بۇگىن تۇركىستان قالاسىندا تۇركى مەملەكەتتەرى ۇيىمىنا (تمۇ) مۇشە مەملەكەتتەردىڭ ءبىلىم مينيسترلەرىنىڭ ءىح وتىرىسى ءوتتى. باسقوسۋعا سالالىق ۆەدومستۆولاردىڭ باسشىلارى, تمۇ حاتشىلىعىنىڭ وكىلدەرى, سونداي-اق ۇيىمعا مۇشە جانە باقىلاۋشى مەملەكەتتەردىڭ دەلەگاتسيالارى قاتىستى, دەپ حابارلايدى Egemen.kz عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
وتىرىستى اشقان عىلىم جانە جوعارى ءبىلىم ءمينيسترى ساياسات نۇربەك تۇركىستاننىڭ تۇركى الەمىنىڭ رۋحاني ءارى مادەني ورتالىعى رەتىندەگى ايرىقشا ماڭىزىن اتاپ ءوتىپ, ونىڭ باۋىرلاس مەملەكەتتەر اراسىنداعى ىقپالداستىق ۇدەرىستەرىن نىعايتۋداعى ەرەكشە رولىنە توقتالدى.
ءوز سوزىندە مينيستر بيىل مامىر ايىندا تۇركىستان قالاسىندا «جاساندى ينتەللەكت جانە تسيفرلىق دامۋ» تاقىرىبىمەن تۇركى مەملەكەتتەرى ۇيىمىنا مۇشە مەملەكەتتەر باسشىلارىنىڭ بەيرەسمي ءسامميتى وتكەنىن ەسكە سالدى. سامميت قورىتىندىسى بويىنشا جاساندى ينتەللەكت, تسيفرلىق ترانسفورماتسيا جانە ادامي كاپيتالدى دامىتۋ تۇركى ەلدەرىنىڭ ۇزاق مەرزىمدى ىنتىماقتاستىعىنىڭ نەگىزگى باسىمدىقتارى رەتىندە ايقىندالعان بولاتىن.
«بۇگىنگى وتىرىستىڭ ستراتەگيالىق ماڭىزى ەرەكشە. ويتكەنى ءبىلىم بەرۋ – ورتاق ماقسات-مۇراتتارىمىزدىڭ نەگىزى ءارى ورتاق قۇندىلىقتارىمىزدى ساقتاي وتىرىپ, تۇركى الەمىن ءبىلىم, يننوۆاتسيا جانە جاساندى ينتەللەكت داۋىرىنە باستايتىن جاڭا بۋىندى قالىپتاستىرۋدىڭ ماڭىزدى قۇرالى. ءبىلىم مەن عىلىم سالالارىنداعى ىنتىماقتاستىقتى ودان ءارى نىعايتۋ, اكادەميالىق ۇتقىرلىقتى دامىتۋ, تسيفرلىق وقىتۋدى جەتىلدىرۋ جانە بىرلەسكەن عىلىمي باستامالاردى ىسكە اسىرۋ ارقىلى مەملەكەتتەرىمىزدىڭ تۇراقتى دامۋى مەن جاھاندىق باسەكەگە قابىلەتتىلىگىن قامتاماسىز ەتەتىن بىرىڭعاي ءبىلىم بەرۋ كەڭىستىگىن قالىپتاستىرا الامىز دەپ سەنەمىن», دەدى ساياسات نۇربەك.
وتىرىسقا قاتىسۋشىلار ورتاق تاريحي-مادەني قۇندىلىقتارعا, جوعارى اكادەميالىق ستاندارتتارعا جانە ورنىقتى دامۋ قاعيداتتارىنا نەگىزدەلگەن ءبىرتۇتاس ءبىلىم بەرۋ كەڭىستىگىن قالىپتاستىرۋ ماقساتىندا ءبىلىم جانە عىلىم سالالارىنداعى ىنتىماقتاستىقتى ودان ءارى دامىتۋعا بەيىلدى ەكەندەرىن راستادى.
تۇركى مەملەكەتتەرى ۇيىمى 2027 جىلى بىرلەسكەن جاساندى جەر سەرىگىن ۇشىرادى
جيىن بارىسىندا اكادەميالىق ىنتىماقتاستىقتى كەڭەيتۋ, تسيفرلىق وقىتۋدى دامىتۋ, بىلىكتىلىكتەردى ءوزارا تانۋ تەتىكتەرىن جەتىلدىرۋ, جوعارى وقۋ ورىندارى اراسىنداعى بايلانىستى نىعايتۋ, سونداي-اق تمۇ ەلدەرىندەگى ءبىلىم بەرۋ مەن عىلىمي زەرتتەۋلەردىڭ ساپاسىن ارتتىرۋ ماسەلەلەرى قارالدى.
سونىمەن قاتار تسيفرلىق ينتەگراتسيانى, ءبىلىم بەرۋ تەحنولوگيالارىن, دەرەكتەر الماسۋدى جانە جاساندى ينتەللەكت سالاسىنداعى بىرلەسكەن باستامالاردى دامىتۋدى كوزدەيتىن «تسيفرلىق تۇركى الەمى» تۇجىرىمداماسىن ىسكە اسىرۋدىڭ ماڭىزدىلىعى ەرەكشە اتاپ ءوتىلدى. قاتىسۋشىلار تسيفرلىق ترانسفورماتسيانىڭ ۇلتتىق ستراتەگيالارىن دامىتۋ جانە جاڭا ەكونوميكا ءۇشىن بىلىكتى كادرلار دايارلاۋ باعىتىنداعى كۇش-جىگەردى ۇيلەستىرۋ قاجەتتىگىن ايتتى.
وتىرىستا وقۋ-اعارتۋ ۆيتسە-ءمينيسترى شىنار اقپاروۆا, تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ, ازەربايجاننىڭ عىلىم جانە ءبىلىم ءمينيسترى ەمين امرۋللاەۆ, قىرعىز رەسپۋبليكاسىنىڭ ءبىلىم ءمينيسترى دوگدۋركۋل كەنديرباەۆا جانە عىلىم, جوعارى ءبىلىم جانە يننوۆاتسيالار ءمينيسترىنىڭ ورىنباسارى دۋرۋس كوزۋەۆ, تۇركيا رەسپۋبليكاسىنىڭ ۇلتتىق ءبىلىم ءمينيسترى يۋسۋف تەكين, تۇركيانىڭ جوعارى ءبىلىم كەڭەسىنىڭ توراعاسى ەرول وزۆار, وزبەكستاننىڭ جوعارى ءبىلىم, عىلىم جانە يننوۆاتسيالار ءمينيسترىنىڭ ءبىرىنشى ورىنباسارى ساردور رادجابوۆ, سونداي-اق باقىلاۋشى مەملەكەتتەردىڭ وكىلدەرى بايانداما جاسادى.
كەزدەسۋ قورىتىندىسى بويىنشا قاتىسۋشىلار تۇركى مەملەكەتتەرى ۇيىمىنا مۇشە ەلدەردىڭ ءبلىم مينيسترلەرىنىڭ ءىح وتىرىسىنىڭ كومميۋنيكەسىنە قول قويدى. قۇجاتتا قول جەتكىزىلگەن ۋاعدالاستىقتار بەكىتىلىپ, ءبىلىم بەرۋ, عىلىم, اكادەميالىق ۇتقىرلىق, تسيفرلاندىرۋ جانە كادرلار دايارلاۋ سالالارىنداعى ىنتىماقتاستىقتى دامىتۋدىڭ الداعى قادامدارى ايقىندالدى.
وتىرىستى قورىتىندىلاعان مينيستر بارلىق دەلەگاتسيالارعا سىندارلى ديالوگ, بەلسەندى قاتىسۋ جانە تۇركى الەمىندەگى ءبىلىم جانە عىلىم سالاسىنداعى ىنتىماقتاستىقتى دامىتۋعا قوسقان ۇلەسى ءۇشىن العىس ايتتى. ول قابىلدانعان شەشىمدەر تمۇ-عا مۇشە مەملەكەتتەردىڭ ءبىلىم بەرۋ جۇيەلەرىن ودان ءارى ىقپالداستىرۋعا جانە ۇيىمنىڭ 2040 جىلعا دەيىنگى ستراتەگيالىق ماقساتتارىن ىسكە اسىرۋعا ىقپال ەتەتىنىنە سەنىم ءبىلدىردى.
ورتاق قۇندىلىقتار مەن ورتاق مۇددە: تۇركى الەمىنىڭ دامۋ باعىتى