىزمەتتى ونلاين فورماتتا پايدالانىپ, سونىڭ ىشىندە جسن راسىمدەي الادى.
ءمينيستردىڭ ايتۋىنشا, جاڭا تسيفرلىق قىزمەتتەردى ىسكە قوسۋ ءۇشىن قاجەتتى زاڭنامالىق تۇزەتۋلەر پاكەتى قازىر سەناتتا قارالىپ جاتىر.
ەسكە سالايىق, 2026 جىلعى 1 قاڭتاردان باستاپ قازاقستاننىڭ ەلشىلىكتەرى, كونسۋلدىقتارى جانە شەتەلدەگى باسقا دا مەكەمەلەر شەتەل ازاماتتارىنا جسن بەرۋدى توقتاتقان بولاتىن.
قازاقستاندا شەتەلدىكتەرگە جسن بەرۋ ۋاقىتشا توقتاتىلادى
ايتا كەتەيىك, QazETA – شەتەلدىكتەرگە كوشى-قون جانە وعان قاتىستى قىزمەتتەردى ىڭعايلى, اشىق ءارى قاۋىپسىز تۇردە ۇسىنۋعا ارنالعان ء«بىر تەرەزە» قاعيداتى بويىنشا قۇرىلعان مەملەكەتتىك تسيفرلىق پلاتفورما.